(ភ្នំពេញ)៖ ឯកឧត្តម វ៉ាត់ ចំរើន រដ្ឋលេខាធិការ ក្រសួង​អប់រំ​​យុវជននិងកីឡា និងជាអគ្គលេខាធិការគណៈកម្មធិ​ការជាតិអូឡាំពិកកម្ពុជា បានបង្ហាញទស្សនៈ ៦ចំណុច​ដែលកម្ពុជាបញ្ជូនអត្តពលិកចូលរួមកីឡាស៊ុហ្គេម លើក​ទី៣៣ នៅប្រទេសថៃ រួមមាន ៖

-ការចូលរួមប្រកួត SEA Games លេីកនេះ គឺកម្ពុជាចូលរួមប្រកួតក្នុង​នាមជាសមាជិក និងគ្រួសារសហព័ន្ធកីឡាអាសុីអាគ្នេយ៍ SEAGF ចលនាអូឡាំពិកតំបន់ ។ ចលនាអូឡាំ​ពិកប្រទេ​ស​ជាសមាជិកត្រូវមានកាតព្វកិច្ចចូលរួមប្រកួត​ពហុកីឡាតាមការកំណត់។

• គោលការណ៍គ្រឹះអូឡាំពិកអន្តរជាតិ គឺប្រឆាំងនឹង​ការរេីសអេីងគ្រប់ទម្រង់ ក្នុងវិស័យកីឡា និងជៀស​វាងពីសម្ពាធនយោបាយ សាសនា ជាតិសាសន៍ និង និន្នាការសង្គមឡេីយ។ ប្រកាន់យក​ស្មារតី​សាមគ្គីភាព មិត្តភាព និងយោគយល់គ្នា ដេីម្បីកសាងពិភពលោក​មួយ​ល្អ​ប្រសេីរ។
• ព្រឹត្តិការណ៍កីឡា SEA games ជាបុព្វសិទ្ធិរបស់​សហព័ន្ធកីឡាអាសុីអាគ្នេយ៍ទាំង១១ ប្រទេស គ្រប់​គ្រងដឹកនាំ រីឯម្ចាស់ផ្ទះជាអ្នករៀបចំតាម​សេចក្តី​សម្រេ​ចរបស់ ក្រុមប្រឹក្សាសហព័ន្ធកីឡា អាសុីអាគ្នេយ៍ SEAGF Council ទាំង ១១ ប្រទេស ។
• ជ័យលាភីមេដាយដែលប្រទេសទាំងអស់ប្រកួត​ប្រ​ជែង​ដណ្តេីមគ្នាជាមេដាយ SEAGF មិនមែនមេដាយ​របស់ម្ចាស់ផ្ទះទេ។
• បេីមិនចូលរួមយេីងនឹងត្រូវបន្ទោសថាមិនគោរព​ធម្ម​នុញ្ញ​អូឡាំពិក និងធម្មនុញ្ញ SEAGF ។
• បេីយេីងមិនចូលរួមដោយយកហេតុផលផ្សេងៗ​ខុស​ពី​គោលការណ៍ច្បាប់កីឡាជាសកលខាងលេី ក៏ត្រូវ​អន្តរ​ជាតិថ្កោលទោស ឬដាក់ពិន័យ ។ តែជនរួម​ជាតិ​យេីង​មួយចំនួនមិនគាំទ្រ និងមិនពេញចិត្តឱ្យចូលរួម​ដោយ​អស់​ទំនុកចិត្ត បារម្មណ៍សុវត្ថិភាពក៏ត្រឹមត្រូវដែរ។

ប៉ុន្មានឆ្នាំមុនការប្រកួតកីឡាអូឡាំពិករដូវរងារនៅកូរ៉េខាងត្បូង ប្រតិភូកូរ៉េខាងជេីងបានចូលរួម ទោះបីបងប្អូន​កូរ៉េ​ទាំងពីរជាសត្រូវដ៏សាហាវនឹងគ្នាក៏ដោយ។

តេីអាចទេដែលយេីងយកកីឡាជាសារកាទូត ឬជា​សមរភូមិកាទូតមួយទៀតបង្ហាញថា កម្ពុជាចង់​បាន​សន្តិភាព គោរពជានិច្ចគោលការណ៍ច្បាប់កីឡាអន្តរជាតិ ច្បាប់កីឡាតំបន់ និងមានសេចក្តីក្លាហ៊ាន ថ្លៃថ្នូ មិនចុះ​ញម​ចំពោះអគតិទាំងឡាយ និងសភាវអាក្រក់ទាំង​អស់​ឡេីយ។ នេះជាទស្សនៈផ្ទាល់​ខ្លួន មិនឆ្លុះបញ្ចាំង​ជា​ទស្សនរួមរបស់គណកម្មាធិការជាតិអូឡាំពិក និង​បងប្អូនជនរួមជាតិទេ ៕

ដោយ ៖ ជាវ ចន្ធូ