ភ្នំពេញ៖ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍កាលពីព្រឹកថ្ងៃទី៤ ខែធ្នូ ឆ្នាំ២០២៥​បានអញ្ជើញជា​អធិបតីក្នុងពិធីបើកកិច្ចប្រជុំលើកទី៩ នៃគណៈកម្មាធិការតម្រង់ទិសព័ត៌មានល្បឿនលឿនអាស៊ី-ប៉ាស៊ីហ្វិក (APIS) និង​ត្រួតពិនិត្យ​ថ្នាក់តំបន់ នៃកិច្ចប្រជុំកំពូលពិភពលោកស្ដីពីសង្គមព័ត៌មាន (WSIS)នៅសណ្ឋាគារ Raffles Hotel Le Royal។

កិច្ចប្រជុំគណៈកម្មាធិការតម្រង់ទិសព័ត៌មានល្បឿនលឿនអាស៊ី-ប៉ាស៊ីហ្វិកនេះ គឺរៀបចំប្រជុំក្នុងមួយឆ្នាំម្តង ក្នុងគោលបំណង​ពិនិត្យនិងអនុម័តលើផែនការសកម្មភាព APIS (APIS Action Plan) ក្នុងគោលដៅពន្លឿនការធ្វើបរិវត្តកម្មឌីជីថល និងកាត់​បន្ថយគម្លាតឌីជីថល។

កិច្ចប្រជុំដ៏មានសារៈសំខាន់នេះ ត្រូវបានសហការរៀបចំដោយ UN-ESCAP និង ក.ប.ទ. ដោយមានការអញ្ជើញចូលរួមពី ឯកឧត្តម អាហ្សាម៉ាត់ ហ្សាម៉ាងហ្គូឡូវ (Azamat Zhamangulov) រដ្ឋមន្រ្តីក្រសួងអភិវឌ្ឍន៍ឌីជីថល និងនវានុវត្តន៍បច្ចេកវិទ្យា នៃសាធារណរដ្ឋគីកៀរស្ថាន, ឯកឧត្តម អ៊ុលវី ម៉ីឌីយ៉េវ (Ulvi Mehdiyev)រដ្ឋមន្ត្រីនៃក្រសួងសាធារណការ​និងនវានុវត្តន៍​សង្គមក្រោមខុទ្ទកាល័យប្រធានាធិបតីនៃសាធារណរដ្ឋអាហ៊្សាបាយហ្សង់, ឯកឧត្តម ដេវីដ ឡូប៉េស អាល់មីរល ជូន័រ (David Lopez Almirol, Jr.) អនុរដ្ឋមន្រ្តីក្រសួងបច្ចេកវិទ្យាគមនាគមន៍និងព័ត៌មាន នៃសាធារណរដ្ឋហ្វីលីពីន, លោកស្រី ធាហ្សាណា បូណាប៉ាឆេ ( Tiazana Bonapace ) ប្រធាននាយកដ្ឋានបច្ចេកវិទ្យាគមនាគមន៍និងព័ត៌មាននិងការកាត់​បន្ថយហានិភ័យគ្រោះ​មហន្តរាយនៃ UN-ESCAP តំណាងគណៈកម្មាធិការជាតិអេស្កាប់ និងប្រតិភូជាន់ខ្ពស់ពីតំណាងរដ្ឋជាសមាជិក APIS និងដៃគូវិស័យឧស្សាហកម្ម រួមមានGSMA, AWS, China Mobile Communications Group, Danmission និង Sisters of Code ប្រមាណ ៨០រូប នៅសណ្ឋាគារ Raffles Hotel Le Royal៕
ដោយ៖ង៉ាន់ ទិត្យ