វ៉ាស៊ីនតោន ៖ នៅក្នុងរបាយការណ៍ចុងក្រោយរបស់មន្ទីរបញ្ចកោណ ស្តីពីសមត្ថភាពយោធាចិន បានចាត់ទុកការកើនឡើងកងកម្លាំងយោធាជាប្រវត្តិសាស្ត្ររបស់ទីក្រុងប៉េកាំង នឹងធ្វើឲ្យសន្តិសុខមាតុភូមិអាមេរិកកាន់តែងាយរងគ្រោះ ខណៈរដ្ឋបាលលោក ដូណាល់ ត្រាំ មានផែនការដាក់កម្រិតថ្មីលើឃ្លាំងអាវុធនុយក្លេអ៊ែររបស់អាមេរិក ចិន និងរុស្ស៊ី ។

របាយការណ៍នេះ បានពិពណ៌នាអំពីយោធាចិនថា កាន់តែទំនើប និងមានភាពធន់ខ្លាំងឡើងៗ ហើយទីក្រុងប៉េកាំងមានការប្រុងប្រយ័ត្ន ចំពោះកិច្ចព្រមព្រៀងទ្រង់ទ្រាយធំជាមួយអាមេរិក និងរៀនសូត្រពីបញ្ហារបស់រុស្ស៊ីនៅអ៊ុយក្រែន ខណៈចិនកំពុងបង្កើនសម្ពាធលើកោះតៃវ៉ាន់ ។

របាយការណ៍ដដែលក៏បានគូសបញ្ជាក់អំពីឃ្លាំងអាវុធនុយក្លេអ៊ែរដ៏ធំ និងកំពុងកើនឡើងរបស់ប្រទេសចិនផងដែរ រាប់ចាប់ពីនាវាចម្បាំង អាវុធវាយប្រហាររយៈចម្ងាយឆ្ងាយ សមត្ថភាពផ្នែកបច្ចេកវិទ្យាព័ត៌មាន និងអវកាស ដែលទាំងនេះសបញ្ជាក់ថា អាចជាគំរាមកំហែងដោយផ្ទាល់ដល់សន្តិសុខរបស់អាមេរិក ។

យោងតាមការប៉ាន់ស្មានរបស់វិទ្យាស្ថានស្រាវជ្រាវសន្តិភាពអន្តរជាតិទីក្រុងស្តុកខុល ហៅកាត់ (SIPRI) បានទម្លាយថា អាមេរិកមានក្បាលគ្រាប់នុយក្លេអ៊ែរប្រហែល ៥,១៧៧គ្រាប់ និងរុស្ស៊ីមានប្រហែល ៥,៤៥៩គ្រាប់ ខណៈចិនកំពុងស្ថិតក្នុងលឿនឆ្ពោះទៅរកការផលិតបានក្បាលគ្រាប់នុយក្លេអ៊ែរច្រើនជាង ១,៥០០គ្រាប់ នៅត្រឹមឆ្នាំ ២០៣៥ ៕

ប្រភព ៖ the straits times ប្រែសម្រួល ៖ ឈឹម ទីណា