មូស្គូ ៖ រដ្ឋមន្ត្រីការពារជាតិរុស្ស៊ីបានអះអាងថា កងទ័ពរបស់ប្រទេសមួយនេះ បានត្រៀមខ្លួនប្រយុទ្ធល្អបំផុត ប្រចាំពិភពលោក។

រដ្ឋមន្ត្រីការពារជាតិរុស្ស៊ី លោក Andrei Belousov កាលពីថ្ងៃអង្គារ បានថ្លែងកោតសរសើរ កងកម្លាំងប្រដាប់អាវុធ របស់ប្រទេសថា បានត្រៀមខ្លួនជាស្រេចដើម្បីប្រយុទ្ធល្អបំផុត ក្នុងពិភពលោក។ ជាការថ្លែង តាមរយៈសារអបអរឆ្នាំថ្មី ផ្ញើទៅកាន់មន្ត្រីយោធា និងអតីតយុទ្ធជន ដោយសរសើរកងទ័ព ចំពោះវិជ្ជាជីវៈ និងវីរភាពរបស់ពួកគេ ក្នុងអំឡុងពេលប្រតិបត្តិការយោធាពិសេស ដែលកំពុងបន្ត របស់ទីក្រុងម៉ូស្គូ នៅអ៊ុយក្រែន។

បើតាមសារព័ត៌មាន Tass, រដ្ឋមន្ត្រីការពារជាតិរុស្ស៊ី រូបនេះ បានអះអាងថា កាលពីឆ្នាំ២០២៥ រុស្ស៊ីបានបន្តពង្រឹងការត្រៀមខ្លួនប្រយុទ្ធ របស់កងកម្លាំងប្រដាប់អាវុធ ហើយការត្រៀមខ្លួនបានយ៉ាងល្អដាច់គេលើលោក នាឆ្នាំក្រោយនេះ បង្ហាញឱ្យឃើញថា រុស្ស៊ីអាចធានាបាននូវអធិបតេយ្យភាព របស់ប្រទេសជាតិ។

យ៉ាងណា ពុំមានសារព័ត៌មានណាមួយបញ្ជាក់លម្អិត ពីការត្រៀមខ្លួន តាមរបៀបណាខ្លះនោះទេ ខណៈដែលសង្គ្រាមបន្តមាន ជាមួយអ៊ុយក្រែន។

ការលើកឡើងនេះ ធ្វើឡើង ចំពេលដែលការចរចាសន្តិភាព ដឹកដោយអាមេរិក ហាក់នៅទ្រឹង ហើយស្ថានភាពកាន់តែតានតឹង ក្រោយពេលដែលរុស្ស៊ី អះអាងថា ដ្រូនអ៊ុយក្រែន រាប់សិបគ្រឿង ប៉នប៉ុងវាយប្រហារដល់ភូមិគ្រឹះរបស់ ប្រធានាធិបតីរុស្ស៊ី លោក ពូទីន កាលពីចុងសប្តាហ៍៕

ប្រភពពី AFP ប្រែសម្រួល៖ សារ៉ាត