បរទេស ៖ បន្ទាប់ពីស្ងប់ស្ងាត់មួយរយៈ យោធារបស់សហរដ្ឋអាមេរិក បានអះអាង ពីការវាយប្រហារ លើទូកសង្ស័យ រត់ពន្ធគ្រឿងញៀន ជាថ្មី ដោយសម្លាប់មនុស្ស ពីរនាក់ នៅសមុទ្រប៉ាស៊ីហ្វិក។

យោធាសហរដ្ឋអាមេរិក បានផ្សព្វផ្សាយវីដេអូ នៅលើបណ្តាញសង្គម X កាលពីថ្ងៃសុក្រ បានបង្ហាញពីអ្វី ដែលខ្លួននិយាយថា ជាការវាយប្រហារប្រឆាំងនឹងទូក ដែលសង្ស័យ មានការជួញដូរគ្រឿងញៀន នៅសមុទ្រប៉ាស៊ីហ្វិក ភាគខាងកើត។

បញ្ជាការខាងត្បូង របស់សហរដ្ឋអាមេរិក បាននិយាយថា មនុស្សពីរនាក់ បានស្លាប់ នៅក្នុងការវាយប្រហារនេះ ដោយបន្ថែមថា ឆ្មាំឆ្នេរសមុទ្រ កំពុងស្វែងរកអ្នក ទីបី ដែលនៅរស់រានមានជីវិត។

ការវាយប្រហារ ចុងក្រោយនេះ គឺជាសកម្មភាពលើកទីមួយ ដែលបានធ្វើឡើង ចាប់តាំងពីចុងឆ្នាំមុន ហើយក៏ជាលើកទីមួយដែរ ចាប់តាំងពីកងកម្លាំងអាមេរិក បានចាប់ខ្លួនមេដឹកនាំ ប្រទេសវេណេស៊ុយអេឡា ដែលអាមេរិកហៅថា ឆ្វេងនិយម គឺ លោក Nicolas Maduro កាលពីដើមខែមករា ហើយ បាននាំខ្លួន រូប លោក និង ភរិយា ទៅកាន់សហរដ្ឋអាមេរិក ដើម្បីកាត់ទោស៕

ប្រភពពី AFP ប្រែសម្រួល ៖ សារ៉ាត