ហ្សាកាតា ៖ ឥណ្ឌូណេស៊ីទើបទទួលបានយន្តហោះចម្បាំង Rafale ចំនួន ៣គ្រឿងដំបូងពីបារាំង ក្រោយចុះកិច្ចព្រមព្រៀងការពារជាតិមានតម្លៃ ៨ពាន់លានដុល្លារក្នុងឆ្នាំ ២០២២ ចំពេលដែលទីក្រុងហ្សាកាតាកំពុងព្យាយាមធ្វើទំនើបកម្មគ្រឿងបរិក្ខារយោធាចាស់ៗរបស់ខ្លួន ។

អ្នកនាំពាក្យក្រសួងការពារជាតិឥណ្ឌូណេស៊ី លោក Rico Ricardo Sirait និយាយថា យន្តហោះទាំងបីគ្រឿងបានមកដល់នៅថ្ងៃសុក្រ ហើយត្រូវបានឈរជើងនៅមូលដ្ឋានទ័ពអាកាស Roesmin Nurjadin ក្នុងទីក្រុង Pekanbaru ដែលមានទីតាំងនៅលើកោះស៊ូម៉ាត្រាភាគខាងលិច។ លោកថា ពួកវានឹងត្រៀមប្រើប្រាស់ដោយកងទ័ពអាកាសឥណ្ឌូណេស៊ី ។

ឥណ្ឌូណេស៊ី ដែលជាអតិថិជនឧបករណ៍យោធាដ៏សំខាន់របស់បារាំងនៅអាស៊ីអាគ្នេយ៍ បានបញ្ជាទិញយន្តហោះចម្បាំង Rafales រហូតដល់ ៤២គ្រឿង ដែលផលិតដោយក្រុមហ៊ុន Dassault Aviation ក៏ដូចជាយន្តហោះចម្បាំង និងនាវាមុជទឹករបស់បារាំង ។

ក្រោមការដឹកនាំរបស់លោកប្រធានាធិបតី Prabowo Subianto ឥណ្ឌូណេស៊ីបានបង្កើនការចំណាយយ៉ាងច្រើនសម្បើមលើវិស័យការពារជាតិ ខណៈដែលប្រទេសដីកោះនៅអាស៊ីមួយនេះ កំពុងស្វះស្វែងធ្វើទំនើបកម្មកងយន្តហោះចម្បាំងរបស់ខ្លួន ដើម្បីពង្រឹងអំណាចផ្លូវអាកាស ។

តួយ៉ាង ក្រៅពីយន្តហោះចម្បាំងបារាំង ឥណ្ឌូណេស៊ីក៏កំពុងពិចារណាលើជម្រើសបញ្ជាទិញយន្តហោះចម្បាំង J-10 របស់ប្រទេសចិន យន្តហោះចម្បាំង F-15EX ផលិតនៅសហរដ្ឋអាមេរិក និងចុះកុងត្រាទិញយន្តហោះចម្បាំង KAAN ចំនួន ៤៨ គ្រឿងពីប្រទេសតួកគីផងដែរ ៕

ប្រភព ៖ Economic Times ប្រែសម្រួល ៖ ឈឹម ទីណា