ភ្នំពេញ៖ឯកឧត្តម ឧបនាយករដ្ឋមន្ត្រី នេត សាវឿន បានជំរុញឱ្យ ក្រសួងបរិស្ថានត្រូវពង្រឹងការអនុវត្តច្បាប់ឱ្យបាន ១០០ភាគរយ លើការងារត្រួតពិនិត្យការបំពុលទឹក ដី និងខ្យល់ ឱ្យបានគ្រប់ ជ្រុងជ្រោយ និងធ្វើទំនើបកម្មប្រព័ន្ធវិនិច្ឆ័យការបំពុល ដើម្បីធានា​សុក្រឹតកម្មបរិស្ថានកិច្ច ។

ក្រៅពីការជំរុញឱ្យក្រសួងបរិស្ថានត្រូវពង្រឹងការអនុវត្តច្បាប់លើការងារត្រួតពិនិត្យការបំពុលទឹក ដី និងខ្យល់ពិសេស ឯកឧត្តម ឧបនាយករដ្ឋមន្រ្តី ក៏បានជំរុញដល់ក្រសួងបរិស្ថានផងដែរឱ្យយកចិត្ត ទុកដាក់អនុវត្តច្បាប់លើក្រុមហ៊ុន ដែលបង្ហូរទឹក​កខ្វក់ ដោយមិន បាន ធ្វើប្រព្រឹត្តកម្មជាមុន ចូលទៅក្នុងប្រភពទឹកសាធារណៈ និងរៀបចំចុះ អនុស្សរណៈយោគយល់ជា​មួយ​ក្រសួង ពាណិជ្ជកម្ម ដើម្បីចាត់វិធាន ការតឹងរ៉ឹង ទៅលើក្រុមហ៊ុនល្មើសទាំងនោះ ឱ្យអនុវត្តច្បាប់ ដើម្បីជា ការស្មើភាពគ្នាជាមួយ​ក្រុមហ៊ុន ដទៃទៀត ដែលគោរពច្បាប់។

ក្នុងឋានៈតំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងពិធីបិទ​សន្និបាតបូកសរុបលទ្ធផល​ការងារ​ក្រសួងបរិស្ថានឆ្នាំ២០២៥ ឯកឧត្តមឧបនាយករដ្ឋមន្ត្រី នេត្រ សាវឿន ក៏បានជំរុញឱ្យកែទម្រង់កិច្ចដំណើរការ និងបទដ្ឋានវាយ​តម្លៃហេតុ ប៉ះពាល់បរិស្ថាន ដើម្បីផ្តល់ភាពងាយស្រួលដល់ការវាយ តម្លៃ សម្រាប់ម្ចាស់គម្រោង និងក្រុមហ៊ុនវាយតម្លៃ ផងដេរ។

រដ្ឋបាលថ្នាក់ក្រោមជាតិត្រូវមានភាពម្ចាស់ការដោយបន្តកិច្ចសហការយ៉ាងជិតស្និទជាមួយក្រសួងបរិស្ថាន រួមមាន ការអនុវត្តមុខងា​រ គ្រប់គ្រងសំរាម សំណល់រឹង ទឹកកខ្វក់ទីប្រជុំជន និងពង្រឹងសេវាគ្រប់ គ្រងសំរាមសំណល់រឹងទីប្រជុំជន ឱ្យមានប្រសិទ្ធភាព និងអនុលោម​តាមស្តង់ដា។នេះបើតាមឯកឧត្តម នេត្រ សាវឿន បញ្ជាក់។

បើតាម ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថានបាន ឱ្យដឹងថា ក្នុងពេញ១ឆ្នាំ២០២៥ បានទប់ស្កាត់ការបញ្ចេញទឹក​កខ្វក់ ពីក្រុមហ៊ុន រោងចក្រនិងសហគ្រាសនានានៅកម្ពុជា មិនឱ្យមាន ការបំពុលដល់តំបន់ទឹកសាធារណៈ ប៉ះពាល់ដល់ការ​រស់នៅ​របស់ប្រជាពលរដ្ឋនិងបរិស្ថាន នៅកម្ពុជាបានប្រមាណជាង២០ លានម៉ែត្រគូប។ ក្រសួងបរិស្ថានបានតាមដាន ត្រួតពិនិត្យ ការបញ្ចេញសំណល់រាវ ពីក្រុមហ៊ុននិងរោងចក្រ ចូលតំបន់ទឹក សាធារណៈ អនុលោមតាមស្តង់ដារ បានប្រមាណ២លាន ម៉ែត្រគូបក្នុងមួយខែៗ៕

អត្ថបទ៖ង៉ាន់ ទិត្យ
រូបភាព៖ រិន រចនា