មុននឹងចាកចេញពីកម្ពុជាក្រោយបញ្ចប់បេសកកម្មជាឯអគ្គរដ្ឋទូតសិង្ហបុរី លោកជំទាវ Teo Lay Cheng បានចូលជម្រាបលាសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី កាលពីព្រឹកថ្ងៃទី៤ ខែមីនា ឆ្នាំ២០២៦ នៅវិមានសាមគ្គីភាព នៃព្រឹទ្ធសភា។

នេះជាលើកទី៣ហើយក្នុងអាណត្តិ ៥ឆ្នាំរបស់លោកជំទាវជាឯកអគ្គរដ្ឋទូតសិង្ហបុរីប្រចាំនៅកម្ពុជា ដែលលោកជំទាវបានចូលជួបសម្ដែងការគួរសមជាមួយសម្ដេចតេជោ ជាពិសេសបានទទួលការបំពាក់មេដាយកិត្តិយសពីសម្តេចតេជោនាពេលនេះ។

យោងតាមឯកឧត្តម ជា ធីរិទ្ធ អ្នកនាំពាក្យព្រឹទ្ធសភា លោកជំទាវឯកអគ្គរដ្ឋទូតសិង្ហបុរី បានអរគុណសម្ដេចតេជោ ចំពោះការបំពាក់គ្រឿងឥស្សរិយយសព្រះរាជាណាចក្រកម្ពុជា ហើយលោកជំទាវបានពោលថា រាល់ពេលជួបសម្ដេចតេជោ លោកជំទាវតែងតែបានរៀនសូត្រ និងបានស្ដាប់បទពិសោធន៍ដ៏កម្ររបស់សម្ដេច ដែលជួយបង្កើនពុទ្ធិយ៉ាងច្រើនផងដែរ ។

សម្ដេចតេជោ ហ៊ុន សែន បានសម្ដែងការពេញចិត្តចំពោះការខិតខំប្រឹងប្រែងរបស់លោកជំទាវ ក្នុងការពូនជ្រុំទំនាក់ទំនងកម្ពុជា និងសិង្ហបុរី ។ សម្ដេចតេជោ បានលើកឡើងពីទំហំពាណិជ្ជកម្មទ្វេភាគី ដែលមានការកើនឡើងដល់ជាង ៥ពាន់លានដុល្លារ ហើយសម្ដេចសង្ឃឹមថា រដ្ឋាភិបាលនៃប្រទេសទាំងពីរ នឹងខិតខំប្រឹងប្រែង និងដាក់គោលដៅបន្តទៀត ធ្វើយ៉ាងណាសម្រេចឱ្យបាន ១០ពាន់លានដុល្លារនៅឆ្នាំបន្តបន្ទាប់។

សម្ដេចតេជោ បានចាត់ទុកថា ទំនាក់ទំនងនយោបាយ ការទូត ពាណិជ្ជកម្ម សេដ្ឋកិច្ច និងការវិនិយោគ គឺជារឿងដ៏ចាំបាច់ក្នុងការរុញច្រានទំនាក់ទំនងរវាងកម្ពុជា និងសិង្ហបុរី ឲ្យមានភាពល្អប្រសើរ។

នៅក្នុងឱកាសនោះ សម្ដេចតេជោបានចែករំលែកនូវបទពិសោធន៍ ក៏ដូចជាដំណើរដើមទងនៃការតស៊ូរំដោះប្រទេសជាតិ ជាពិសេសការស្វែងរកសន្តិភាព និងការអភិវឌ្ឍរបស់កម្ពុជា និងបានលើកឡើងផងដែរពីស្ថានការណ៍ព្រំដែន កម្ពុជា-ថៃ នៅពេលបច្ចុប្បន្ន ព្រមទាំងបញ្ហាប្រឈមដ៏ស្មុគស្មាញរបស់ពិភពលោក ។

លោកជំទាវឯកអគ្គរដ្ឋទូតសិង្ហបុរី បានអរគុណចំពោះសម្ដេចតេជោ ដែលបានចែករំលែកមេរៀន ជាទស្សនៈទានល្អៗ។ លោកជំទាវបានកោតសរសើការរីកចម្រើនរបស់កម្ពុជា និងកត្តាសុខសន្តិភាព ហើយលោកជំទាវក៏មានអនុស្សាវរីយ៍ជាច្រើននៅក្នុងប្រទេសកម្ពុជា ដែលលោកជំទាវចាត់ទុកថាជាប្រទេសដ៏អស្ចារ្យ៕

ដោយ៖ វណ្ណលុក