វ៉ាស៊ីងតោន ឌីស៊ី៖ លោកប្រធានាធិបតីអាមេរិក Jo Biden បានប្រាប់ដល់ប្រទេសអ៊ីរ៉ង់ឱ្យមានការប្រុងប្រយ័ត្ន ហើយបានជំរុញប្រទេសអ៊ីស្រាអែល ឱ្យអនុវត្តដំណើរការ ដោយ «ច្បាប់នៃសង្គ្រាម»។

ប្រធានាធិបតីអាមេរិក លោក Joe Biden បានថ្លែងសុន្ទរកថា នៅក្នុងកិច្ចប្រជុំតុមូល ជាមួយមេដឹកនាំសហគមន៍ជ្វីហ្វ នៅសេតវិមាន កាលពីថ្ងៃពុធ សប្តាហ៍នេះ ដោយព្រមានប្រទេសអ៊ីរ៉ង់ ឱ្យ «ប្រុងប្រយ័ត្ន» នៅពេលដែលភាពតានតឹង បានកើនឡើង នៅមជ្ឈិមបូព៌ា ជុំវិញសង្គ្រាមរវាងអ៊ីស្រាអែល ជាមួយក្រុមហាម៉ាស់ ពោលគឺបន្ទាប់ពីមានការវាយប្រហាររបស់ក្រុមសកម្មប្រយុទ្ធប៉ាឡេស្ទីន ទៅលើអ៊ីស្រាអែល។

លោកប្រធានាធិបតីអាមេរិករូបនេះនិយាយថា លោកថែមទាំងបានប្រាប់ដល់នាយករដ្ឋមន្ត្រីអ៊ីស្រាអែល លោក Benjamin Netanyahu ថា «វាពិតជាសំខាន់ណាស់ ដែលអ៊ីស្រាអែល ជាមួយនឹងកំហឹង និងការខកចិត្តទាំងអស់ … ដែលតម្រូវឲ្យអ៊ីស្រាអែលគួរតែប្រតិបត្តិការឆ្លើយតប តាមច្បាប់នៃសង្រ្គាម»។

ការប្រាប់របស់ប្រធានាធិបតីអាមេរិកបែបនេះ បានធ្វើឡើង ក្រោយរយៈពេលប្រាំថ្ងៃ នៃការវាយប្រហារដ៏គួរឱ្យភ្ញាក់ផ្អើលរបស់ក្រុមសកម្មប្រយុទ្ធប៉ាឡេស្ទីន ដែលកងកម្លាំងអ៊ីស្រាអែលបាននិយាយថា មនុស្សជាង ១២០០ នាក់ត្រូវបានសម្លាប់ អំឡុងការវាយប្រហារនេះ។

រីឯ មន្ត្រីនៅតំបន់ហ្គាហ្សាបានរាយការណ៍ថា មនុស្សជាង ១០០០ នាក់ត្រូវបានសម្លាប់ នៅក្នុងការវាយប្រហារតាមអាកាស និងកាំភ្លើងធំរបស់អ៊ីស្រាអែល តបតទៅវិញ ក្នុងរយៈពេលប៉ុន្មានថ្ងៃថ្មីៗនេះ៕ ប្រភពពី AFP ប្រែសម្រួល៖ សារ៉ាត