នាយករដ្ឋមន្ត្រីថៃ កំពុងបំពេញទស្សនកិច្ចផ្លូវការនៅសិង្ហបុរី
សិង្ហបុរី៖ នាយករដ្ឋមន្រ្តីថៃ លោក សេដ្ឋា ថាវីស៊ីន (Srettha Thavisin) នឹងធ្វើទស្សនកិច្ចផ្លូវការនៅប្រទេសសិង្ហបុរីនៅថ្ងៃព្រហស្បតិ៍នេះ តបតាមការអញ្ជើញរបស់នាយករដ្ឋមន្រ្តី លី សៀនឡុង (Lee Hsien Loong) នេះបើយោងតាមក្រសួងការបរទេសថៃ (MFA) បានលើកឡើងកាលពីថ្ងៃពុធម្សិលមិញ។
នេះគឺជាដំណើរទស្សនកិច្ចជាផ្លូវការលើកដំបូងរបស់លោក សេដ្ឋា ទៅកាន់ប្រទេសសិង្ហបុរី។ ក្រសួងការបរទេសថៃបានលើកឡើងនៅក្នុងសេចក្តីថ្លែងការណ៍មួយថា «នៅថ្ងៃទី១២ ខែតុលា ឆ្នាំ២០២៣ នាយករដ្ឋមន្ត្រី សេដ្ឋា នឹងត្រូវបានទទួលស្វាគមន៍ និងជួបជាមួយប្រធានាធិបតី ថាម៉ាន សានមូហ្ការ៉ាតណាម (Tharman Shanmugaratnam) នៅការិយាល័យអ៊ីស្ដានា (Istana)»។
ក្រសួងការបរទេសថៃបន្តថា «នាយករដ្ឋមន្ត្រីថៃ សេដ្ឋា នឹងជួបនាយករដ្ឋមន្ត្រីសិង្ហបុរី លោក លី ដែលនឹងរៀបចំអាហារថ្ងៃត្រង់ជូនគាត់ផងដែរ»។ ក្រសួងការបរទេសថៃបានបន្ថែមថា លោក ស្រេតថា ក៏នឹងទៅទស្សនកិច្ចនៅផ្សារហ៊ុនសិង្ហបុរី អមដោយមន្ត្រីជាន់ខ្ពស់ជាច្រើនរូបផងដែរ។
លោក សេដ្ឋា អតីតមហាសេដ្ឋីអចលនទ្រព្យមួយរូប បានក្លាយជានាយករដ្ឋមន្ត្រីរបស់ប្រទេសថៃនៅថ្ងៃទី២២ ខែសីហា បន្ទាប់ពីការបោះឆ្នោតនៅសភា។ ការណ៍នេះបានដោះស្រាយបញ្ហាជាប់គាំងនយោបាយជាច្រើនខែរបស់ប្រទេសថៃ បន្ទាប់ពីការបោះឆ្នោតសកលកាលពីខែឧសភា។
នៅក្នុងលិខិតអបអរសាទរដែលផ្ញើជូនលោក សេដ្ឋា លោក លី បានលើកឡើងថា «សិង្ហបុរី និងថៃមានទំនាក់ទំនងយ៉ាងជិតស្និទ្ធ រួមទាំងទំនាក់ទំនងសេដ្ឋកិច្ចរឹងមាំ ទំនាក់ទំនងស្ថាប័ន និងការផ្លាស់ប្តូរនយោបាយ ក៏ដូចជាប្រជាជននិងប្រជាជនយ៉ាងកក់ក្ដៅ»។
លោក លី បានកត់សម្គាល់ថា ប្រទេសទាំងពីរមានកិច្ចសហប្រតិបត្តិការយូរអង្វែង និងស៊ីជម្រៅលើវិស័យជាច្រើន រួមមានវិស័យពាណិជ្ជកម្ម និងការវិនិយោគ វិស័យការពារជាតិ និងវិស័យអប់រំជាដើម។
គួរដឹងដែរថា សិង្ហបុរី និងថៃបានបង្កើតទំនាក់ទំនងការទូតជាផ្លូវការនៅឆ្នាំ១៩៦៥ ហើយប្រទេសទាំងពីរបានចាប់ផ្តើមទំនាក់ទំនងសេដ្ឋកិច្ច ដោយបានចុះកិច្ចព្រមព្រៀងទ្វេភាគីស្ដីពី «ការបង្កើនទំនាក់ទំនងសេដ្ឋកិច្ច សិង្ហបុរី-ថៃ» ឬហៅកាត់ថា STEER ក្នុងឆ្នាំ២០០២។
ក្នុងឆ្នាំ២០២២ សិង្ហបុរីគឺជាដៃគូពាណិជ្ជកម្មធំទី៨ របស់ប្រទេសថៃ ខណៈប្រទេសថៃស្ថិតក្នុងលំដាប់ទី៩ របស់សិង្ហបុរី។ ពាណិជ្ជកម្មទ្វេភាគីរវាងប្រទេសទាំងពីរមានទំហំជាទឹកប្រាក់រហូតដល់ទៅជាង ៤២ ប៊ីលានដុល្លារសិង្ហបុរី ស្មើនឹងជាង ៣០ ប៊ីលានដុល្លារអាមេរិក កាលពីឆ្នាំមុន ពោលគឺកើនឡើង ២៣,៤ ភាគរយធៀបនឹងឆ្នាំមុន។
យោងតាមក្រុមប្រឹក្សាវិនិយោគរបស់ប្រទេសថៃ សិង្ហបុរីក៏បានក្លាយជាប្រភពនៃការវិនិយោគផ្ទាល់ពីបរទេសធំជាងគេទី២ របស់ប្រទេសថៃនៅក្នុងឆមាសទីមួយនៃឆ្នាំនេះ ដែលស្មើនឹង ១៩ ភាគរយនៃតម្លៃវិនិយោគពីបរទេសទាំងអស់នៅក្នុងព្រះរាជាណាចក្រថៃ៕
ប្រែសម្រួលដោយ៖ ធា សុណា
ប្រភពព័ត៌មាន៖ Channel NewsAsia
Thai PM Srettha to make official visit to Singapore
