អ្នកវិភាគ៖ វិបត្តិអ៊ីស្រាអែល-ប៉ាឡេស្ទីន នឹងបន្តអូសបន្លាយ តែពិភពលោករួមទាំងកម្ពុជាគួរជំរុញភាគីទាំងពីរចូលតុចរចា
ភ្នំពេញ៖អ្នកតាមដានភូមិសាស្រ្តនយោបាយ និងកិច្ចការអន្តរជាតិលើកឡើងថា វិបត្តិអ៊ីស្រាអែល-ប៉ាឡេស្ទីន នឹងបន្តអូសបន្លាយយូរតទៅទៀត ខណៈវាជាទំនាស់ប្រវត្តិសាស្រ្ត ដែលនឹងអាចជះឥទ្ធិពលតិច ឬច្រើនដល់ពិភពលោក។ ទោះជាយ៉ាងណា អ្នកតាមដានទាំងនេះ យល់ថាពិភពលោករួមទាំងកម្ពុជា គួរជំរុញឱ្យភាគីទាំងពីរចូលតុចរចា។
សូមជម្រាបថា កាលពីថ្ងៃទី៧ ខែតុលា ឆ្នាំ២០២៣ កន្លងទៅថ្មីៗនេះ ក្រុមហាម៉ាស់របស់ប៉ាឡេស្ទីនបានវាយប្រហារទ្រង់ទ្រាយធំមកលើអ៊ីស្រាអែលដែលបង្កឱ្យមានការស្លាប់ និងរបួសជាច្រើននាក់រហូតរដ្ឋាភិបាលអ៊ីស្រាអែលប្រកាសដាក់ប្រទេសក្នុងស្ថានភាពអាសន្ន ហើយប្រកាសសង្គ្រាមជាផ្លូវការជាមួយក្រុមហាម៉ាស់វិញ រហូតមានការវាយប្រហារបកត្រឡប់ទៅវិញផងដែរ។
បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាលើកឡើងថា ការវាយប្រហារគ្នារវាងក្រុមសកម្មប្រយុទ្ធហាម៉ាស់ និងកងទ័ពអ៊ីស្រាអែល ដែលចេញពីវិបត្តិអ៊ីស្រាអែល-ប៉ាឡេស្ទីន ជាទំនាស់ប្រវត្តិសាស្រ្ត ដោយសារស្មារតីជាតិនិយមរៀងខ្លួន ជាពិសេសបញ្ហាទឹកដី។ លោកថា ទំនាស់នេះនឹងអូសបន្លាយពេលយូរតទៅទៀត។
ត្រង់បញ្ហានេះ លោកស្នើឱ្យពិភពលោករួមទាំងកម្ពុជាជំរុញដល់ភាគីទាំងសងខាងប្រកាន់យកដំណោះស្រាយដោយសន្តិវិធីតាមរយៈយន្តការការទូតពោល គឺចូលតុចរចា ចៀសវាងប្រកាន់ជំហយកសង្គ្រាមទៅបញ្ចប់សង្គ្រាមដែលអាចបង្កវិនាសកម្មធ្ងន់ធ្ងរជាពិសេសប្រជាពលរដ្ឋស្លូតត្រង់។
លោកបានសង្កត់ធ្ងន់ថា ៖ «ការប្រយុទ្ធគ្នារវាងក្រុមហាម៉ាស់ និងអ៊ីស្រាអែល នេះនឹងជះឥទ្ធិពលដល់ខ្សែច្រវាក់ផ្គត់ផ្គង់ផលិតកម្ម ដែលអាចកើតមានជាវិបត្តិស្បៀង វិបត្តិថាមពល បន្តទៅទៀត ហើយអាចទាញពិភពលោកទៅកាន់សង្គ្រាមមួយថ្មីទៀត អាចជាសង្គ្រាមសាសនា ព្រោះយើងឃើញចរន្តតាមប្រទេសធំៗ មានការគាំទ្រក្រុមហាម៉ាស់ច្រើនដែរ»។
លោកបានបន្ថែមថា បើសិនជាវិបត្តិនេះនៅបន្តអូសបន្លាយ វានឹងអាចរាលដាលជាចលនាទំនាស់រវាងក្រុមប្រទេស និងក្រុមប្រទេស ឬអាចលាយឡំនឹងទំនាស់រវាងមហាអំណាចផង ដែលនឹងជះឥទ្ធិពលអាក្រក់ដល់សណ្តាប់ធ្នាប់ពិភពលោក ។វិបត្តិនេះជាបញ្ហារ៉ាំរ៉ៃដែលអូសបន្លាយពេលជាងមួយសតវត្សរ៍មកហើយ ខណៈយន្តការចរចាក៏ហាក់នៅជើងមេឃនៅឡើយ។
ដោយឡែក លោក សេង វណ្ណលី សាស្រ្តាចារ្យផ្នែកទំនាក់ទំនងអន្តរជាតិបានបញ្ជាក់ប្រាប់ដែរថា ក្រុមហាម៉ាស់ ត្រូវបានអ៊ីស្រាអែល និងបស្ចឹមលោកចាត់ទុកជាក្រុមភេរវករ ប៉ុន្តែក្រុមនេះមានឥទ្ធិពលក្នុងនយោបាយសង្គមប៉ាឡេស្ទីន ។លោកថា ជម្លោះនេះអាចមានច្រកដោះស្រាយមិនសូវស្មុគស្មាញ ដោយសារជាសង្គ្រាមរវាងរដ្ឋមួយ និងក្រុមភេរវករ។
លោកបន្តថា ៖ «លើកនេះការប៉ះទង្គិចរវាងក្រុមហាម៉ាស់ និងអ៊ីស្រាអែលហាក់ចេញជាទ្រង់ទ្រាយធំ ខណៈអ៊ីស្រាអែលឆ្លើយតបទៅកាន់ខាងហាម៉ាស់វិញរាងធ្ងន់ធ្ងរ ប៉ុន្តែវាអាចជាចេតនារបស់រដ្ឋាភិបាលអ៊ីស្រាអែល ដើម្បីឱ្យហាម៉ាស់ក្រោធខ្លាំង ហើយឈានទៅដល់ការបើកប្រយុទ្ធដើម្បីកម្ទេចក្រុមហាម៉ាស់ឱ្យចេញពីឆាកនយោបាយប៉ាឡេស្ទីន»។
ទោះជាយ៉ាងណា លោក សេង វណ្ណលី ថា វិបត្តិនេះអាចរាលដាលធំ បើសិនជាក្រុមភាគីផ្សេងៗរបស់ប៉ាឡេស្ទីន ក៏ដូចជាប្រទេសផ្សេងៗតួយ៉ាងក្រុមប្រទេសអារ៉ាប់ ក្រុមសហគមន៍ប្រទេសមូស្លីមគាំទ្រសកម្មភាពរបស់ហាម៉ាស់ ដែលអាចចេញពីសង្គ្រាមរវាងរដ្ឋ និងក្រុមភេរវករ ទៅជាសង្គ្រាមធំមួយវិញ ពោលគឺសង្គ្រាមតួអង្គ(Proxy War)។
លោកថា ពិភពលោក រួមទាំងកម្ពុជាគួរជំរុញឱ្យកិច្ចចរចាណាមួយរវាងរដ្ឋាភិបាលអ៊ីស្រាអែល ជាមួយក្រុមហាម៉ាស់ ក្នុងក្របខណ្ឌអង្គការសហប្រជាជាតិ ដើម្បីបង្ការកុំឱ្យទំនាស់នេះរាលដាលកាន់តែខ្លាំង ដែលអាចគំរាមកំហែងដល់សន្តិសុខ និងស្ថិរភាពតំបន់ និងពិភពលោក ខណៈបើសិនភាគីទាំងពីរ បន្តវាយប្រហារគ្នាដោយអាវុធធុនធ្ងន់។
សម្រាប់លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់សិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី (AVI) វិញ លើកឡើងថា វិបត្តិអ៊ីស្រាអែល-ប៉ាឡេស្ទីន ជាវិបត្តិពីឬសគល់ប្រវត្តិសាស្រ្ត មនោគមវិទ្យានយោបាយ សាសនា និងភូមិសាស្ត្រយុទ្ធសាស្រ្ត។
ក្រុមហាម៉ាស់ជាក្រុមផ្តាច់ខ្លួនក្នុងទឹកដីប៉ាឡេស្ទីនដែលមិនពេញចិត្តនឹងដំណោះស្រាយរបស់រដ្ឋាភិបាលកណ្តាលប៉ាឡេស្ទីនជុំវិញបញ្ហាបែងចែកទឹកដីរវាងអ៊ីស្រាអែល និងប៉ាឡេស្ទីន។
លោកថា ៖ «មានយន្តការ និងគំនិតផ្តួចផ្តើមជាច្រើនពីអង្គការតំបន់ និងសហគមន៍អន្តរជាតិក្នុងការដោះស្រាយបញ្ហាដ៏ចម្រូងចម្រាស់នេះ ហើយមហាអំណាចទាំងអស់ ពុំមានការប្តេជ្ញាចិត្តខ្ពស់ក្នុងការដោះស្រាយឡើយ ដោយសារកត្តាប្រយោជន៍យុទ្ធសាស្រ្ត និងសេដ្ឋកិច្ចរបស់ពួកគេ»។
លោក ថុង ម៉េងដាវិត ជឿជាក់ថា វិបត្តិនេះនឹងបន្តអូសបន្លាយពេល ហើយការសម្លាប់ និងអំពើភេរវកម្មនឹងនៅបន្តមាននៅលើទឹកដីអ៊ីស្រាអែល និងប៉ាឡេស្ទីន៕ ដោយ៖ សំបាន ច័ន្ទដារ៉ា