សម្ព័ន្ធអារ៉ាប់ថ្កោលទោស ការដាក់ទណ្ឌកម្មរបស់អ៊ីស្រាអែល លើហ្គាហ្សា
គែរ៖ សម្ព័ន្ធប្រទេសអារ៉ាប់បានរួមគ្នាថ្កោលទោស «ការដាក់ទណ្ឌកម្មរួម» របស់អ៊ីស្រាអែល ចំពោះតំបន់ហ្គាហ្សា ហើយទាមទារឲ្យមានច្រកចូលសម្រាប់ជំនួយភ្លាមៗ។
បណ្តារដ្ឋមន្ត្រីការបរទេសអារ៉ាប់បានថ្កោលទោសការឡោមព័ទ្ធរបស់អ៊ីស្រាអែល នៅតំបន់ហ្គាហ្សា បន្ទាប់ពីការវាយប្រហារដ៏តក់ស្លុតរបស់ពួកសកម្មប្រយុទ្ធប៉ាឡេស្ទីន ទៅលើអ៊ីស្រាអែល ដោយទាមទារថា «ជំនួយ» ត្រូវតែអនុញ្ញាតឱ្យ «ភ្លាមៗ» ចូលទៅក្នុងតំបន់ ដែលត្រូវបានរារាំង ដោយអ៊ីស្រាអែលនោះ។
ថ្លែងក្នុងកិច្ចប្រជុំសម្ព័ន្ធប្រទេសអារ៉ាប់ នាទីក្រុងគៀវ ប្រទេសអេហ្ស៊ីប កាលពីថ្ងៃពុធ សប្តាហ៍នេះ អគ្គលេខាធិការសម្ព័ន្ធអារ៉ាប់ លោក Ahmed Aboul Gheit មានប្រសាសន៍ថា «ការដាក់ទណ្ឌកម្មរួម ដែលអាជ្ញាធរទាំងនេះ អនុវត្តប្រឆាំង នឹងអ្នកស្រុក Gaza ត្រូវបានច្រានចោល និងថ្កោលទោស នៅក្នុងច្បាប់អន្តរជាតិ» ។
ថ្មីៗនេះ រដ្ឋមន្ត្រីការពារជាតិអ៊ីស្រាអែលបានប្រកាស “ការឡោមព័ទ្ធទាំងស្រុង” នៃតំបន់ហ្គាហ្សា ដោយនិយាយថា លោកនឹងបញ្ឈប់លំហូរនៃការផ្គត់ផ្គង់សំខាន់ៗ ទៅកាន់តំបន់ប៉ាឡេស្ទីន ដូចជា ការកាត់ទឹក កាត់ភ្លើង កាត់ផ្តាច់អាហារ ដល់ប្រជាជនស៊ីវិល។
គួររម្លឹកថា ការវាយប្រហារដ៏គួរឱ្យភ្ញាក់ផ្អើលរបស់ក្រុមសកម្មប្រយុទ្ធហាម៉ាស់ ទៅលើអ៊ីស្រាលអែល កាលពីថ្ងៃសៅរ៍ ចុងសប្តាហ៍ បានធ្វើឱ្យមនុស្សសរុបចំនួន ១២០០ នាក់ត្រូវបានសម្លាប់។ ជាការតបតវិញ អ៊ីស្រាអែលបានវាយប្រហារតាមអាកាស និងបាញ់កាំភ្លើងធំ ស្លាប់មនុស្សជាង ១០០០នាក់ នៅតំបន់ហ្គាហ្សា ដែលជាគេដឹងថា ជាតំបន់របស់ពួកហាម៉ាស់៕
ប្រភពពី AFP ប្រែសម្រួល៖ សារ៉ាត