តៃវ៉ាន់បង្កើតក្រុមការងារ ដើម្បីសិក្សាពីសង្គ្រាមអ៊ីស្រាអែល និងហាម៉ាស
តៃប៉ិ៖រដ្ឋមន្ត្រីក្រសួងការពារជាតិតៃវ៉ាន់ លោក Chiu Kuo-cheng បាននិយាយនៅថ្ងៃព្រហស្បតិ៍នេះថា តៃវ៉ាន់បានបង្កើតក្រុមការងារមួយ ដើម្បីទាញមេរៀនពីការវាយប្រហារដ៏គួរឱ្យភ្ញាក់ផ្អើលដោយក្រុមហាម៉ាសរបស់ប៉ាឡេស្ទីនទៅលើប្រទេសអ៊ីស្រាអែល។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ការទាញយកមេរៀននេះ ត្រូវបានគេមើលឃើញថា ជាប្រយោជន៍សំខាន់ ខណៈតៃវ៉ាន់ដែលចិនទាមទារថាជាទឹកដីរបស់ខ្លួន ស្ថិតនៅក្រោមសម្ពាធកាន់តែខ្លាំងឡើងៗផ្នែកយោធា និងនយោបាយពីទីក្រុងប៉េកាំង រួមទាំងការធ្វើយមយុទ្ធយោធាទ្រង់ទ្រាយធំជុំវិញកោះ និងវោហាសាស្រ្តនយោបាយ។
ទោះបីជាមានភាពខុសប្លែកគ្នាខ្លាំងរវាងការគំរាមកំហែងដែលតៃវ៉ាន់ប្រឈមមុខពីប្រទេសចិន និងអ្វីដែលកំពុងកើតឡើងរវាងអ៊ីស្រាអែល និងក្រុមហាម៉ាសក៏ដោយ ជម្លោះនៅមជ្ឈិមបូព៌ានាពេលនេះបានធ្វើឱ្យមានការផ្តោតការយកចិត្តទុកដាក់លើលទ្ធភាពនៃការវាយប្រហាររបស់ចិន។
លោក Chiu បានថ្លែងនៅសភាតៃវ៉ាន់នៅពេលឆ្លើយសំណួរទៅកាន់អ្នកកាសែតថា៖ «មេរៀនដំបូង គឺថា ការងារស៊ើបការណ៍សម្ងាត់មានសារៈសំខាន់ណាស់។ ជាមួយនឹងព័ត៌មានសម្ងាត់ យើងអាចចេញវិធានការណ៍តបតជាច្រើន ហើយអាចជៀសវាងសង្គ្រាមមួយបាន»។
លោកបាននិយាយថា ការប្រយុទ្ធគ្នារវាងអ៊ីស្រាអែល និងក្រុមហាម៉ាស បានបង្ហាញពីភាពរន្ធត់នៃសង្រ្គាម ហើយបើយោធាធ្វើការដើម្បីបង្កើនការត្រៀមខ្លួនប្រយុទ្ធ វានឹងមិនមានជម្លោះនោះទេ។ លោកបន្តថា៖ «វាជាការរំពឹងទុករួមរបស់អ្នករាល់គ្នា ក្នុងការបញ្ចៀសសង្គ្រាម»។
គួរគូសបញ្ជាក់ថា រដ្ឋាភិបាលតៃវ៉ាន់បានថ្កោលទោសការវាយប្រហាររបស់ក្រុមហាម៉ាស់ ដោយលោកស្រីប្រធានាធិបតី ត្សៃ អ៊ីង-វីន បាននិយាយថា៖ «តៃវ៉ាន់នៅតែប្តេជ្ញាធ្វើការជាមួយប្រទេសដែលមានគំនិតដូចគ្នា ដើម្បីប្រយុទ្ធប្រឆាំងនឹងការគំរាមកំហែង និងអំពើហិង្សា និងដើម្បីការពារសេរីភាព និងលទ្ធិប្រជាធិបតេយ្យ»។
នៅខែមករាខាងមុខ តៃវ៉ាន់នឹងរៀបចំការបោះឆ្នោតប្រធានាធិបតី និងសភា ដោយគណបក្សប្រឆាំងដ៏សំខាន់របស់កោះ គឺគណបក្ស គួមីងតាង(Kuomintang ,KMT) បានចាត់ទុកព្រឹត្តិការណ៍នេះជាជម្រើសរវាងសង្គ្រាម និងសន្តិភាព។ បក្ស KMT បានចោទប្រកាន់គណបក្សវឌ្ឍនភាពប្រជាធិបតេយ្យ (DPP) របស់លោកស្រី អ៊ីង-វីន ដែលកំពុងកាន់អំណាចថា បានធ្វើឱ្យកោះតៃវ៉ាន់ជិតធ្លាក់ទៅក្នុងសង្រ្គាម ដោយចេតនាបង្ករឿងដល់ប្រទេសចិន ជាអ្វីដែលបក្ស DPP បដិសេធយ៉ាងដាច់អហង្ការ។
កាលពីថ្ងៃអាទិត្យកន្លងទៅ ប្រធានបក្ស KMT ដែលគេមើលឃើញថា ជាបក្សជិតស្និទ្ធនឹងក្រុងប៉េកាំង លោក អេរិច ជូ(Eric Chu) បាននិយាយថា អ្វីដែលបានកើតឡើងនៅក្នុងប្រទេសអ៊ីស្រាអែលនាពេលនេះ បានធ្វើឱ្យមនុស្សគ្រប់គ្នាមានអារម្មណ៍ថា រងការគំរាមកំហែងដោយសង្រ្គាម។ លោក ជូ បានបន្តថា៖ «យើងជឿថាសន្តិភាពនៅទូទាំងច្រកសមុទ្រតៃវ៉ាន់ គឺជាអ្វីដែលមនុស្សគ្រប់គ្នារំពឹងទុក។ គ្មានជនជាតិតៃវ៉ាន់ណាម្នាក់ ចង់ឃើញសង្រ្គាមនោះទេ»៕
ប្រែសម្រួល៖ ហួន ឌីណា