កម្ពុជា ធ្វើព្យុហយាត្រាលើកទី២ ដើម្បីឆ្ពោះទៅបញ្ឈប់អំពើជួញដូរមនុស្ស
សៀមរាបៈស្ថាប័នរដ្ឋ អង្គការ និងប្រជាពលរដ្ឋជាច្រើនរយនាក់ បានធ្វើកម្មវិធីព្យុហយាត្រានៅខេត្តសៀមរាប ដើម្បីឆ្ពោះទៅបញ្ឈប់អំពើជួញដូរមនុស្ស ដែលកម្មវិធីនេះជាការរំឭកដល់សារធារណជនគ្រប់និន្នាការទាំងអស់ឱ្យមានការប្រុងប្រយ័ត្ន ពីព្រោះឧក្រិដ្ឋជននៃការជួញដូរមនុស្សមាននៅគ្រប់ទីកន្លែង។
លោកជំទាវ ជូ ប៊ុនអេង អនុប្រធានអចិន្ត្រៃយ៍គណៈកម្មាធិការប្រយុទ្ធប្រឆាំងអំពើជួញដូរមនុស្ស (គ.ជ.ប.ជ.) បានឱ្យដឹងតាមរយៈទំព័រហ្វេសប៊ុកនៅថ្ងៃទី១១ ខែតុលាថា គោលបំណងនៃការធ្វើព្យុហយាត្រានេះ គឺដើម្បីចូលរួមយុទ្ធនាការសកល ដើម្បីក្រើងរំឭកដល់សារធារណជន កុំឱ្យភ្លេចខ្លួនថា ឧក្រិដ្ឋជន គឺនៅគ្រប់ទីកន្លែង មនុស្សគ្រប់វ័យ គ្រប់ប្រភេទ គ្រប់សាសនា គ្រប់និន្នាការ គឺសុទ្ធតែអាចក្លាយជាជនរងគ្រោះដោយអំពើជួញដូរមនុស្សនិងអំពើកេងប្រវ័ញ្ចដទៃទៀត ។កម្មវិធីព្យុហយាត្រានេះ វាក៏ជាការបង្ហាញអំពីឆន្ទៈមុះមុតរបស់រាជរដ្ឋាភិបាលកម្ពុជា និងប្រជាពលរដ្ឋគ្រប់រូបក្នុងការរួមគ្នា បង្ការ បង្រ្កាប ផ្តន្ទាទោស និងសង្រ្គោះអំពើជួញដូរមនុស្ស។
លោកជំទាវថ្លែងថា៖ «យើងសង្ឃឹមថា ការបា្ររព្ធកម្មវិធីព្យុហយាត្រាឆ្ពោះទៅបញ្ឈប់អំពើជួញដូរមនុស្សនេះ នឹងជួយបំផុសកិច្ចចូលរួមក្នុងការអនុវត្តច្បាប់ ស្តីអំពីការជួញដូរមនុស្ស ការធ្វើអាជីវកម្មផ្លូវភេទលើ ស្រ្តីនិងកុមារឱ្យកាន់តែផុសផុលបន្ថែមទៀត»។
ដោយឡែក លោកស្រី យូ សុភា អភិបាលរងខេត្តសៀមរាប បានឱ្យដឹងដែរថា ខេត្តសៀមរាប ជាប៉ូលទេសចរណ៍មួយដ៏សំខាន់ ដែលមានប្រាសាទអង្គរវត្ត ជាសម្បត្តិបេតិកភណ្ឌពិភពលោក និងមានតំបន់ទេសភាពធម្មជាតិអេកូទេសចរណ៍ជាច្រើនកន្លែងផ្សេងទៀតសម្រាប់ភ្ញៀវទេសចរទស្សនាកម្សាន្ត។ លោកស្រីបន្តថា ទន្ទឹមនឹងផលវិជ្ជមានពីសេវាកម្មទេសចរណ៍ ខេត្តសៀមរាបក៏ទទួលបានផលអវិជ្ជមានពីបណ្ដាអ្នកទេសចរណ៍មួយចំនួនផងដែរ។
លោកស្រីបញ្ជាក់ថា៖ «យើងបានទទួលរងផលជាអវិជ្ជមានពីអ្នកទេសចរណ៍មួយចំនួន ដែលមានបំណងទុច្ចរិតបានប្រព្រឹត្តបទល្មើសរំលោភបំពាន ការកេងប្រវ័ញ្ចផ្លូវភេទទៅលើកុមារ តាមរូបភាពផ្សេងៗ និងការយកខេត្តសៀមរាប ជាខេត្តសម្រាប់ឆ្លងកាត់ការនាំចេញមនុស្សដោយខុសច្បាប់ និងកន្លែងសម្រាប់ប្រព្រឹត្តបទល្មើសផងដែរ»។
សូមបញ្ជាក់ថា កម្មវិធីព្យុហយាត្រាឆ្ពោះទៅបញ្ឈប់អំពើជួញដូរមនុស្សលើកទី២ ឆ្នាំ២០២៣នេះ បានរៀបចំឡើងដោយគណៈកម្មាធិការប្រយុទ្ធប្រឆាំងអំពើជួញដូរមនុស្ស សហការជាមួយ អង្គការមូលនិធិ អេ២១ និងរដ្ឋបាលខេត្តសៀមរាប ដែលមានការចូលរួមពីមន្ត្រីរាជការ កងកម្លាំងនគរបាល កងរាជអាវុធហត្ថ លោកគ្រូ-អ្នកគ្រូ សិស្សានុសិស្ស យុវជនកាយរិទ្ធ យុវជនកាកបាទក្រហម បុគ្គលិកអង្គការសមាគម ព្រមទាំងភ្ញៀវជាតិ និងអន្តរជាតិ សរុបប្រមាណ ៦០០នាក់៕
ដោយ៖ ជា សុខនី
