បង្ហាញពីលទ្ធផលបឋមក្រោយពីការធ្វើកំណាយស្រាវជ្រាវបុរាណវិទ្យា នៅទីតាំងរបស់មនុស្សរស់នៅកាលពីសម័យបុរាណ ក្នុងរាជធានីកោះកេរ
ភ្នំពេញ៖ តាមរយៈកិច្ចសហប្រតិបត្តិការរវាងអាជ្ញាធរជាតិព្រះវិហារ ជាមួយនឹងវិទ្យាស្ថាន Max Planck Institute for Geo- anthropology ទីក្រុង Jena ប្រទេសអាល្លឺម៉ង់បានធ្វើកំណាយសិក្សាស្រាវជ្រាវចាប់ពីថ្ងៃទី៧ ខែកក្កដា រហូតដល់ថ្ងៃទី២២ ខែកក្កដា ឆ្នាំ២០២៤ និង បានរៀបចំបទបង្ហាញ អំពីលទ្ធផលបឋមកំណាយស្រាវជ្រាវបុរាណវិទ្យា និងវិធីសាស្រ្តវិភាគ អំពីទីតាំង មនុស្សរស់នៅបុរាណ ក្នុងរាជធានីកោះកេរ ដែលមានទីតាំងនៅចន្លោះប្រាសាទធំ និងអណ្តូងព្រេង។
ក្រសួងវប្បធម៌បានឱ្យដឹងនៅយប់ថ្ងៃទី ២៤ ខែកក្កដា ឆ្នាំ ២០២៤ថា ការរៀបចំបទបង្ហាញនេះធ្វើឡើងនៅសាលប្រជុំអាជ្ញាធរជាតិព្រះវិហារ ប្រចាំរមណីយដ្ឋានប្រាសាទកោះកេរ ក្នុងនេះគេឃើញមានការសម្របសម្រួលពីសំណាក់ឯកឧត្តម ភិន សំណាង ប្រធាននាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ និងមានការចូលរួមធ្វើបទបង្ហាញដោយលោក ថូ ថុន អនុប្រធាននាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ លោកបណ្ឌិត William Christopher Carleton និងលោកបណ្ឌិត David John Brotherson មកពីវិទ្យាស្ថាន Max Planck Institute for Geo- anthropology ទីក្រុង Jena ប្រទេសអាល្លឺម៉ង់ សមាសភាពចូលរួមសរុប២០រូប។
ប្រភពដដែលនេះបានបញ្ជាក់ដែរថាការរៀបចំបទបង្ហាញនេះមានគោលបំណង ដើម្បីចែករំលែកចំណេះដឹងជូនដល់ថ្នាក់ដឹកនាំនាយកដ្ឋាន និងមន្រ្តីជំនាញ អាជ្ញាធរជាតិព្រះវិហារយល់ដឹងបន្ថែមអំពីការសិក្សាស្រាវជ្រាវផ្នែកបុរាណវិទ្យា វិធីសាស្រ្តវិភាគលើទីតាំងមនុស្សរស់នៅ និងបរិស្ថានវិទ្យាសម័យបុរាណ តាមរយៈវត្ថុសិល្បៈ(កុលាលភាជន៍…) សំណាកធ្បូង លម្អងផ្កា និងសណាកដីដែលយកទៅវិភាគក្នុងមន្ទីរពិសោធន៍ដើម្បីដឹងអំពីអាយុកាល ប្រភេទសត្វ និងរុក្ខជាតិ៕
ដោយ៖ម៉ាដេប៉ូ
![](https://asset.ams.com.kh/central/media/2024/07/photo_2024-07-25_08-55-56-1024x768.jpg)
![](https://asset.ams.com.kh/central/media/2024/07/photo_2024-07-25_08-55-54-1024x768.jpg)
![](https://asset.ams.com.kh/central/media/2024/07/photo_2024-07-25_08-55-51-1024x576.jpg)
![](https://asset.ams.com.kh/central/media/2024/07/photo_2024-07-25_08-55-42-1024x576.jpg)
![](https://asset.ams.com.kh/central/media/2024/07/photo_2024-07-25_08-55-38-725x1024.jpg)
![](https://asset.ams.com.kh/central/media/2024/07/photo_2024-07-25_08-55-37-1024x618.jpg)
![](https://asset.ams.com.kh/central/media/2024/07/photo_2024-07-25_08-55-35-1024x768.jpg)
![](https://asset.ams.com.kh/central/media/2024/07/photo_2024-07-25_08-55-34-1024x651.jpg)
![](https://asset.ams.com.kh/central/media/2024/07/photo_2024-07-25_08-55-32-1024x576.jpg)
![](https://asset.ams.com.kh/central/media/2024/07/photo_2024-07-25_08-55-31-1024x595.jpg)