ភ្នំពេញ៖ ព្រឹត្តិការណ៍ប្រកួតកីឡាគុនចម្រុះខ្មែរបុរាណដែលប្រសិទ្ធនាមថា ពាន រង្វាន់ សម្ដេចធិបតី លើកទី១នឹងប្រព្រឹត្តទៅនាខែ តុលា ឆ្នាំ២០២៤ ។ នេះបើយោង​តាម ការបញ្ជាក់ពីឯកឧត្តម វ៉ាត់ ចំរើន រដ្ឋលេខាធិការក្រសួងអប់រំយុវជន និងកីឡា ក្នុង​កិច្ច​ប្រជុំ នារសៀលថ្ងៃទី០១ ខែ សីហា ឆ្នាំ២០២៤ ក្រោម វត្តមាន ឯកឧត្តម បណ្ឌិត ទេសរដ្ឋមន្រ្តីថោង ខុន ប្រធានគណៈកម្មាធិការជាតិអូឡាំពិកម្ពុជា។

ឯកឧត្តម វ៉ាត់ ចំរើន បានគូសបញ្ជាក់ថា ដែលគ្រោងរៀបចំនៅអំឡុង ខែ តុលា ឆ្នាំ២០២៤ខាងមុខនេះទទួលបានកាគាំទ្រដ៏ខ្ពង់ខ្ពស់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម រដ្ឋលេខាធិការ អះអាងថា ព្រឹត្តិការណ៍ប្រកួតនេះ មានសមាស​ភាព​សហព័ន្ធ​​​​កីឡា​ប្រយុទ្ធចំនួន៤ គឺចូលរួម គឺ សហព័ន្ធកីឡាប្រដាល់គុនខ្មែរ, សហព័ន្ធកីឡាយុទ្ធគុនចម្រុះ, សហព័ន្ធកីឡាគុនល្បុក្កតោ និងសហព័ន្ធ​កីឡា​យុទ្ធក្រមខម. ជាសហព័ន្ធគោលដែលនឹងរួមចំណែកព្រឹត្តិការណ៍នេះ​ឱ្យកើត​មានឡើង ។ ប៉ុន្តែសម្រាប់លក្ខន្តិកៈនឹងត្រូវបានបញ្ជ្រាបក្នុងវគ្គបណ្ដុះ​បណ្ដាលដោយផ្ដោតលើគោលជារួម មិនមែនផ្ដោតតែលើលក្ខន្តិកៈ​សហព័ន្ធណាមួយនោះទេ។

ឯកឧត្តម បានបញ្ជាក់ទៀតថា សម្រាប់ការប្រកួតវិញ ចែកចេញជាពីរ មានប្រយុទ្ធ និង សម្ដែង។ ក្នុងនោះ ប្រភេទប្រយុទ្ធមានអ្នកអាជីព និងស្ម័គ្រចិត្ត។ សម្រាប់ការប្រកួតសម្ដែងវិញ គឺ បើកចំហរអាយុពីចន្លោះ១៨ដល់ឆ្នាំដល់៦៥ឆ្នាំ។

ឯកឧត្តម វ៉ាត់ ចំរើន បានចាត់ទុក ព្រឹត្តិការណ៍កីឡាយុទ្ធគុនចម្រុះខ្មែរបុរាណ ពានរង្វាន់ សម្ដេចធិបតី លើកទី១នេះ ជាឱកាសដ៏សំខាន់ ដើម្បីលើកទឹក​ចិត្ត​ដល់ចាស់ព្រឹទ្ធាចារ្យ បានរំឭកក្បាច់គុនខ្មែរឡើងវិញ ពិសេសក្បាច់គុនខ្មែរ​ជាច្រើនទៀតដែលមហាជនមិនបានដឹង។សូមលើកទឹកចិត្តដល់ចាស់​ព្រឹទ្ធាចារ្យចូលរួមចុះឈ្មោះប្រកួតឱ្យបានច្រើន ដើម្បីលើកស្ទួយ និងអភិរក្សក្បាច់គុនខ្មែរ។

ដោយឡែកសម្រាប់ ការប្រកួតក្បាច់ប្រយុទ្ធមាន៧ប្រភេទទម្ងន់សម្រាប់កីឡាករ និង ៥ប្រភេទសម្រាប់កីឡាការិនី ខណៈសម្ដែងវិញមាន ឯកត្តជន ដូចជា ថ្វាយបង្គំគ្រូ, មេគុនដៃ, មេគុនអាវុធឥតមុខ និងមានគុនអាវុធមានមុខ។ សម្ដែងជាក្រុម មានមេ​គុនដៃ (៣​នាក់ ស្រី១នាក់), មេគុនអាវុធឥតមុខ (៣នាក់ ស្រី០១) និង មេគុនអាវុធ​មានមុខ (៣នាក់ ស្រី០១នាក់)។ សម្ដែងសមយុទ្ធ មានមេគុនដៃ (៥នាក់ ស្រី១នាក់) និងមេគុនអាវុធគ្រប់ប្រភេទ (៥នាក់ស្រី១នាក់) ៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ