ម្ចាស់កសិដ្ឋានចិញ្ចឹមគោ ប្រាប់ថា គោប្រាម៉ាន់ផ្តល់ចំណូលខ្ពស់
កំពង់ធំ៖ លោក អន ចំរ៉ើន ប្រធានបច្ចេកទេសទីផ្សារតំបន់កំពង់ធំនៅថ្ងៃទី១ ខែកញ្ញា ឆ្នាំ២០២៤បានដឹកនាំក្រុមភ្នាក់ងារ សត្វភូមិនិងយុវជន ដែលជាសិក្ខាកាមទៅអនុវត្តជាក់ស្ដែងនៅកសិដ្ឋានចិញ្ចឹមគោប្រាម៉ាន់ ស្ថិតនៅសង្កាត់ដំរីជាន់ខ្លា ក្រុង ស្ទឹងសែនខេត្តកំពង់ធំបន្ទាប់ពីទទួលបានបណ្ដុះបណ្ដាលលើផ្នែកទ្រឹស្តីរយៈពេលមួយថ្ងៃរួចមក។នៅទីនោះសិក្ខាកាមបានជ្រួតជ្រាប បន្ថែមលើការបង្កាត់ពូជគោប្រាម៉ាន់សិប្បនិម្មិត។
លោក តឹប ម៉េងលឹម ម្ចាស់កសិដ្ឋានចិញ្ចឹមគោប្រាម៉ាន់ស្ថិតនៅភូមិពោធិ៍ក បានអធិប្បាយថាកន្លងមកលោកចិញ្ចឹមពូជគោក្នុង
ស្រុកធម្មតារយៈពេល១០ឆ្នាំមកហើយ ។ការចិញ្ចឹមគោក្នុងស្រុក លទ្ធផលពុំសូវមានការរីកចម្រើនទេដោយសារតម្លៃទីផ្សារ កាន់តែទាប។ដូច្នេះលោកបានទៅរៀនសូត្រតាមរយៈអង្គការដៃគូផ្សេងៗ ពិសេសគឺ ក្រុមហ៊ុន អេសវី រេញ អ៉ីនវេសម៉ិន ខេមបូឌាំ (SV Ranch Investment Cambodia)ដែលបានបង្រៀនពីបច្ចេកទេសក្នុងការបង្កាត់ពូជគោប្រាម៉ាន់ដល់ពួកគាត់។
លោកបន្តទៀតថាតាមរយៈនៃការសិក្សានិងការចិញ្ចឹមពូជគោប្រាម៉ាន់បានធ្វើឱ្យគ្រួសារលោកមានជីវភាពភាពល្អប្រសើរថែមទៀត។លោកថាគ្រួសារលោកបានទទួលចំណូលច្រើនដោយការចិញ្ចឹមគោបែបបច្ចេកទេសដែលជាតម្រូវទីផ្សារនិងមានតម្លៃខ្ពស់។គោប្រាម៉ាន់មានទម្ងន់ធ្ងន់ជាងគោធម្មតា។ការចិញ្ចឹមគោក្នុងស្រុកប្រើរយៈពេលដូចគ្នាប៉ុន្តែផលចំណេញគឺចិញ្ចឹមគោសិប្បនិម្មិតប្រាម៉ាន់នេះផ្ដល់អត្ថប្រយោជន៍ជាច្រើន។
តាមរយៈសិក្ខាកាម លោកបានបញ្ជូនជាសារដល់ប្រជាពលរដ្ឋថា ការចិញ្ចឹមគោប្រាម៉ាន់ផ្តល់នូវចំណូលច្រើន ព្រោះតម្រូវ ទីផ្សារត្រូវការសាច់ស្រស់មានគុណភាព។ ចំណែកឯតម្លៃវិញក៏មានតម្លៃថ្លៃនិងរកប្រាក់ចំណូលបានងាយស្រួលព្រមទាំង ចំណេញពេលវេលា។
លោក អន ចំរ៉ើន បានបញ្ជាក់ពីគោលដៅសំខាន់ៗទាក់ទងនឹងការបង្កាត់ពូជគោប្រាម៉ាន់ដែលធានាបានទាំងបរិមាណនិង គុណភាព។លោកថាសិក្ខាកាមនឹងពង្រឹងសមត្ថភាពកសិករខ្នាតតូចឱ្យមានជំនាញចិញ្ចឹមគោប្រាម៉ាន់តាមបែបវិទ្យាសាស្រ្តទំនើប។ទទួលបានចំណេះដឹងលើការអភិវឌ្ឍសហគ្រាសផលិតចំណីគោតាមស្តង់ដាអន្តរជាតិ។អភិវឌ្ឍសហគ្រាសផលិតសាច់គោស្រស់និងប្រកបទៅដោយអនាម័យនិងគុណភាព។ពង្រឹងភាពជាដៃគូជាមួយក្រសួងស្ថាប័នពាក់ព័ន្ធព្រមទាំងវិស័យឯកជនដើម្បី ជំរុញចិញ្ចឹមពូជគោប្រាម៉ាន់នៅកម្ពុជា៕
ដោយ៖ប៊ុនរដ្ឋា
