ក្រឡាប់រថយន្តចូលប្រឡាយ៖ មនុស្សបួននាក់ស្លាប់និងម្នាក់របួសធ្ងន់
ត្រាំកក់៖ មនុស្សបួននាក់បានបាត់បង់ជីវិត និងម្នាក់របួសធ្ងន់ ក្នុងគ្រោះថ្នាក់ចរាចរណ៍ក្រឡាប់រថយន្តបង្កដោយខ្លួនឯង ធ្លាក់ចូលប្រឡាយទឹក កាលពីយប់ថ្ងៃសៅរ៍ទី៣១ ខែសីហា ឆ្នាំ២០២៤ នៅផ្លូវជាតិលេខ១៣២ ចន្លោះគីឡូម៉ែត្រលេខ ៣-៤ ស្ថិតក្នុងភូមិមហាសេនា ឃុំតាភេម ស្រុកត្រាំកក់ ខេត្តតាកែវ ។
សមត្ថកិច្ចបញ្ជាក់ថា រថយន្តក្រឡាប់ខ្លួនឯងម៉ាកតូយ៉ូតា ព្រូស ពណ៌ខៀវ ពាក់ស្លាកលេខ ភ្នំពេញ 2BF-0867បើកបរដោយ ឈ្មោះ នុត នាក់ចាន់ណា ភេទប្រុស អាយុ៣២ឆ្នាំ រស់នៅភូមិប្រវង់ ឃុំតាភេម ស្រុកត្រាំកក់ ខេត្តតាកែវ មុខរបរកសិករ បានស្លាប់នៅកន្លែងកើតហេតុ។ រថយន្តមានអ្នករួមដំណើរចំនួនបួននាក់៖ ទី១ឈ្មោះ ស៊ន សៀងលី ភេទស្រី អាយុ៨ឆ្នាំ ស្លាប់នៅនឹងកន្លែង, ទី២ ឈ្មោះ គង់ ថៃ ភេទប្រុស អាយុ១៩ឆ្នាំ ស្លាប់នៅនឹងកន្លែង ។ទាំងពីរនាក់រស់នៅភូមិប្រវង់ ឃុំតាភេម ស្រុកត្រាំកក់ ។ ទី៣ ឈ្មោះ ប្រាក់ វីរៈ ភេទប្រុស អាយុ៣៤ឆ្នាំ ស្លាប់នៅមន្ទីរពេទ្យ រស់នៅភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ និងទី៤ ឈ្មោះ ស៊ន លីមីង ភេទប្រុស អាយុ៤ ឆ្នាំ រងរបួសធ្ងន់ រស់នៅភូមិប្រវង់ ឃុំតាភេម ស្រុកត្រាំកក់ ។
រថយន្តបើកបរមកពីទិសខាងលិចទៅកើត។លុះមកដល់ចំណុចកើតហេតុបានរេចង្កូតធ្លាក់ពីផ្លូវទៅបុកជាមួយក្បាលលូក្រឡាប់ចូលទឹកប្រឡាយទឹកជាប់ផ្លូវ។
សមត្ថកិច្ចបញ្ជាក់ថា មូលហេតុបណ្តាលមកពីការបើកបរក្នុងល្បឿនលឿនខ្វះការប្រុងប្រយ័ត្ន៕
ដោយ៖សាំង សារ៉ាវី
