បន្ទាប់ពីទឹកស្រកនិងទទួលបានគ្រាប់ពូជពីរាជរដ្ឋាភិបាល កសិករខេត្តក្រចេះ សម្រុកស្តារដំណាំស្រូវឡើងវិញ
ក្រចេះ៖ ប្រជាកសិករដែលរងផលប៉ះពាល់ពីរបបទឹកទន្លេមេគង្គ និងការជោរជន់លិចដោយសាររបបទឹកភ្លៀង នាពេលថ្មីៗកន្លងមកនេះបានរូតរះស្តារដំណាំស្រូវឡើងវិញ បន្ទាប់ទឹកស្រក និងទទួលបានគ្រាប់ពូជពីរាជរដ្ឋាភិបាល តាមរយៈអាជ្ញាធរខេត្តក្រចេះ។
របាយការណ៍មន្ទីរកសិកម្ម រុក្ខាប្រមាញ់ និងនេសាទខេត្តក្រចេះនៅថ្ងៃទី ១៥ ខែតុលា ឆ្នាំ២០២៤ បានឱ្យដឹងថា គិតត្រឹមថ្ងៃទី១៤ ខែតុលា ប្រជាកសិករបានធ្វើការស្ដារឡើងវិញនូវដំណាំស្រូវបានចំនួន ៥១ ភាគរយនៃចំនួន ៦ ០៥៧ គ្រួសារ ដែលទទួលបានគ្រាប់ពូជស្រូវពីរាជរដ្ឋាភិបាល។
មន្ទីរកសិកម្មបន្តថា ផ្ទៃដីដែលត្រូវធ្វើការស្ដារឡើងវិញ នៅក្នុងខេត្តក្រចេះមានចំនួន ៥ ៨៧២ ហិកតា ។ពេលនេះការស្ដារឡើងវិញបានចំនួន ៤៩ ភាគរយនៃផ្ទៃដីដែលត្រូវស្ដារនិងផ្ទៃដីដែលមិនទាន់បានស្ដារឡើងវិញដោយសារទឹកមិនទាន់ស្រកផុត។
របាយការណ៍ដដែលបានបញ្ជាក់ថា កសិករដែលទទួលបានគ្រាប់ពូជស្រូវពីរាជរដ្ឋាភិបាល ដើម្បីស្ដារឡើងវិញនៅខេត្តក្រចេះមាន
ចំនួន៦ ០៥៧គ្រួសារ ក្នុងនេះមាន ក្រុងក្រចេះចំនួន ១៨៣ គ្រួសារ ,ស្រុកឆ្លូងចំនួន ១ ៣២៥ គ្រួសារ ,ស្រុកព្រែកប្រសព្វចំនួន ២ ០៨៨ គ្រួសារ ,ស្រុកចិត្របុរីចំនួន ២ ៣៦៩ គ្រួសារ និងស្រុកសំបូរចំនួន ៩២ គ្រួសារ៕
ដោយ៖ឡុង សំបូរ
