សម្ដេចតេជោ ហ៊ុន សែន ស្នើក្រសួងធម្មការ ក៏ដូចជាពិធីការ រៀបចំឡើងវិញនូវអាសនៈក្រមសង្ឃ
(ភ្នំពេញ)៖ ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងបរទេស លើកទី៣២ នៅវិទ្យាស្ថានគរុកោសល្យ និងវិក្រឹត្យការ រាជធានីភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៤ នៅវិទ្យាស្ថានជាតិអប់រំ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានស្នើឱ្យក្រសួងធម្មការ និងសាសនា ក៏ដូចជាពិធីការ រៀបចំឡើងវិញនូវអាសនៈក្រមសង្ឃ ដោយសារការរៀបចំពិធីការសព្វថ្ងៃនេះ កំពុងរៀបចំពិធីការទៅតាមគោរពងារ មិនមែនរៀបចំពិធីការតាមតួនាទីនោះទេ ដែលនេះមិនត្រូវទាល់តែសោះ ។
សម្ដេចតេជោ ហ៊ុន សែន បានបន្ថែមថា សព្វថ្ងៃនេះ សម្តេចមើលឃើញថា អាសនៈក្រមសង្ឃ ពេលខ្លះ គឺបានឱ្យព្រះអនុគណ នៅមុខព្រះមេគណ គឺមិនត្រូវទាល់តែសោះ ។ សម្តេច ថា នៅពេលដែលសម្តេច ចូលទៅក្នុងព្រះបរមរាជវាំង បានសង្គេតឃើញសម្ដេចព្រះធម្មលិខិតបណ្ឌិត សៅរ៏ ចន្ទថុល អង្គុយពីខាងលើសម្តេចព្រះពុទ្ធជ័យមុនីបណ្ឌិត ឃឹម សន ព្រះប្រធានលេខាធិការដ្ឋានគណៈសង្ឃនាយក និងព្រះមេគណរាជធានីភ្នំពេញ ដែលការរៀបចំដូចនេះ គឺមិនត្រឹមត្រូវនោះទេ។
សម្ដេចតេជោ ក៏បានស្នើឱ្យស្នើក្រសួងធម្មការ និងសាសនា ពិនិត្យពីបញ្ហាអាសនៈក្រមសង្ឃនេះឡើងវិញ ដោយរៀបចំឱ្យបានត្រឹមត្រូវ និងរៀបចំតាមតួនាទី និងមែនគ្រាន់តែទទួលបានគោរពងារខ្ពស់ ហើយការរៀបចំអាសនៈ ត្រូវតែនៅខាងមុខនោះទេ ។
ជាមួយគ្នានោះសម្ដេចតេជោ ប្រធានព្រឹទ្ធសភា បានបញ្ជាក់ថា រឿងអាសនៈក្រមសង្ឃនេះ ត្រូវតែរៀបចំដូរឡើងវិញ ហើយរឿងនេះ ជារឿងរបស់ក្រសួងធម្មការ និងសាសនា និងក្រុមពិធីការ ត្រូវចាត់ចែងរៀបចំផ្លាស់ប្តូរ ហើយការរៀបចំកន្លងមក គឺខុសរឿងហើយ ដូចនេះសូមកែរតម្រូវឡើងវិញ ។
ឆ្លៀតក្នុងឱមកាសនេះ សម្តេចតេជោ ហ៊ុន សែន បានស្នើឱ្យតាមវត្តអារាម ធ្វើការបណ្ដុះបណ្ដាលអាចារ្យ ដែលមានស្រាប់នៅក្នុងវត្តនោះ ហើយសូមកុំរង់ចាំ តែការបណ្ដុះបណ្ដាលពីក្រសួងធម្មការ និងសាសនា ។
សម្ដេច ថា តម្រូវការអាចារ្យកាន់តែច្រើន ហើយឥឡូវពេលនេះ ម៉ោងនេះ សំឡេងភ្លេង មិនដឹងភូមិណាប៉ុន្មានទេ ។ ស្រុកខ្មែរយើង គេហាមមិនឱ្យការ ពេលចូលវស្សា ពេលចេញវស្សាហើយ គេការហើយ ហើយពេលការហ្នឹង តម្រូវការអាចារ្យ ដោយត្រូវការអាចារ្យការ អាចារ្យខ្មោច អាចារ្យសូត្រមន្ត ធ្វើបុណ្យសង្ឃទាន គឺត្រូវការអាចារ្យច្រើនណាស់ ។
សម្ដេចបានថ្លែងគូសបញ្ជាក់ថា ព្រះសង្ឃកាន់តែច្រើន តម្រូវការអាចារ្យកាន់តែច្រើន ចឹងសូមឱ្យតាមវត្តអារាមនីមួយៗ ក៏បណ្ដុះបណ្ដាលអាចារ្យក្នុងវត្តស្រាប់ អ៊ីចឹងទេ ព្រះតេជគុណតាមវត្តនីមួយៗ គួរតែត្រូវបានបណ្ដុះបណ្ដាលអាចារ្យ ដើម្បីជំនួសអាចារ្យចាស់ ដែលគាត់មិនអាចធ្វើការទៅបាន យើងមានអាចារ្យថ្មី មកជំនួស ដោយមិនរង់ចាំបំពេញតែពីអាចារ្យ ដែលបណ្ដុះបណ្ដាលដោយក្រសួងធម្មការ និងសាសនាទេ នៅតាមទីវត្តអារាមនីមួយៗ អាចទទួលបានការបណ្ដុះបណ្ដាលសម្រាប់អាចារ្យ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
