ចិនចាប់ផ្តើមនាំចូលអង្ករពីឥណ្ឌាជាលើកដំបូង ស្របពេលការផ្គត់ផ្គង់មិនគ្រប់គ្រាន់ និងឥណ្ឌាបញ្ចុះតម្លៃច្រើន
ចិន៖ មន្ត្រីឧស្សាហកម្មស្រូវអង្ករឥណ្ឌានិយាយថា ចិនចាប់ផ្តើមនាំចូលអង្ករពីឥណ្ឌាជាលើកដំបូងក្នុងរយៈពេលយ៉ាងតិច៣ទសវត្សរ៍មកនេះ ដោយសារតែការផ្គត់ផ្គង់មិនគ្រប់គ្រាន់ និងឥណ្ឌាបញ្ចុះថ្លៃច្រើន ស្របពេលមានការរឹតបន្តឹងការផ្គត់ផ្គង់ពីថៃ មីយ៉ាន់ម៉ា និងវៀតណាម នេះបើតាមសារព័ត៌មានបាងកកប៉ុស្តិ៍នៅថ្ងៃទី០២ ខែធ្នូ ឆ្នាំ២០២០ ។
មន្ត្រីឧស្សាហកម្មស្រូវអង្ករឥណ្ឌាបន្ថែមថា ក្រុមឈ្មួញឥណ្ឌាបានចុះកិច្ចសន្យានាំអង្ករបាក់ចំនួន១សែនតោន នៅចន្លោះខែធ្នូ ឆ្នាំនេះ និងខែកុម្ភៈឆ្នាំក្រោយ ក្នុងតំលៃ៣០០ដុល្លារក្នុង១តោន ។ ឥណ្ឌាជាប្រទេសនាំចេញអង្ករធំបំផុតក្នុងលោក ហើយចិនក៏ជាអ្នកនាំចូលធំបំផុតផងដែរ ។ រដ្ឋាភិបាលចិននាំចូលអង្ករប្រមាណ៤លានតោនក្នុងមួយឆ្នាំៗ តែជៀសវាងទិញវាពីឥណ្ឌាអស់រាប់សិបឆ្នាំមកហើយ ដោយសំអាងលើបញ្ហាគុណភាព ។
បើតាមមន្រ្តីឧស្សាហកម្មស្រូវអង្ករឥណ្ឌា ប្រទេសផ្គត់ផ្គង់អង្ករជាប្រពៃណីដល់ចិន ក្នុងនោះរួមមាន៖ ថៃ វៀតណាម មីយ៉ាន់ម៉ា និងប៉ាគីស្ថាន មានបរិមាណផ្គត់ផ្គង់លើសសម្រាប់ការនាំចេញ ចំនែកឯតម្លៃខ្ពស់ជាងអង្ករឥណ្ឌាប្រមាណ៣០ដុល្លារក្នុងមួយតោន ៕