អ្នកប្រយុទ្ធគុនខ្មែរទម្ងន់ស្រាលលំដាប់កំពូលនៅកម្ពុជា កីឡាករ ខាំ ខ្លានាង នៅថ្ងៃទី១៧ ខែ មករា ឆ្នាំ២០២១ខាងមុខនេះ នឹងត្រូវជួបតតាំងជាមួយកីឡាករជើងខ្លាំងទម្ងន់ស្រាល សែន រ៉ាដេត ក្នុងជំនួបទី២ លើប្រភេទទម្ងន់៥១គីឡូក្រាម នៅសង្វៀនទូរទស្សន៍ក្នុងស្រុកមួយ។ផ្តល់បទសម្ភាសន៌ ប្រាប់អ្នកយកព័ត៌មានទូរទស្សន៍អប្សរា នាកន្លែងហ្វឹកហាត់ក្លិប​ប្រដាល់រហាត់​ស្វាយ​ប៉ាក កាលពីថ្ងៃម្សិលមិញ ខាំ ខ្លានាងថា ជំនួបប៉ះអ្នកប្រដាល់ជើងខ្លាំង សែន រ៉ាដេត រូបគេ​បាន​ត្រៀម​ខ្លួនរួចរាល់ហើយ ទាំងកម្លាំង និងបច្ចេកទេសសម្រាប់ប្រយុទ្ធ​តតាំងដណ្តើមយក​ជ័យជំនះ​ជា​លើក​ទី២។ អ្នកប្រយុទ្ធទម្ងន់រ៉ុយ អះអាងទៀតថា ជំនួបប៉ះគ្នាជាលើកទី២នេះ រូបគេមិនមានការព្រួយ​បារម្មណ៍​ឬភ័យខ្លាច សែន រ៉ាដេតឡើយ។ប៉ុន្តែគេក៍មិនមើលងាយសមត្ថភាព សែន រ៉ាដេតដែរ ដ្បិត សែន រ៉ាដេត ជាកីឡាករគុនខ្មែរមួយរូបដែលល្អ ពិសេស អត់ធ្មត់ក្នុងការប្រកួតស៊ូមិនរាថយ។ ខាំ ខ្លានាង លើកឡើងទៀតថា កីឡាករ សែន រ៉ាដេត ជាកីឡាករល្អៗជាងគេ​ដែលខ្លួន​ពិបាក​យក​ឈ្នះបំផុត ក្នុងចំណោមកីឡាករជាតិ និងអន្តរជាតិធ្លាប់ប៉ះកន្លងមក។

សូមបញ្ជាក់ថា កីឡាករគុនខ្មែរគីឡូរ៉ុយ ខាំ ខ្លានាង និង សែន រ៉ាដេត នឹងត្រូវជួប​ប្រកួតគ្នា​ជា​លើក​ទី២នៅថ្ងៃ ទី១៧ ខែ មករា ឆ្នាំ២០២១ខាងមុខនេះ ។ គួររំលឹកថា ខាំ ខ្លានាង ធ្លាប់យកឈ្នះ កីឡាករ សែន រ៉ាដេត ដោយពិន្ទុម្តងរួចមក ក្នុងជំនួបមិត្តភាព កាលពីអំឡុង ខែ តុលា ឆ្នាំ ២០២០កន្លងទៅ។ មុនយកឈ្នះ កីឡាករ សែន រ៉ាដេត ដោយពិន្ទុ ខាំ ខ្លានាង បានយកឈ្នះកីឡាករ សុខ រិទ្ធ ដោយពិន្ទុ នៅសង្វៀនឯកភ្នំ ខេត្ត ខេត្ត បាត់ដំបង៕