សហព័ន្ធកីឡាទូកក្តោងកម្ពុជា បានបញ្ចប់ការប្រកួតកីឡាទូកក្តោងជ្រើសរើសជើងឯកថ្នាក់ជាតិ ឆ្នាំ២០២០ លើប្រភេទវិញ្ញាសាចំនួន ៣ ក្រោយឆ្លងកាត់ការប្រកួតដោយស្មារតីយកចិត្តទុកដាក់ ខិតខំប្រឹងប្រែងអស់ពីសមត្ថភាព បច្ចេកទេសឈរលើស្មារតីសាមគីភាព ព្រមទាំងអនុវត្តបានតាមគោលការណ៍ដោយយុត្តិធម៌ (Fair Play) ដែលមានរយៈពេលបីថ្ងៃ ចាប់ពីថ្ងៃទី១១-១៣ ខែមករា ឆ្នាំ២០២១ នេះបើតាមការបញ្ជាក់របស់ លោក សោម សិទ្ធរិទ្ធិពង្ស អគ្គលេខាធិការសហព័ន្ធកីឡាទូកក្តោងកម្ពុជា ។

ការបិទបញ្ចប់ការប្រកួតកីឡាទូកក្តោងជ្រើសរើសជើងឯកថ្នាក់ជាតិ ឆ្នាំ២០២០ ខាងលើនេះ ធ្វើឡើងក្រោមអធិបតីភាពលោកឧត្តមនាវីត្រី ទេព សំអុល នាយសេនាធិការរងនៃមូលដ្នានកងទ័ពជើងទឹករាម និងមានការចូលរួមពីសំណាក់លោក ហេង សាយស៊ីថន អនុប្រធានមន្ទីរអប់រំ យុវជន និងកីឡា និងលោក សោម សុទ្ធរិទ្ធិពង្ស អគ្គលេខាធិការនៃសហព័ន្ធកីឡាទូកក្តោងកម្ពុជា នៅឆ្នេររាម ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ។

ជាលទ្ធផលនៃការប្រកួតកីឡាទូកក្តោងជ្រើសរើសជើងឯកថ្នាក់ជាតិ ឆ្នាំ២០២០ បានរកឃើញជយលាភីលើប្រភេទវិញ្ញាសាចំនួន ៣ ប្រភេទ៖
១៖ វិញ្ញាសា Byte Boat Open

• ចំណាត់ថ្នាក់លេខ ១ គឺបានទៅលើកីឡាករ ញ៉ូវ ចាន់
• ចំណាត់ថ្នាក់លេខ ២ គឺបានទៅលើកីឡាករ ស៊ុន ចាន់ឌឿន
• ចំណាត់ថ្នាក់លេខ ៣ គឺបានទៅលើកីឡាការិនី ទិត្យ សំសូរិយា
  ២៖ វិញ្ញាសា Laser Byt
• ចំណាត់ថ្នាក់លេខ ១ គឺបានទៅលើកីឡាករ ញ៉ូវ ចាន់
• ចំណាត់ថ្នាក់លេខ ២ គឺបានទៅលើកីឡាករ ឡុច ដារ៉ុង
• ចំណាត់ថ្នាក់លេខ ៣ គឺបានទៅលើកីឡាករ សម្បត្តិ ចនសាន់
  ៣៖ វិញ្ញាសា Windsurfing
• ចំណាត់ថ្នាក់លេខ ១ គឺបានទៅលើកីឡាករ ប៉ាល់ សិលា
• ចំណាត់ថ្នាក់លេខ ២ គឺបានទៅលើកីឡាករ កែវ ភារុណ
• ចំណាត់ថ្នាក់លេខ ៣ គឺបានទៅលើកីឡាការិនី សែម ប្រុសពៅ
  នេះគឺជាលទ្ធផលដ៏ល្អមួយរបស់សហព័ន្ធកីឡាទូកក្តោងកម្ពុជា ក្រោមការជួយគាំទ្ររបស់ក្រសួងអប់រំ យុវជន និងកីឡា ដើម្បីជំរុញ និងអភិវឌ្ឍន៍វិស័យកីឡាទូកក្តោងនៅកម្ពុជា មុនឈានទៅរកព្រឹត្តិការណ៍ប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ៕