ធនាគារឯកទេស Wing និងធនាគារឈីហ្វ ចាប់ដៃគ្នាផ្តល់ភាពងាយស្រួលក្នុងការទូទាត់ប្រាក់កម្ចីដល់ប្រជាជនកម្ពុជា
ភ្នំពេញ៖ ចំណុចសំខាន់នៃភាពជាដៃគូរវាងធនាគារឯកទេសវីង និងធនាគារពាណិជ្ជ ឈីហ្វ គឺជាការចែករំលែកចក្ខុវិស័យរួមគ្នាមួយ ក្នុងការប្រើប្រាស់សមត្ថភាពផ្នែកហិរញ្ញវត្ថុរវាងធនាគារទាំងពីរ ដើម្បីលើកកម្ពស់កម្រិតជីវភាពប្រជាជនកម្ពុជានៅទូទាំងប្រទេស ។ ការថ្លែងបែបនេះត្រូវបានលោក ម៉ានូ រ៉ាចាន់ អគ្គនាយកនៃធនាគារឯកទេស វីង ធ្វើឡើងក្នុងពិធីប្រកាសភាពជាដៃគូថ្មីមួយរវាងធនាគារឯកទេសវីង (ខេមបូឌា) លីមីតធីត ដែលផ្តល់សេវាធនាគារចល័តឈានមុខគេនៅកម្ពុជា និងធនាគារពាណិជ្ជ ឈីហ្វ (ខេមបូឌា) ម.ក នៅថ្ងៃទី២១ ខែមករា ឆ្នាំ២០២១ ដែលអនុញ្ញាតឱ្យអតិថិជនអាចសងប្រាក់កម្ចីតាមរយៈភ្នាក់ងារវីង ឬកម្មវិធីស្មាតហ្វូនវីង ។
លោក ម៉ានូ រ៉ាចាន់ បន្តថា លោកមានអារម្មណ៍រីករាយដែលបានចូលរួមជាមួយធនាគារពាណិជ្ជ ឈីហ្វ ដើម្បីបន្តបេសកកម្មក្នុងការផ្តល់ជូនអតិថិជន នូវដំណោះស្រាយដ៏ងាយស្រួល ។ នេះគឺជាព្រឹត្តិការណ៍សំខាន់ ដែលឆ្លុះបញ្ចាំងពីការប្តេជ្ញាចិត្ត ក្នុងការកែលម្អសេវាកម្មហិរញ្ញវត្ថុឌីជីថល ដើម្បីលើកកម្ពស់កម្រិតជីវភាពរស់នៅក្នុងសហគមន៍ ។ លោកអគ្គនាយកបន្ថែមថា វីងដែលជាធនាគារឯកទេសក្នុងការទូទាត់ បានខិតខំប្រឹងប្រែងអស់រយៈពេលជាង១២ឆ្នាំមកហើយ ដើម្បីសម្រេចគោលដៅក្នុងការផ្តល់ជូនប្រជាជនកម្ពុជាគ្រប់រូប នូវការទទួលបានសេវាហិរញ្ញវត្ថុចល័ត ប្រកបដោយសុវត្ថិភាពរហ័ស ដែលត្រូវបានបង្កើតឡើងក្នុងគោលបំណងលើកកំពស់ជីវភាពប្រចាំថ្ងៃរបស់ប្រជាជន ។ ការប្តេជ្ញាចិត្តរបស់វីងក្នុងការផ្តល់សិទ្ធអំណាចផ្នែកបរិយាប័ន្នហិរញ្ញវត្ថុដល់ប្រជាជនកម្ពុជា បានធ្វើឲ្យពួកគេអាចមានបណ្តាញភ្នាក់ងារវីងកាន់តែរឹងមាំ និងការអភិវឌ្ឍកាន់តែប្រសើរ នៃកម្មវិធីស្មាតហ្វូនវីង ។
ជាមួយគ្នានេះ លោកបណ្ឌិត សឿង ម៉ូរ៉ារិទ្ធ ប្រធាននាយកប្រតិបត្តិធនាគារពាណិជ្ជ ឈីហ្វ បញ្ជាក់ថា ភាពជាដៃគូនេះ ឆ្លុះបញ្ចាំងពីការប្តេជ្ញាចិត្តរបស់ធនាគារពាណិជ្ជឈីហ្វ ដើម្បីឆ្លើយតបទៅនឹងតម្រូវការហិរញ្ញវត្ថុរបស់អតិថិជនដែលកំពុងកើនឡើង ដូច្នេះអតិថិជនអាចផ្តោតលើកំណើនអាជីវកម្មរបស់ពួកគេ ។ អតិថិជនរបស់ធនាគារពាណិជ្ជ ឈីហ្វ នឹងរីករាយនូវជម្រើសថ្មី ដែលអនុញ្ញាតឱ្យពួកគេបង់ប្រាក់កម្ចីរបស់ពួកគេ ដោយមិនចាំបាច់ទៅដល់ការិយាល័យរបស់ធនាគារពាណិជ្ជឈីហ្វនោះទេ ។ ភាពជាដៃគូនេះ និងផ្តល់សេរីភាពដល់អតិថិជនរបស់ធនាគារពាណិជ្ជ ឈីហ្វ មិនថា ជានៅតំបន់ដាច់ស្រយាលប្រទេសកម្ពុជាក៏ដោយ អាចសងប្រាក់កម្ចីតាមរយៈភ្នាក់ងារ វីង ប្រកបដោយភាពងាយស្រួល រហ័ស និងមានសុវត្ថិភាព ។ អតិថិជនក៏អាចសងប្រាក់កម្ចីតាមរយៈកម្មវិធីស្មាតហ្វូនវីង ដ៏មានភាពច្នៃប្រឌិត ដោយគ្រាន់តែចុចពីរ ឬបីដងលើទូរស័ព្ទដៃតែប៉ុណ្ណោះ ។ លើសពីនេះ អតិថិជនរបស់ធនាគារពាណិជ្ជ ឈីហ្វ ក៏អាចផ្ទេរប្រាក់បានយ៉ាងងាយស្រួលតាមរយៈប្រព័ន្ធបាគង ទៅប្រព័ន្ធអេកូឡូស៊ី ហិរញ្ញវត្ថុរបស់វីងផងដែរ ៕
