ចាយលុយ២ដុល្លារ ទស្សនាមេអំបៅរាប់រយប្រភេទពី Butterfly Paradise
ស្ថិតនៅចម្ងាយប្រមាណ៥គម ពីផ្សារចាស់ក្រុងសៀមរាប សួនមេអំបៅ (Butterfly Paradise) មានទីតាំងនៅក្នុងភូមិតាគង់ សង្កាត់សំបួរ ក្រុងសៀមរាប ជាកន្លែងដ៏ពិសេសមួយដែលអាចឲ្យអ្នកនៅជិតស្និទ្ធនឹងមេអំបៅជាច្រើនប្រភេទ ព្រមទាំងរុក្ខជាតិ ជាពិសេសរុក្ខជាតិផ្កាច្រើនពណ៌ ច្រើនបែប។
ទីធ្លាដ៏ធំត្រូវបានរៀបចំ និងរចនាឡើងយ៉ាងស្រស់ស្អាតសម្រាប់ជាជម្រកដ៏កក់ក្តៅសម្រាប់សត្វមេអំបៅ ក៏ដូចជាសត្វមួយចំនួនទៀតផងដែរ រួមមានទឹកធ្លាក់ ស្រះទឹក ជាដើម។ ម្យ៉ាងវិញទៀត អ្នកនឹងឃើញមានប្រភេទផ្កាចម្រុះគ្នានៅតាមដងផ្លូវ មិនត្រឹមតែប្លែកភ្នែកទេ ថែមទាំងអាចរីករាយនឹងក្លិនផ្កាប្លែកជាប់នាសា ដែលសុទ្ធតែជាប្រភេទផ្កាដែលមានលក្ខណៈទាក់ទាញមេអំបៅតាមបែបផ្សេងៗគ្នា។
តម្លៃសំបុត្រពិសេសសម្រាប់ភ្ញៀវជាតិ ត្រឹមតែ 2$ សម្រាប់មនុស្សធំ និង1.5$ សម្រាប់ក្មេង និងបើកដំណើរការពីម៉ោង9:00ព្រឹក-4:30ល្ងាច ជារៀងរាល់ថ្ងៃ លើកលែងថ្ងៃសៅរ៍ អ្នកអាចចំណាយពេលថ្ងៃឈប់សម្រាករបស់អ្នកបានយ៉ាងរីករាយជាមួយនឹងធម្មជាតិ ហើយមិនបាច់ធ្វើដំណើរឆ្ងាយពីទីក្រុង។
ក្រៅពីដើរមើល និងថតរូបលេងជាមួយមេអំបៅ និងបុប្ផា អ្នកក៏អាចសិក្សាអំពីប្រភេទ ក៏ដូចជាជីវិត ជាពិសេសដំណើរជីវិតរបស់មេអំបៅទៅតាមប្រភេទ និងពូជផងដែរ តាមរយៈការពន្យល់ណែនាំពីអ្នកជំនាញស្រាវជ្រាវនៅទីនោះស្រាប់។
ចំណាយពេលសម្រាកដើរលេងជាមួយកូនតូចៗ ឬក្រុមមិត្តភក្តិ ឬក្រុមគ្រួសាររបស់អ្នកនៅទីនេះ ពិតជាផ្តល់នូវអារម្មណ៍មួយស្រស់ស្រាយ សប្បាយនឹងធម្មជាតិ និងសត្វស្អាតៗមានពណ៌ចម្រុះ។
ទីនេះក៏ជាកន្លែងដ៏ស្អាតមួយសម្រាប់ការថតរូប pre-wedding ផងដែរ។