ថៃរកឃើញអ្នកឆ្លង Covid-19 ថ្មីៗចំនួន១៩៨ករណី និងមានអ្នកស្លាប់ម្នាក់ទៀត នៅក្នុងរបាយការណ៍ប្រចាំថ្ងៃអាទិត្យម្សិលមិញ
ថៃ៖ អាជ្ញាធរថៃនៅថ្ងៃអាទិត្យម្សិលមិញបានរកឃើញអ្នកឆ្លង Covid-19 ថ្មីៗចំនួន១៩៨នាក់ ក្នុងនោះ១១៨នាក់ជាករណីឆ្លងនៅក្នុងស្រុក ជាហេតុនាំអោយចំនួនឆ្លងសរុបកើនឡើងដល់១ម៉ឺន៣ពាន់៥០០នាក់ ។
នៅក្នុងរបាយការណ៍នៅថ្ងៃដដែលនេះ ក៏មានអ្នកជំងឺ Covid-19 ម្នាក់បន្ថែមទៀតក៏ស្លាប់ផងដែរ ដែលធ្វើអោយអ្នកបាត់បង់ជីវិតដោយសារជំងឺឆ្លងនេះកើនឡើងដល់៧៣នាក់ ។ អ្នកនាំពាក្យរងនៃមជ្ឈមណ្ឌលគ្រប់គ្រងស្ថានភាពកូវីដ១៩របស់ថៃ លោក អាពីសាម៉ាយ ស្រីសាងសន បាននិយាយថា អ្នកស្លាប់ថ្មីជាស្ត្រីវ័យ៧៣ឆ្នាំដែលបានទាក់ទងជិតដិតជាមួយអ្នកជំងឺកូវីដ១៩ម្នាក់ នៅក្នុងគ្រួសារគាត់នៅខេត្តសាមុត សាខន ។
មជ្ឈមណ្ឌលគ្រប់គ្រងស្ថានភាពកូវីដ១៩របស់ថៃបានបញ្ជាក់ថា ខេត្តសាមុត សាខន មានអ្នកឆ្លងថ្មីច្រើនជាងគេគឺ៧៦នាក់ បន្ទាប់មកទីក្រុងបាងកកមានចំនួន២១នាក់ និងខេត្តសាមុត ប្រាកាន មានចំនួន១២នាក់ ៕ ប្រភព៖ Bangkok Post