ធនាគារអភិវឌ្ឍន៍ជនបទ និងកសិកម្មលើកទឹកចិត្តប្រជាកសិករបានលើកទឹកចិត្តដល់ប្រជាកសិករធ្វើការពង្រឹង និងពង្រីកការដាំដុះបន្លែ សុវត្ថិភាព ក្នុងដំណាក់កាលកូវិដ ១៩ ដោយសហការជាមួយក្រុមហ៊ុនផ្សារបន្លែខ្មែរ ដើម្បីធានាដល់ការផ្គត់ផ្គង់គ្រប់គ្រាន់និងទៀងទាត់ ព្រមទាំងរក្សាតម្លៃបានល្អប្រសើរ។ ពិធីនេះ បានធ្វើឡើងនាថ្ងៃទី២៤ មករា ២០២១ នៅខេត្តកំពង់ធំ។

ឯកឧត្តម កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្មបានលើកឡើងថា គោលបំណងនៃកម្មវិធីនេះគឺដើម្បីធ្វើការណែនាំក្រុមហ៊ុនទទួលទិញបន្លែសុវត្ថិភាពមួយដែលពិតប្រាកដ ដែលកើតចេញពីកិច្ចសហការរវាងធនាគារអេឌីប៊ី ដែលជាធនាគាររបស់រដ្ឋ និងតំណាងខាងឯកជន ដើម្បីធ្វើជាភ្នាក់ងារមួយទទួលទិញបន្លែសុវត្ថិភាពពីបងប្អូនក្នុងតំលៃទីផ្សារមួយពិតប្រាកដ និងតាមតំលៃដែលបានព្រមព្រាងគ្នាក្នុងកិច្ចសន្យា។ 

ឯកឧត្តមបញ្ជាក់ថា បញ្ហាធ្លាក់ថ្លៃកសិផល ដោយសារឈ្មួញកណ្តាល , ការនាំចូលបន្លែដែលគ្មានប្រភពច្បាស់លាស់ និងមានសាធាតុគីមី បានធ្វើឱ្យប៉ះពាល់យ៉ាងខ្លាំងដល់ដំណើរការផលិត ការដាំដុះបន្លែរបស់បងប្អូនក្នុងស្រុក ដូចនេះដើម្បីរកដំណោះស្រាយកុំអោយបញ្ហានេះកើតឡើងដដែលៗ ឯកឧត្តម កៅ ថាច បានស្នើឱ្យបងប្អូនកសិករ សូមគិតគូររៀបចំអោយមានផែនការដាំដុះ  (គិតគូរដល់តំលៃដើមដើម្បីផលិត មាន ជី ថ្នាំ ថ្លៃភ្ជូរ ពូជ …) ,ផែនការផលិត និងតម្រូវការលើទីផ្សារ ,និងផែនការលក់ ដែលមានលទ្ធភាពចំណេញបានខ្ពស់ និងផ្គត់ផ្គង់មានស្ថេរភាព ដោយជៀសវាង ការផលិត ការដាំដុះដែលជុញ (លើសតម្រូវការ) លើទីផ្សារដែលធ្វើឱ្យការលក់ធ្លាក់ថ្លៃ និងការបង្អាប់តំលៃជាដើម។ ឯកឧត្តមបន្តលើកទឹកចិត្តអោយបងប្អូនដាំដុះបន្លែប្រកដោយគុណភាព និងគ្មានសាធារធាតុគីមី ដើម្បីចូលរួមលើកកំពស់សុខមាលភាពអ្នកប្រើប្រាស់ ហើយក៏ដើម្បីចូលរួមកាត់បន្ថយការនាំចូលបន្លែពីបរទេស និងគ្មានប្រភព ឯកឧត្តម បន្តស្នើសុំដ៏ទទូច ដល់បងប្អូនកសិករ សូមរៀបចំផែនការដាំដុះ ឱ្យបានច្បាស់លាស់ ត្រឹមត្រូវដើម្បីផ្គត់ផ្គង់ប្រកបដោយស្ថេរភាព ចូលទីផ្សារ។

ក្នុងករណីបងប្អូនអាចធ្វើបាន បន្លែរបស់បងប្អូន នឹងមានតំលៃ ក្នុងនោះ ឯកឧត្តមស្នើសុំចងក្រងគ្នាជាសហគមន៍កសិកម្ម ឬ ជាបណ្តុំផលិតតាមតំបន់  ដោយដាក់ផែនការដាំដុះបន្លែតាមប្រភេទខុសៗគ្នា ពីតំបន់១ទៅតំបន់១ ( គួរធ្វើការបែងចែកទៅតាមប្រភេទបន្លែ ) ដោយជៀសវាងកុំឱ្យមាមការដាំដុះជាន់គ្នា ដែលជាដើមចម ធ្វើឱ្យធ្លាក់ថ្លៃនៅពេលប្រមូលផល ។ ទន្ទឹមនេះ ដើម្បីជំរុញកំណើនការដាំដុះបន្លែសុវត្ថិភាពនៅក្នុងខេត្តកំពង់ធំ  ក៏ដូចជាជួយដោះស្រាយបញ្ហាតម្រូវការទុនដើម្បីផលិត ឯកឧត្តម កៅ ថាច  បានធ្វើការផ្សព្វផ្សាយអំពីព័ត៌មានឥណទានរបស់ អេអឌីប៊ី ក្រោមគម្រោងហិរញ្ញប្បទានរបស់រាជរដ្ឋាភិបាល ដោយអត្រាការប្រាក់ទាប ជូនដល់បងប្អូនកសិករ និងលើកទឹកចិត្តឱ្យបងប្អូនធ្វើការទាក់ទងទៅ អេអឌីប៊ី ឬភ្នាក់ងាររបស់អេអឌីប៊ីប្រចាំខេត្តកំពង់ធំ ដើម្បីធ្វើការស្នើសុំឥណទានយកមកពង្រីកការដាំដុះបន្លែបាន។ ឯកឧត្តម បានបន្ថែមទៀតថា ធនាគារអេអឌីប៊ី ពេញចិត្ត និង រីករាយសហការជាមួយបងប្អូនដើម្បីលើកកំពស់ជីវភាព និងអភិវឌ្ឍន៍សេដ្ឋកិច្ចសង្គម។

នៅក្នុងឪកាសនោះដែរ លោកស្រី សាន សុភ័គ តំណាងក្រុមហ៊ុនផ្សារបន្លែខ្មែរ លោកស្រីបានឱ្យដឹងថាគោលបំណងនៃការរៀបចំកម្មវិធីក៏ដើម្បីផ្សព្វផ្សាយអំពីព៍ត៌មានទីផ្សារបន្លែសុវត្ថភាព និងតម្រូវការប្រើប្រាស់បន្លែសុវត្ថភាពលើទីផ្សារ ។ លោកស្រីបានបន្ថែមទៀតថា  ដោយបច្ចុប្បន្នបញ្ហាតម្រូវការបន្លែសុវត្ថភាពលើទីផ្សារមានតម្រូវការខ្ពស់ ប៉ុន្តែការផ្គត់ផ្គង់មិនអាចឆ្លើយតបបានទាន់ពេលវេលាឡើយ។ អាស្រ័យហេតុនេះ តាមរយៈវេទិការនេះ លោកស្រីតំណាងក្រុមហ៊ុនសូមលើកទឹកចិត្តដល់កសិករ ដាំដុះបន្លែសូម ធ្វើការពង្រឹងការដាំដុះប្រកបដោយគុណភាព និងស្នើសុំកិច្ចសហការជាមួយក្រុមហ៊ុនបន្លែសុវត្ថភាពខ្មែរ ដោយមានកិច្ចសន្យាកសិកម្មច្បាស់លាស់ ដើម្បីទទួលទិញបន្លែតាមតំលៃទីផ្សារពីបងប្អូនកសិករ។

គួរបញ្ជាក់ផងដែរថា កម្មវិធីជួបសំណេះសំណាល និងលើកទឹកចិត្តប្រជាកសិករធ្វើការពង្រឹង និងពង្រីកការដាំដុះបន្លែ សុវត្ថិភាព ក្នុងដំណាក់កាលកូវិដ ១៩ ដែលរៀបចំឡើងនៅខេត្តកំពងធំ នាឪកាសនោះ មានប្រជាកសិករចូលរួមប្រមាណជិត២០០នាក់។ អនុប្រធានមន្ទីរកសិកម្ម រុក្ខា ប្រមាញ់និងនេសាទ លោក កាន់ សាឡន ក៏មានវត្តមានក្នុងកម្មវិធីនោះផងដែរ៕