ឯកឧត្តម កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក នៃធនាគារអភិវឌ្ឍន៍ជនបទ និងកសិកម្ម ចុះពិនិត្យមើលកសិដ្ឋានចញ្ចឹមត្រី នៅខេត្តកំពង់ធំ
ម្ចាស់កសិដ្ឋានរបស់លោក អ៊ីវ វណ្ណា ស្ថិតនៅភូមិព្រែកក្រប៉ៅ សង្កាត់ព្រែកក្រប៉ៅ ក្រុងស្ទឹងសែន ខេត្តកំពង់ធំ បានអោយដឹងថា បច្ចុប្បន្នកសិដ្ឋានរបស់លោក មានស្រះធំៗទាំងអស់ចំនួន ៨ លើផ្ទៃដី១០ហិកតា ហើយ លោកបានដាក់កូនត្រីចំរុះសរុប ប្រមាណ ១៦ម៉ឺនកូន ។
លោក ក៏បានធ្វើការថ្លែងអំណរគុណ ដល់ឯកឧត្តម កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអេអឌីប៊ី ដែលបានយកចិត្តទុកដាក់ខ្ពស់ជួយដល់កសិករ ក៏ដូចជាជួយពង្រឹងដល់វិស័យកសិកម្ម។ ជាក់ស្តែង រូបលោកផ្ទាល់ ក្នុងតំណាក់កាលរីករាលដាលជំងឺឆ្លង កូវិដ ១៩ កសិដ្ឋានរបស់លោកបានជួបនឹងបញ្ហាវិបត្តហិរញ្ញវត្ថុយ៉ាងខ្លាំង ហើយជិតក្ស័យធនផងដែរ ប៉ុន្តែតាមរយៈកញ្ចប់ហិរញ្ញប្បទានពិសេសរបស់រាជរដ្ឋាភិបាល តាមរយៈធនាគារអភិវឌ្ឍន៍ជនបទ និងកសិកម្ម បានជួយជីវិតកសិដ្ឋានរបស់លោកអោយរស់ឡើងវិញ។
សូមបញ្ជាក់ដែរថា លោក អ៊ីវ វណ្ណា ជាអតិថិជនរបស់ អេអឌីប៊ី ដែលទទួលបានកម្ចីឥណទានក្រោមគម្រោងហិរញ្ញប្បទានពិសេសរបស់រាជរដ្ឋាភិបាលចំនួន ៥០លានដុល្លារអាមេរិក ដែលមានអត្រាការប្រាក់ ០,៤២%ក្នុង១ខែ ដើម្បីយកទៅពង្រីកវិស័យវារីវប្បកម្ម។
លោក កាន់ សាឡន អនុប្រធានមន្ទីរកសិកម្ម ខេត្តកំពង់ធំដែលបានអមដំណើរជាមួយនឹងឯកឧត្តម កៅថាច ក្នុងការចុះទៅពិនិត្យមើលការចិញ្ចឹមរបស់កសិករនោះបានលើកឡើងពីការខិតខំប្រឹងប្រែងរបស់ធនាគារអភិវឌ្ឍជនបទនិងកសិកម្ម ដើម្បីលើកស្ទួយវិស័យកសិកម្មនិងបានថ្លែងអំណរគុណចំពោះធនាគារនិងក្រុមផ្សារបន្លែខ្មែរដែលបានរៀបចំកម្មវិធីផ្សព្វផ្សាយព័ត៌មានទីផ្សារបន្លែ និងគម្រោងហិរញ្ញប្បទានពិសេសរបស់រាជរដ្ឋាភិបាល។
ពាក់ព័ន្ធនឹងកសិដ្ឋានចិញ្ចឹមត្រីរបស់លោក អ៊ីវ វណ្ណា លោកប្រធានមន្ទីររូបនេះបានវាយតម្លៃខ្ពស់ និងបង្ហាញពីការគាំទ្រពេញទំហឹងចំពោះការអន្តរាគមន៍ទាន់ពេលវេលារបស់ធនគារអភិវឌ្ឍជនបទនិងកសិកម្ម ក្នុងកាផ្តល់ឥណទាន ដោយអត្រាការប្រាក់ទាបជូនដល់ប្រជកសិករក្នុងខេត្តកំពង់ធំ។
ឯកឧត្តម កៅថាច ក៏បានបញ្ជាក់ក្នុងពេលដែរថា ការផ្តល់ឥណទានក្រោមគម្រោង ដល់លោកអ៊ីវ វណ្ណា ម្ចាស់កសិដ្ឋាន ព្រមទាំងប្រជាកសិករជាច្រើនទៀត ទូទាំងប្រទេសកម្ពុជា គឺជាការយកចិត្តទុកដាក់ខ្ពស់ ក្នុងការជួយដល់ប្រជាកសិករ ក្នុងបរិបទកូវីដ១៩នេះ៕