១ថ្ងៃនៅស្រុកបាគង គួរទៅលេងកន្លែងណាខ្លះ?
ស្រុកបាគងក្នុងរយៈចម្ងាយប្រមាណ១៥គម ពីក្រុងសៀមរាប មានកន្លែងទាក់ទាញមួយចំនួនដែលគ្រប់គ្នាមិនគួរមើលរំលងឡើយ។ មិនត្រឹមតែមានទេសភាពស្រស់ស្អាតនោះទេ ថែមទាំងអាចឲ្យអ្នករីករាយនឹងសកម្មភាពសប្បាយៗមិនងាយបានធ្វើនៅទីក្រុងផងដែរ…
អូខេ! អញ្ចឹងងាកមកមើលការណែនាំនូវដំណើរកម្សាន្តរយៈពេល១ថ្ងៃ នៅស្រុកបាគងខាងក្រោមជាមួយគ្នា…
ទស្សនាតំបន់រលួស (ប្រាសាទបុរាណចំនួន៣ ប្រាសាទបាគង លលៃ និងព្រះគោ)
មកលេងសៀមរាប ម៉េចនឹងអាចរំលងប្រាង្គប្រាសាទជាសម្បត្តិវប្បធម៌ដ៏អស្ចារ្យរបស់យើងបានទៅ? ប្រាសាទនៅទីនេះ មានលក្ខណៈពិសេសប្លែកម្យ៉ាង អមដោយសម្រស់ធម្មជាតិដ៏ស្រស់ត្រកាល។
ជិះទូកនៅកំពង់ភ្លុក
ក្រៅពីទស្សនាទិដ្ឋភាពរស់នៅរបស់ប្រជាជននៅតំបន់នេះ អ្នកក៏អាចគយគន់ទេសភាពនៅលើផ្ទៃទឹកបឹងដ៏ធំទូលាយ ក៏ដូចជាចូលអង្គុយសម្រាកលើផ្ទះលិចទឹកផងដែរ។ គួរបញ្ជាក់ផងដែរថា ទេសភាពនៅទីនេះ គឺខុសៗគ្នាទៅតាមរដូវកាល។
ញ៉ាំបាយថ្ងៃត្រង់
(ជម្រើសទី១) នៅដងស្ទឹងរលួស
មានភោជនីយដ្ឋានមួយចំនួននៅតាមដងស្ទឹងតែម្តង ដែលភាគច្រើនជាលក្ខណៈកញ្ចុះអង្គុយលេងក្រោមម្លប់ឈើត្រជាក់ចិត្ត និងរឹតតែពិសេស មានកន្លែងអង្គុយពិសេស នៅលើក្បូនទៀតផង។ ចំណែកឯម្ហូបវិញ ភាគច្រើនសុទ្ធតែ ជាម្ហូបស្រែ តែរសជាតិឆ្ងាញ់កប់តាមបែបអាហារតំបន់។
(ជម្រើសទី២) នៅសហគមន៍ទេសចរណ៍បាគង ភូមិខ្ញុំ
សម្រាប់អ្នកចូលចិត្តថតរូបលេងច្រើន ព្រមទាំងចង់រីករាយនឹងសកម្មភាពច្រើនដូចជា ជិះទូកកម្សាន្ត ស្ទូចត្រី ថតតែងបុរាណ ស្តាប់ភ្លេងបុរាណ… គួរតែមកសម្រាកលំហែ និងរីករាយនឹងអាហារថ្ងៃត្រង់របស់អ្នកនៅទីនេះ។
លេងកីឡាបាញ់ធ្នូ
នៅទីនោះ មានទាំងធ្នូខ្មែរបុរាណ និងធ្នូសម័យ ជាមួយនឹងតម្លៃសមរម្យមែនទែនសម្រាប់ការលេងគិតជាម៉ោង។ ហើយកុំបាច់បារម្ភអី បើសិនអ្នកមិនចេះ ឬមិនធ្លាប់លេងនោះ ព្រោះនឹងមានលោកគ្រូនៅចាំបង្ហាត់បង្រៀនស្រាប់។ ចង់ប្រាប់ដែរថា…នៅហ្នឹង មានស្ទាយថតវីដេអូឡើងឡូយផងដែរ បើបានទៅ កុំភ្លេចសួរលោកគ្រូណា៎!
***សម្រាប់អ្នកចង់សម្រាកមួយយប់ នៅទីនេះ ក៏មានបន្ទប់គេង និងលក្ខណៈជាតង់បុរាណលាយសម័យផងដែរ…
ញ៉ាំមាន់អាំងឆ្ងាញ់ពិសា
បើសិនចេញពីដើរលេងរាងហត់ ហើយនឹកឃ្លានទៀត កុំភ្លេចសាករសជាតិពិសេសនៃមាន់អាំងនៅក្នុងតំបន់នេះណា៎! ភាគច្រើន ក៏មានម្ហូបអាំងផ្សេងទៀតផងដែរដូចជាកង្កែបបោក ត្រីអាំង គ្រឿងក្នុងអាំង ជាដើម។