មន្ទីរបញ្ចកោណអនុម័តអោយពន្យារពេលកាត់បន្ថយឆ្មាំការពារជាតិនៅរដ្ឋធានីវ៉ាស៊ីនតោន ខណៈ FBI ទើបបញ្ចេញវីដេអូជនសង្ស័យដាក់បំផ្ទុះគ្រាប់បែកនៅវិមានសភា
អាមេរិក៖ មន្ទីរបញ្ចកោណនៅថ្ងៃអង្គារនេះបានអនុម័តលើសំណើអោយបន្តរក្សាទុកកងកម្លាំងឆ្មាំការពារជាតិប្រមាណ២ពាន់៣រយនាក់ ក្នុងរដ្ឋធានីវ៉ាស៊ីនតោន ដើម្បីជួយការពារវិមានសភាសម្រាប់រយៈពេលពីរខែបន្ថែមទៀត ខណៈដែលចំនួននេះ គឺប្រហែលពាក់កណ្តាលនៃកងឆ្មាំការពារជាតិចំនួន៥ពាន់២រយនាក់ ដែលកំពុងឈាមល្បាតនៅវិមានកាពីតូល ។
ការអនុម័តខាងលើនេះ បានកើតមានឡើងចំពេលដែលទីភ្នាក់ងារ FBI បានបញ្ចេញវីដេអូជនសង្ស័យដែលបានដាក់គ្រាប់បែកបំពង់នៅក្បែរគណៈកម្មាធិការជាតិប្រជាធិបតេយ្យ (DNC) និងទីស្នាក់ការគណៈកម្មាធិការជាតិសាធារណរដ្ឋ (RNC) នៅទីក្រុងវ៉ាស៊ីនតោន មួយថ្ងៃមុនការវាយប្រហារដ៏សាហាវនៅថ្ងៃទី៦ ខែមករា លើវិមានសភាអាមេរិក ។
ទីភ្នាក់ងារ FBI បាននិយាយនៅក្នុងសេចក្តីប្រកាសព័ត៌មានមួយនៅថ្ងៃអង្គារនេះថា ការិយាល័យរបស់ FBI បានចេញផ្សាយព័ត៌មាន និងវីដេអូថ្មី ពាក់ព័ន្ធនឹងគ្រាប់ បែកបំពង់ដែលត្រូវបានដាក់នៅសង្កាត់ ខេបភីថល ហ៊ីល នៅទីក្រុងវ៉ាស៊ីនតោនឌីស៊ី កាលពីថ្ងៃទី៥ ខែមករា ឆ្នាំ២០២១ ហើយកំពុងស្វែងរកព័ត៌មានបន្ថែមពីសាធារណជន ។ ទីភ្នាក់ងារ FBI និយាយថា ខ្លួនកំពុងធ្វើការដើម្បីកំណត់អត្តសញ្ញាណជនសង្ស័យ ហើយកំពុងផ្តល់ប្រាក់រង្វាន់១០ម៉ឺនដុល្លារសម្រាប់ព័ត៌មានដែលឈានដល់ការកំណត់អត្តសញ្ញាណ និងការកាត់ទោសបុគ្គលនោះ ៕ ប្រភព៖ Reuters