អគ្គលេខាធិការអង្គការសហប្រជាជាតិរិះគន់ប្រទេសអ្នកមាន ដែលស្ដុកទុកវ៉ាក់សាំងសម្រាប់តែខ្លួនឯង
អគ្គលេខាធិការអង្គការសហប្រជាជាតិ (UN) បានរិះគន់បណ្ដាប្រទេសអ្នកមានៗ សម្រាប់ការស្ដុកទុកវ៉ាក់សាំង COVID-19 ដោយលោកចាត់ទុកថា ជាទង្វើគិតតែពីប្រយោជន៍ខ្លួនឯង។
លោក Antonio Guterres បានរិះគន់បែបនេះ នៅក្នុងបទសម្ភាសន៍ជាមួយទូរទស្សន៍ CBC កាលពីថ្ងៃអាទិត្យម្សិលមិញ ដោយលោកអគ្គលេខាធិការបាននិយាយចំៗថា បណ្ដាប្រទេសអ្នកមានមួយចំនួន គិតតែពីប្រយោជន៍ខ្លួន តាមរយៈការស្ដុកទុកវ៉ាក់សាំងនៅក្នុងស្រុក លើសពីតម្រូវការរបស់ប្រជាជនខ្លួនឯង។
លោក Antonio Guterres បញ្ជាក់ដែរថា យន្តការកូវ៉ាក់ដឹកនាំដោយអង្គការសុខភាពពិភពលោក (WHO) កំពុងជួបការលំបាក នៅក្នុងការចែកចាយវ៉ាក់សាំង ទៅដល់បណ្ដាប្រទេសក្រីក្រ ដោយសារតែភាពអាត្មានិយម គិតតែពីប្រយោជន៍ខ្លួនឯងតែម្ដង ដូច្នេះហើយទើបលោកអំពាវនាវឱ្យបណ្ដាប្រទេសអ្នកមានៗ កុំស្ដុកទុកវ៉ាក់សាំងលើសពីតម្រូវការរបស់ខ្លួន៕