កូវីដ១៩៖ វ៉ាក់សាំង Johnson & Johnson ជួបបញ្ហាកំណកឈាមដែរ អាមេរិកផ្អាកចាក់ហើយ
ទីភ្នាក់ងារសុខាភិបាលសហព័ន្ធអាមេរិក នាថ្ងៃទី១៣ មេសានេះ បានណែនាំឲ្យផ្អាកការចាក់វ៉ាក់សាំង បង្ការជំងឺកូវីដ១៩ប្រភេទJohnson & Johnsonសិន ក្រោយរកឃើញថា ស្ត្រី៦នាក់ អាយុក្រោម៥០ឆ្នាំចាក់រួច មានបញ្ហាកំណកឈាមដ៏កម្រ។ ក្រោយដឹងដំណឹងនេះ ក្រុមហ៊ុន Johnson & Johnson បានអះអាងថា ខ្លួនបានពន្យាពេលចុះឈ្មោះចាក់វ៉ាក់សាំងនេះនៅអឺរ៉ុប ដោយពិនិត្យមើលឡើងវិញចំពោះករណីកំណកឈាមនេះ។
គួរបញ្ជាក់ថា បញ្ហាកំណកឈាមបណ្តាលពីវ៉ាក់សាំង Johnson & Johnson ដែលទើបឲ្យប្រើប្រាស់បន្ទាន់នៅអាមេរិក ក៏ធ្លាប់កើតមានចំពោះអ្នកវ៉ាក់សាំងអង់គ្លេស អាស្ត្រា សេនីកា នៅអឺរ៉ុប និងធ្លាយដល់នៅតំបន់ផ្សេងទៀតដែរ។
គិតត្រឹមថ្ងៃទី ១២ មេសា ២០២១ វ៉ាក់សាំង Johnson & Johnson ច្រើនជាង៦លាន៨សែនដូសត្រូវបានចាក់ជូនពលរដ្ឋនៅអាមេរិក ខណៈដែលទូទាំងសហអាមេរិកតែម្តងបានចាក់វ៉ាក់សាំង សរុបទាំង Moderna, Pfizer-BioNTech និង Johnson & Johnson មានដល់ជាង១៨០លានដូសហើយ៕ ប្រភពពី CNA