រដ្ឋបាលខណ្ឌបឹងកេងកងនៅរសៀលថ្ងៃទី២១ ខែមេសា ឆ្នាំ២០២១ បានប្រកាសផ្អាកជាបណ្តោះអាសន្ន មូលដ្ឋានផ្សារអូឡាំពិក នៅក្នុងស្ង្កាត់អូឡាំពិក ខណ្ឌបឹងកេងកង រាជធានីភ្នំពេញ។ នៅក្នុងសេចក្តីជូនដំណឹង ចុះហត្ថលេខាដោយ លោក ធឺមសំអាន អភិបាលនៃគណៈអភិបាលខណ្ឌបឹងកេងកង ការបិទមូលដ្ឋានផ្សារអូឡាំពិកជាបណ្តោះអាសន្ននេះ ដោយសារមានអាជីវករនិងប្រជាពលរដ្ឋបានឆ្លងវីរុសកូវីដ-១៩ ក្នុងព្រឹត្តិការណ៍សហគមន៍ ២០ កុម្ភះ ឆ្នាំ២០២១ក្នុងរយៈពេលប៉ុន្មានថ្ងៃកន្លងមកនេះ។

សូមបញ្ជាក់ថា អាជ្ញាធរសម្រេចបិទផ្សារអូឡាំពិកជាបណ្តោះអសន្នក្នុង រយៈពេល១៤ថ្ងៃ គិតចាប់ពីថ្ងៃទី២២ ខែមេសា រហូតដល់ថ្ងៃទី០៥ ខែឧសភា ឆ្នាំ២០២១។ ជាមួយគ្នានេះ រដ្ឋបាលខណ្ឌបានស្នើឱ្យអ្នកពាក់ព័ន្ធទាំងអស់ ទៅពិនិត្យសមណាកនៅសាលមហោស្រព ចេនឡា ជិតផ្សារដើមគររាជធានីភ្នំពេញ និងអនុវត្តវិធានការចត្តឡីស័ក តាមការណែនាំរបស់ក្រសួងសុខាភិបាល៕