ថៃ៖ លោក ថាក់ស៊ីន ចង់ជួយរកវ៉ាក់សាំងឲ្យជាតិ តែលោកប្រាយុទ្ធទាត់ចោល
នាយករដ្ឋមន្ត្រីថៃ ប្រាយុទ្ធ ចាន់អូចា បានច្រានចោលការជួយពីអតីតនាយករដ្ឋមន្ត្រី ថាក់ស៊ីន ដែលចង់ជួយឲ្យថៃទទួលបានវ៉ាក់សាំងបង្ការជំងឺកូវីដ១៩ បន្ថែមទៀតពីប្រទេសរុស្ស៊ី នេះបើតាមការចេញផ្សាយរបស់បាងកកប៉ុស្តិ៍ នាព្រឹកថ្ងៃទី២២ មេសា ២០២១នេះ។
លោកប្រាយុទ្ធបានទាត់ចោលបែបនេះ ក្រោយពេលលោកថាក់ស៊ីដែលកំពុងនិរទេសខ្លួនរស់នៅក្រៅប្រទេសបានប្រកាសតាមបណ្តាញសង្គមពីបំណងជួយរបស់លោក កាលពីពេលថ្មីៗនេះ។ លោកថាក់ស៊ីនបាននិយាយថា នីតិវិធីទទួលបានវ៉ាក់សាំងរបស់ថៃមានការយឺតយ៉ាវខ្លាំង ហើយលោកស្នើថា គួរតែទទួលវ៉ាក់សាំងពីប្រភពផ្សេងទៀត មិនមែនតែស៊ីណូវ៉ាក់ និងអាស្ត្រាហ្សេនីកាទេ។ លោកនិយាយថា អ្នកជំនួញធំៗនៅប្រទេសថៃមានសមត្ថភាពនិងទំនាក់ទំនងដើម្បីបានវ៉ាក់សាំងបន្ថែមទៀត ពីក្រុមហ៊ុនហ៊ុនផលិតវ៉ាក់សាំងផ្សេងៗទៀត ដូចជា ចិន និងរុស្ស៊ីជាដើម។ លោកថាក់ស៊ីនបន្តថា រាជរដ្ឋាភិបាលគួរតែស្នើដល់ពួកមហាសេដ្ឋីទាំងនោះជួយ ដោយលោកបញ្ជាក់ថា រូបលោកអាចចរចាជាមួយប្រធានាធិបតីរុស្ស៊ីបាន បើរដ្ឋាភិបាលចង់បាន។
ឆ្លើយតបនឹងបំណងនេះ លោក ប្រាយុទ្ធបាននិយាយថា «ខ្ញុំមិនឆ្លើយតបទេ សូមកុំលើកពីសំណួរពីបុគ្គលរស់នៅក្រៅប្រទេស… ខ្ញុំមិនស្គាល់គាត់ទេ កុំខ្វល់ពីគាត់អី»៕