យុទ្ធភ័ណ្ឌមិនទាន់ផ្ទុះចំនួន៧គ្រាប់ ត្រូវបានប្រជាពលរដ្ឋប្រទះឃើញនៅស្រុកគាស់ក្រឡ។ យោងតាមអធិការ នគរបាលស្រុកគាស់ក្រឡ លោកវរសេនីយ៍ឯក ប៉ាង ហៀង គ្រាប់មិនទាន់ផ្ទុះទាំងនោះ បានរកឃើញ នៅចំណុច ភូមិទួលម្ទេស និងភូមិកន្ទួត ក្នុងស្រុកគាស់ក្រឡ កាលពីថ្ងៃទី០៦ ខែឧសភា។  គ្រាប់មិនទាន់ផ្ទុះទាំង៧ រួមមាន មីនPMN2 ចំនួន ៦គ្រាប់ និងគ្រាប់B៤០ ចំនួន១គ្រាប់។ ស្រុកគាស់ក្រឡនៃខេត្តបាត់ដំបង គឺជាអតីតសមរភូមិ ប្រយុទ្ធក្នុងជំនាន់កម្ពុជាមានសង្គ្រាមស៊ីវិល។ មនុស្សស្លាប់និងរបួសដោយសារគ្រាប់មីននិងគ្រាប់មិនទាន់ផ្ទុះក្នុង ប្រទេសកម្ពុជាមានជារៀងរាល់ឆ្នាំ។

សេចក្តីរាយការណ៍របស់អាជ្ញាធរបានឲ្យដឹងថាក្នុងរយៈ៤ខែដើមឆ្នាំ២០២១ នេះ មនុស្ស២០នាក់បានរងគ្រោះថ្នាក់ដោយសារគ្រាប់មីន និងគ្រាប់មិនទាន់ផ្ទុះសេសសល់ពីអតីតកាលសង្គ្រាម ស៊ីវិល។ កម្ពុជាទើបបានសម្រេច រំដោះដីដែល មានមីននិងគ្រាប់មិនទាន់ផ្ទុះ បានទំហំជាង១ពាន់៨០២គីឡូម៉ែត្រ ក្រឡា និងបានកម្ទេចគ្រាប់ មីនប្រឆាំងមនុស្សចំនួន ១លាន៦ម៉ឺន ២ពាន់៦៦១គ្រាប់…មីនប្រឆាំងរថក្រោះចំនួន ២ម៉ឺន៤ពាន់៨៣២គ្រាប់ និងសំណល់ជាតិផ្ទុះពីសង្គ្រាម បានចំនួន ២លាន៧៦ម៉ឺន៧ពាន់២០ គ្រាប់។ ទំហំផ្ទៃដី ដែលសេសសល់គ្រាប់មីននិងគ្រាប់មិនទាន់ផ្ទុះក្នុងប្រ ទេសកម្ពុជា ត្រូវបានគេប៉ាន់ប្រមាណថានៅមានទំហំ ៨៩០គីឡូម៉ែត្រក្រឡានិងកម្ពុជាមានផែនការបោសសំអាតគ្រាប់ មីន និងគ្រាប់មិនទាន់ផ្ទុះឲ្យអស់រហូត ដល់ឆ្នាំ ២០២៥។