សម្តេចតេជោអំពាវនាវឱ្យម្ចាស់ផ្ទះជួល ក្រុមហ៊ុនអគ្គិសនី រដ្ឋាករទឹកស្វ័យត យោគយល់ដល់កម្មករ កម្មការិនីនៅតំបន់បិទខ្ទប់
ភ្នំពេញៈសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានធ្វើការអំពាវនាវ ជាថ្មីម្តងទៀតដល់ម្ចាស់ផ្ទះជួលទាំងអស់ ដោយសុំការយោគយល់ការ ចូលរួមចែករំលែកជាមួយបងប្អូនកម្មករ កម្មការិនីនៅតំបន់បិទខ្ទប់តាមរយៈកាយវិការមនុស្សធម៌ដោយផ្អាក ឬបន្ធូរបន្ថយថ្លៃជួលបន្ទប់ ក្នុងពេលដែលពួកគេមិនទាន់បានបើកប្រាក់ខែពីថៅកែរោងចក្រនិងកំពុងជួបការលំបាក។ ទន្ទឹមនេះក៏បានស្នើទៅអាជ្ញាធរអគ្គិសនី រដ្ឋាករទឹកស្វយ័តរកវិធីអនុគ្រោះនៅក្នុងការយកថ្លៃទឹក ថ្លៃភ្លើង ដែលជាការរួមចំណែកជាមួយនឹងម្ចាស់ផ្ទះជួលដើម្បីដោះស្រាយបញ្ហារួមរបស់កម្មករកម្មការិនីនៅតំបន់បិទខ្ទប់។
ក្នុងសារពិសេសជាសំឡេងដែលត្រូវបានផ្សព្វផ្សាយនៅព្រឹកថ្ងៃទី៨ខែឧសភានេះ សម្តេចតជោនាយករដ្ឋមន្រ្តីនៃកម្ពុជាមានប្រសាសន៍ថា សម្តេចសូមធ្វើការអំពាវនាវទៅកាន់បងប្អូនជាម្ចាស់ផ្ទះជួល ផ្ទះសំណាក់ ទាក់ទិនជាមួយនឹងតម្លៃឈ្នួលផ្ទះរបស់កម្មករ កម្មការិនី។ ក្នុងប៉ុន្មានថ្ងៃកន្លងទៅនេះជាពិសេសម្សិលមិញនេះគឺមានការទាមទារយកប្រាក់ថ្លៃឈ្នួលផ្ទះពីកម្មករកម្មការិនីរបស់យើង ក្នុងពេលដែលកម្មករកម្មការិនីរបស់យើងមិនទាន់បានបើកប្រាក់ខែ ហើយកំពុងស្ថិតនៅក្នុងតំបន់បិទខ្ទប់នៅឡើយ។ គឺនៅតំបន់ក្រហមក្នុងស្ថានភាពបែបនេះ សម្តេចសុំអង្វរកចំពោះម្ចាស់ផ្ទះជួលទាំងអស់ សូមមេត្តាយោគយល់ដល់ការលំបាករបស់កម្មករ កម្មការិនីរបស់យើងក្នុងពេលវេលាមួយដែលយើងទាំងអស់គ្នាសុទ្ធតែមានជួបការលំបាក។
រំលឹកទៅរកអ្វីដែលសម្តេចបានធ្វើការអំពាវនាវនាពេលកន្លងទៅ សម្តេចតេជោ ហ៊ុន សែន បានមានប្រសាសន៍ថាក្នុងរយៈពេលកន្លងទៅនេះក៏មានម្ចាស់ផ្ទះជួលមួយចំនួនបានសម្រេចមិនយកប្រាក់ឈ្នួលរបស់កម្មករកម្មការិនី ក្នុងចំនួនមួយរយៈខ្លី ឬក៏បញ្ចុះថ្លៃ ហើយក៏មានមួយចំនួនទៀតបានអនុញ្ញាតឲ្យប្រើប្រាស់ក្នុងរយៈពេលវែង ដែលសម្តេចក៏បាន ធ្វើលិខិតថ្លែងអំណរគុណចំពោះពួកគាត់រួចហើយ។ ប៉ុន្តែក៏នៅសេសសល់បងប្អូនមួយចំនួនដោយខ្វះការយោគយល់ បង្កើតឱ្យមានបញ្ហាឡើង តែម្សិលមិញនេះមានការប្រញាប់ប្រញាល់ធ្វើការដោះស្រាយនៅទីកន្លែងនោះ។
សម្តេចតេជោនាយករដ្ឋមន្ត្រីក៏បានសុំអង្វរកចំពោះម្ចាស់ផ្ទះជួលទាំងឡាយសុំផ្អាកជាបណ្ដោះអាសន្ននូវការយកប្រាក់ឈ្នួលពីកម្មករកម្មការិនីក្នុងពេលដែលកម្មករកម្មការិនីមិនទាន់បើកប្រាក់ឈ្នួលពីថៅកែនៅឡើយ ហើយប្រសិនបើម្ចាស់ផ្ទះឈ្នួលទាំងឡាយនឹងធ្វើទៅបានរួមគ្នាធ្វើដើម្បីជួយទៅដល់កម្មករកម្មការិនីរបស់យើង។ ឧទាហរណ៍ការបញ្ចុះថ្លៃបន្ទប់ជួលដែលបាននឹងកំពុងស្នាក់នៅក្នុងចំនួនប៉ុន្មានភាគរយ, ចំនួនតិចឬចំនួនច្រើន តាមលទ្ធភាពដែលអាចធ្វើទៅបាន។ ប្រសិនបើម្ចាស់ផ្ទះជួលខ្លះអាចលើកលែងបានក្នុងមួយខែពីរខែ ឬ ៣ខែ ក៏សុំធ្វើការលើកលែង។
សម្តេចតេជោបន្តថា សម្តេចដឹងថាម្ចាស់ផ្ទះជួលមួយចំនួនខ្លះខ្ចីលុយធនាគារយកមកសាងសង់ផ្ទះជួលទាំងនោះ បងប្អូនពិតជាមានការលំបាកដូចគ្នា ដែលម្ខាងជាកូនបំណុល ម្ខាងទៀតក៏ជាម្ចាស់បំណុល។ ប៉ុន្តែសម្តេចសង្ឃឹមថាម្ចាស់ផ្ទះជួលទាំងអស់នឹងអាចយល់បាននូវការលំបាករួម ហើយស្ថានភាពនេះមិនមែនគ្រាន់តែនៅទីក្រុងភ្នំពេញទេ បើអាចធ្វើបានសុំធ្វើនៅគ្រប់ទីកន្លែងទាំងអស់ក្នុងប្រទេសរបស់យើងនៅក្នុងតំបន់ដែលមានការបិទខ្ទប់។
សម្តេចតេជោនាយករដ្ឋមន្រ្តីកម្ពុជា បានបញ្ជាក់ថាសម្តេចថ្លែងនេះ គឺសំដៅនៅក្នុងតំបន់បិទខ្ទប់ ហើយកម្មករកម្មការិនីមិនទាន់បានបើកប្រាក់ខែរបស់ខ្លួននៅឡើយ។ ដូចនេះសូមឱ្យមានការយោគយល់។
ទាក់ទងនឹងបញ្ហាទឹកភ្លើងវិញ ក្នុងសារពិសេសនេះ សម្តេចតេជាបានថ្លែងថា សម្រាប់ថ្លៃទឹកថ្លៃភ្លើងទៀតសោតក៏សុំឲ្យក្រុមហ៊ុនអគ្គិសនីកម្ពុជានិងរដ្ឋាករស្វយ័តរាជធានីភ្នំពេញធ្វើការយោគយល់ទៅដល់កម្មករកម្មការិនី ដោយអាចរកវិធីដោះស្រាយណាមួយដើម្បីឲ្យកម្មករកម្មការិនីដែលរស់នៅក្នុងតំបន់បិទខ្ទប់ នៅតាមផ្ទះជួលនេះបានទទួលនូវការអនុគ្រោះនៅក្នុងការយកថ្លៃទឹក ថ្លៃភ្លើង ដែលជាការរួមចំណែកជាមួយនឹងម្ចាស់ផ្ទះជួលដើម្បីដោះស្រាយបញ្ហារួមរបស់កម្មករកម្មការិនី។
ប៉ុន្តែសម្តេចតេជោ ហ៊ុន សែន បានបញ្ជាក់ចំណុចនេះថា ការអនុគ្រោះថ្លៃទឹកថ្លៃភ្លើងនេះមិនបានរីករាលដាលទៅដល់អ្នកដែលមានផ្ទះប្រើម៉ាស៊ីនត្រជាក់យ៉ាងច្រើននោះទេ។ សម្តេចតេជោថ្លែងទៅកាន់ម្ចាស់ផ្ទះបង្ហោះតាមហ្វេសប៊ុកទាមទារការអនុគ្រោះថ្លៃទឹកថ្លៃភ្លើងថា យើងបានសិក្សាហើយអ្នកដែលបានបង្ហោះនៅលើហ្វេសប៊ុកទាមទារកាត់បន្ថយថ្លែទឹកថ្លៃភ្លើងនេះ មិនមែនកម្មករកម្មការិនីនោះទេ។ ប៉ុន្តែបែរជាអ្នកដែលប្រើម៉ាស៊ីនត្រជាក់យ៉ាងច្រើនមានស៊ី មានចុកសម្បូរហូរហៀរ។
គួររំលឹកថា កាលល្ងាចថ្ងៃទី ០៧ខែឧសភានេះ ឯកឧត្តម ឃួង ស្រេង អភិបាលរាជធានីភ្នំពេញបន្ទាប់ពីទទួល បានព័ត៌មានពីបងប្អូនកម្មករ កម្មការិនី ដែលរស់នៅក្នុងផ្ទះជួលតាមបណ្តោយ វេង ស្រេង ស្ថិតនៅក្នុងភូមិ២ សង្កាត់ស្ទឹងមានជ័យ៣ ខណ្ឌមានជ័យ បានដឹកនាំអាជ្ញាធរខណ្ឌ និងសង្កាត់ចុះទៅធ្វើការសម្របសម្រួលជាមួយម្ចាស់ បន្ទប់ជួលដែលបងប្អូនកម្មករស្នាក់នៅ ចំនួន៤៧០បន្ទប់ ។សកម្មភាពនេះបានបញ្ចប់ដោយការយោគយល់។
គួររំលឹកថា កាលល្ងាចថ្ងៃទី ០៧ខែឧសភានេះ ឯកឧត្តម ឃួង ស្រេង អភិបាលរាជធានីភ្នំពេញបន្ទាប់ពីទទួល បានព័ត៌មានពីបងប្អូនកម្មករ កម្មការិនី ដែលរស់នៅក្នុងផ្ទះជួលតាមបណ្តោយ វេង ស្រេង ស្ថិតនៅក្នុងភូមិ២ សង្កាត់ស្ទឹងមានជ័យ៣ ខណ្ឌមានជ័យ បានដឹកនាំអាជ្ញាធរខណ្ឌ និងសង្កាត់ចុះទៅធ្វើការសម្របសម្រួលជាមួយម្ចាស់ បន្ទប់ជួលដែលបងប្អូនកម្មករស្នាក់នៅ ចំនួន៤៧០បន្ទប់ ។សកម្មភាពនេះបានបញ្ចប់ដោយការយោគយល់។
នៅទីតាំងខាងលើមានបន្ទប់ជួលចំនួន៤៧០បន្ទប់។ បន្ទាប់ពីមានព្រឹត្តិការណ៍សហគមន៍កូវីដ-១៩ ម្ចាស់ផ្ទះជួល បានបញ្ចុះតម្លៃជួល២០ដុល្លារ ក្នុងមួយបន្ទប់ជូនបងប្អូនកម្មករ កម្មការិនី ដែរដើម្បីរំលែកការលំបាករបស់ពួកគាត់ ខណៈដែលរោងចក្រត្រូវបានបិទទ្វារដែរ។ តែក្នុងរយៈពេលចុងក្រោយនេះ បន្ទាប់ពីរាជរដ្ឋាភិបាលបានបើកឲ្យមានការធ្វើចរាចរណ៍ឡើងវិញ ម្ចាស់ផ្ទះជួលបានឡើងថ្លៃដូចដើមវិញ ដែលធ្វើឱ្យបងប្អូនកម្មករ កម្មការិនីការរស់នៅតំបន់ក្រហម និងមិនទាន់មានការងារធ្វើវិញផងនោះកើតទុក្ខមិនសុខចិត្តចំពោះការឡើងថ្លៃនេះ។ ប៉ុន្តែការតវ៉ានោះ ក្រោយពីមានការសម្របសម្រួលពីអាជ្ញាធររាជធានីភ្នំពេញ ម្ចាស់ផ្ទះជួលបានយល់ព្រមជាមួយអាជ្ញាធរ ដោយបញ្ចុះតម្លៃ២០ដុល្លារនេះដូចដើមវិញ។ ជាមួយគ្នានោះ ឯកឧត្តមអភិបាលរាជធានីក៏បានជួយឧបត្ថម្ភ បងប្អូនកម្មករកម្មការិនីទាំង៤៧០បន្ទប់ ដោយក្នុងមួយបន្ទប់ទទួលបានអំណោយរបស់សម្ដេចតេជោហ៊ុន សែន នូវអង្ករមួយបាវ ទម្ងន់២៥គីឡូក្រាម មីមួយកេស ត្រីខ១០កំប៉ុង និងទឹកត្រីមួយយួរ។ អំណោយទាំងនេះ បានយកទៅចែកជូនទៅដល់មុខបន្ទប់ជួលរបស់បងប្អូនកម្មករតែម្ដង៕
ដោយៈជម្ពូនុទ