ទូតអាមេរិក៖កម្ពុជានឹងត្រូវទទួលជំនួយវ៉ាក់សាំង១លាន១សែនដូស ត្រឹមចុងខែឧសភា និងមានបន្តទៀតតាមរយៈយន្តការកូវ៉ាក់
ភ្នំពេញៈប្រទេសកម្ពុជា នឹងត្រូវទទួលជំនួយវ៉ាក់សាំង ១លាន១សែនដូស ត្រឹមចុងខែឧសភា និងមានជាបន្តបន្ទាប់។ នេះបើតាមការបញ្ជាក់របស់ឯកអគ្គរដ្ឋទូតអាមេរិកប្រចាំកម្ពុជាលោក ផាទ្រិក ម័ហ្វី ( W. Patrick Murphy) កាលពីម្សិលមិញ។
ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកាលពីថ្ងៃចន្ទ ទី១៧ ខែឧសភា កន្លងទៅបានជួបពិភាក្សាពីបញ្ហាទ្វេភាគី និងតំបន់ជាមួយនឹងលោកឯកអគ្គរដ្ឋទូតអាមេរិកប្រចាំកម្ពុជាលោក ផាទ្រិក ម័ហ្វី ( W. Patrick Murphy)។
ក្នុងជំនួបនេះលោកឯកអគ្គរដ្ឋរដ្ឋទូតអាមេរិក បានចូលរួមរំលែកមរណទុក្ខ ចំពោះការបាត់បង់ដែលប្រទេសកម្ពុជាបានទទួលរងក្នុងអំឡុងនៃការរាតត្បាតជំងឺកូវីដ១៩។
លោកបន្តថាមកដល់ពេលនេះ គេដឹងថា សហរដ្ឋអាមេរិកជាដៃគូដ៏គួរឱ្យទុកចិត្តមួយរបស់កម្ពុជាក្នុងពេលនៃការរីករាលដាលជំងឺជាសាកលមួយនេះ ដោយផ្តល់ជំនួយផ្ទាល់ក្នុងការទប់ស្កាត់ជំងឺកូវីដ១៩ មានតម្លៃជាទឹកប្រាក់១១លានដុល្លារអាមេរិក ជំនួយជាបច្ចេកទេសដ៏សំខាន់ក្នុងការពង្រឹងបន្ថែមនូវភាពជាដៃគូផ្នែកសុខភាពដ៏យូរអង្វែង និងផ្តល់ជំនួយជាង៤ពាន់លានដុល្លារ ដែលជាជំនួយដ៏ច្រើនលើសប្រទេសណាទាំងអស់ដល់យន្តការកូវ៉ាក់របស់អង្គការសុខភាពពិភពលោកដែលតាមកម្មវិធីនេះ ប្រទេសកម្ពុជានឹងត្រូវទទួលជំនួយវ៉ាក់សាំង១លាន១ សែនដូស ត្រឹមចុងខែឧសភា និងមានជាបន្តបន្ទាប់។
ក្នុងជំនួបនេះដែរ លោកទូតបញ្ជាក់ថាសហរដ្ឋអាមេរិក គាំទ្រនូវកិច្ចប្រឹងប្រែងរបស់កម្ពុជា និងរដ្ឋសមាជិកសមាគមអាស៊ានដទៃទៀត ក្នុងការលើកកម្ពស់ដំណើរការ និងស្ថាប័នប្រជាធិបតេយ្យព្រមទាំងនីតិរដ្ឋ នៅក្នុងតំបន់ រួមទាំងប្រទេសភូមាផងដែរ។ អស្ថិរភាព ដែលបង្កើតនូវរដ្ឋប្រហារយោធា ប៉ះពាល់ដល់តំបន់ទាំងមូល ហើយប្រទេសក្នុងអាស៊ានដើរតួនាទីសំខាន់ ក្នុងការជួយស្តារឱ្យប្រទេសភូមាឈានមកកាន់ប្រជាធិបតេយ្យឡើងវិញ៕
ដោយៈជម្ពូនុទ