វៀតណាមគ្រោងពន្យាពេលការរៀបចំ ស៊ីហ្គេម ព្រោះបញ្ហាកូវីដ១៩
ប្រទេសវៀតណាមគ្រោងនឹងពន្យាពេលការរៀបចំប្រកួតកីឡាស៊ីហ្គេម ឆ្នាំ២០២១នេះ ខណៈដែលវៀតណាមកំពុងត្រូវបានវីរុសកូវីដ១៩ វាយលុកខ្លាំងវិញ ជារលកថ្មី នេះបើតាមការចេញផ្សាយរបស់ទីភ្នាក់ងារសារព័ត៌មានរដ្ឋ ដោយទីភ្នាក់ងារសារព័ត៌មានសិង្ហបុរី CNA បានដកស្រង់មកផ្សាយបន្ត នាល្ងាចថ្ងៃទី៩ មិថុនា ២០២១នេះ។
ប្រភពថា តាមគម្រោង ការប្រកួតកីឡាអាស៊ីអាគ្នេយ៍នេះគ្រោងនឹងរៀបចំនៅក្រុងហាណូត និង១១ទីតាំងទៀតនៅវៀតណាម ចាប់ពីថ្ងៃទី២១ វិច្ឆិកា ដល់ ២ ធ្នូ ខណៈដែលទីតាំងគ្រោងរៀបចំខ្លះៗ មានការឆ្លងរាលដាលកូវីដ១៩ ខ្លាំង ដូច្នេះ វៀតណាមត្រូវបានរាយការណ៍ថា មានបំណងចង់ពន្យាពេល ស៊ីហ្គេម លើកទី៣១នេះ ទៅឆ្នាំក្រោយវិញ។
ផ្អែកតាមប្រភពដដែល ទីភ្នាក់ងារអនឡាញ Phap Luat បានចេញផ្សាយថា «គណៈកម្មការអូឡាពិកវៀតណាម ដែលជាម្ចាស់ផ្ទះរៀបចំកីឡាស៊ីហ្គេមលើកទី៣១ បានផ្ញើលិខិតទៅកាន់បណ្តាប្រទេសនានា បញ្ជាក់ពីសំណើសុំពន្យាពេលការប្រកួតនេះ ទៅខែកក្កដា ឆ្នាំ២០២២ ដោយសារស្ថានភាពរាតត្បាតខ្លាំងនៃកូវីដ១៩»។ យ៉ាងណាក៏ដោយ ប្រភពថា ក្រុមប្រឹក្សារៀបចំកីឡាស៊ីហ្គេម ដែលមានទីស្នាក់ការនៅបាងកក នឹងប្រជុំគ្នាសម្រេចម្តងទៀត ក្នុងពេលឆាប់ៗនេះ។
ពាក់ព័ន្ធនឹងចំណុចនេះ បើតាមការចេញផ្សាយរបស់ Fresh News នាល្ងាចថ្ងៃទី៩ មិថុនា នេះថា «លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានបញ្ជាក់ថា ប្រទេសភាគច្រើនមិនគាំទ្រការចង់ពន្យារពេលរៀបចំព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២១ របស់ម្ចាស់ផ្ទះវៀតណាមឡើយ។ ការលើកឡើងនេះ ក្រោយបញ្ចប់កិច្ចប្រជុំបន្ទាន់មួយរបស់គណៈអចិន្ដ្រៃយ៍សហព័ន្ធកីឡាអាស៊ីអាគ្នេយ៍ ដែលធ្វើឡើងតាមប្រព័ន្ធ Zoom នៅរសៀលថ្ងៃទី០៩ ខែមិថុនានេះ។»
ផ្អែកតាមប្រភពដដែល លោក វ៉ាត់ ចំរើន បានបន្ដថា «ក្នុងកិច្ចប្រជុំនេះ យើងឃើញប្រទេសទាំងអស់ មិនយល់ព្រមរឿងការលើកពេលទៅពាក់កណ្ដាលឆ្នាំ២០២២ ទេ ដោយសារវាប៉ះពាល់ច្រើនទៅដល់ការរៀបចំ ពិសេសប៉ះពាល់ខ្លាំងទៅលើគម្រោងថវិកាជាតិរបស់ប្រទេសនីមួយៗ…។ ចឹងយើងឃើញថា ៦-៧ប្រទេសហើយ ដែលជាសំឡេងភាគច្រើនក្នុងអង្គប្រជុំនេះថា មានការលំបាកសម្រាប់ប្រទេសដែលត្រៀមចូលរួមស៊ីហ្គេមនៅវៀតណាមហ្នឹង បើសិនវៀតណាម លើកទៅឆ្នាំ២០២២»៕
