ក្នុងរយៈពេល៤ខែឆ្នាំ២០២១នេះ កម្ពុជាទទួលបានចំណូលពីការនាំចេញកង់ និងគ្រឿងបន្លាស់ទៅកាន់ទីផ្សារអន្តរជាតិសរុបជិត២០០លានដុល្លារ កើនឡើងជាង៣២ភាគរយ (មានវីដេអូ)
ភ្នំពេញ៖ យោងតាមទិន្នន័យពីក្រសួងពាណិជ្ជកម្មកម្ពុជាបានបង្ហាញថា ក្នុងរយៈពេល៤ខែដើមឆ្នាំ២០២១នេះ ការនាំចេញកង់ និងគ្រឿងបន្លាស់ពីកម្ពុជាទៅកាន់ទីផ្សារអន្តរជាតិ មានតម្លៃសរុបជិត២០០លានដុល្លារ កើនឡើងជិត៥០លានដុល្លារ ឬស្មើនឹងជាង៣២ភាគរយ បើធៀបទៅនឹងរយៈពេលដូចគ្នាឆ្នាំមុន ។
បើតាមរបាយការណ៍ខាងលើនេះ ចាប់ពីខែមករា ដល់ខែមេសា ឆ្នាំ២០២១ ការនាំចេញកង់ និងគ្រឿងបន្លាស់កង់មានទឹកប្រាក់១៩៩លាន៤ម៉ឺន១ពាន់៧០៩ដុល្លារ កើនឡើង៣២,៣៨ ភាគរយ បើធៀបនឹងរយៈពេលដូចគ្នាកាលពីឆ្នាំមុន ក្នុងនោះការនាំចេញកង់មានតម្លៃ១៩៨លាន៦៦ម៉ឺន៨ពាន់១៦៣ដុល្លារ កើនឡើង៣២,២៨ភាគរយ និងគ្រឿងបន្លាស់កង់មានតម្លៃ៣៧ម៉ឺន៣ពាន់៥៤៥,៩៨ដុល្លារ កើន១១៣,៤៤ភាគរយ ។ កំណើននេះបង្ហាញថា ការនាំចេញកង់នៅតែជម្នះបាននូវឧបសគ្គពីការរីករាលដាលជំងឺកូវីដ១៩ ដែលកំពុងបន្ដលុកលុយខ្លាំងនៅប្រទេសកម្ពុជា ក៏ដូចជាប្រទេសជាច្រើនទៀតលើពិភពលោក ។ ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានឱ្យដឹងថា ប្រទេសដែលនាំចូលកង់ច្រើនពីកម្ពុជា រួមមាន អាមេរិក អង់គ្លេស អឺរ៉ុប ជប៉ុន កាណាដា ចិន កូរ៉េខាងត្បូង និងប្រទេសក្នុងតំបន់អាស៊ាន ។ ឯកឧត្តមបន្តថា កត្តាសំខាន់ៗដែលជំរុញឱ្យការនាំចេញរបស់កម្ពុជាបន្តកើនឡើងនៅដើមឆ្នាំនេះ គឺដោយសារមានការអំពាវនាវរបស់រដ្ឋមន្ត្រីក្រសួងពាណិជ្ជកម្មកម្ពុជាអោយអ្នកបញ្ជាទិញនៅបន្តការបញ្ជាទិញទំនិញពីកម្ពុជា និងទំនុកចិត្តរបស់អ្នកបញ្ជាទិញ ។ បើតាមឯកឧត្តម ស៊ាង ថៃ សព្វថ្ងៃកម្ពុជាមានរោងចក្រផលិតដំឡើងកង់ចំនួន៦ស្ថិតក្នុងតំបន់សេដ្ឋកិច្ចពិសេសខេត្តស្វាយរៀង ។
បើតាមទិន្នន័យរបស់ក្រសួងពាណិជ្ជកម្ម ក្នុងឆ្នាំ២០២០ កម្ពុជាបាននាំចេញកង់ទៅទីផ្សារអន្តរជាតិមានតម្លៃសរុប៥២៧,០៨លានដុល្លារ កើនឡើង២៧,៧៨ភាគរយ បើធៀបនឹងឆ្នាំ២០១៩។ ចំណែកការនាំចូលកង់ក្នុងឆ្នាំ២០២០ មានតម្លៃ៨,៣៨លានដុល្លារ ធ្លាក់ចុះ១៩,៣៣ភាគរយពីប្រទេសមួយចំនួនដូចជា ជប៉ុន ចិន កោះតៃវ៉ាន់ វៀតណាម អាមេរិក និងថៃ ។ បើតាម Bike-EU.com ដែលជាគេហទំព័រឯកទេសផ្នែកឧស្សាហកម្មកង់ បានឱ្យដឹងថា កម្ពុជាបានក្លាយជាប្រទេសផ្គត់ផ្គង់កង់ឈានមុខគេទៅសហគមន៍អឺរ៉ុបតាំងពីឆ្នាំ ២០១៧ ដោយវ៉ាដាច់កោះតៃវ៉ាន់ ដែលកាន់តំណែងនេះក្នុងរយៈពេលជាង២ទសវត្សរ៍ ៕
