មនុស្សជំនិតរបស់លោក កឹម សុខា : “សម រង្ស៊ី បង្កើតរដ្ឋាភិបាលបង្រួបបង្រួមជាតិ! អន្ទាក់ថ្មីដាក់អ្នកនយោបាយ និងសកម្មជនមមាច”
ភ្នំពេញៈ មនុស្សជំនិតរបស់លោក កឹម សុខា បានហៅការអំពាវនាវរបស់ទណ្ឌិត សម រង្ស៊ី ឱ្យប្រជាពលរដ្ឋបង្កើតរដ្ឋាភិបាលបង្រួបបង្រួមជាតិប្រឆាំងជាមួយរដ្ឋាភិបាលកម្ពុជា ដូចនៅប្រទេសភូមានោះ គឺជាអន្ទាក់ថ្មីដាក់អ្នកនយោបាយ និងសកម្មជនមមាច។ រីឯមន្ត្រីសង្គមស៊ីវិល បានហៅការអំពាវនាវនេះ គឺជាការស្រមើស្រមៃ។ ជាការគិតបែបចម្កួតនយោបាយ និងជាបទឧក្រិដ្ឋដែលច្បាប់នៃព្រះរាជាណាចក្រកម្ពុជា មិនអាចលើកលែងឱ្យបានទេ ចំពោះបុគ្គលនេះ និងបក្ខពួក ឬបើបើជនណាចូលរួមជាមួយអំពើ និងសកម្មភាពខុសច្បាប់នេះ។
លោក មុត ចន្ថា និងលោក កឹម សុខា
លោក មុត ចន្ថា ដែលជាមនុស្សជំនិតរបស់លោក កឹម សុខា បានសរសេរនៅលើទំព័រហ្វេសប៊ុករបស់លោកថា “សម រង្ស៊ី បង្កើតរដ្ឋាភិបាលបង្រួបបង្រួមជាតិ ! អន្ទាក់ថ្មីដាក់អ្នកនយោបាយ និងសកម្មជនមមាច។ លោក កឹម សុខា ព្យាយាមរកដំណោះស្រាយក្នុងស្រុក រីឯលោក សម រង្ស៊ី ខំប្រឹងអូសចេញ។ ភាពខុសគ្នា! ”។
ការសរសេររបស់លោក មុត ចន្ថា គឺចង់ដាស់តឿនដល់អ្នកនយោបាយ និងសកម្មជនដែលងប់ងុលជឿតាមមេឧទ្ទាមក្រៅច្បាប់អំពាវនាវឱ្យប្រជាពលរដ្ឋបង្កើតរដ្ឋាភិបាលបង្រួបបង្រួមជាតិប្រឆាំងជាមួយរដ្ឋាភិបាលកម្ពុជាដូចនៅប្រទេសភូមា កុំជឿតាមមេឧទ្ទាមរូបនេះ ពីព្រោះវាជាអំពើខុសច្បាប់។ អន្ទាក់ថ្មីដាក់អ្នកនយោបាយ និងសកម្មជនមមាច គឺបើសិនជាមានអ្នកនយោបាយស្ទើរភ្លើង និងសកម្មជននៅក្នុងស្រុកដែលនាំគ្នាអនុវត្តន៍តាមការអំពាវនាវនេះ គឺនឹងត្រូវប្រឈមមុខចំពោះច្បាប់ជាក់ជាពុំខាន។ តួយ៉ាងដូចជាអ្នកនយោបាយមួយចំនួន និងសកម្មជនខ្លះ ដែលបានអនុវត្តន៍តាមផែនការខុសច្បាប់របស់សម រង្ស៊ី គឺមានខ្លះជាប់ពន្ធនាគារ និងខ្លះរត់ចោលស្រុក ចោលប្រពន្ធចោលកូន។
ចំណែកលោក សួន សេរីរដ្ឋា ប្រធានក្រុមប្រឹក្សាភិបាលវេទិកាសន្តិភាពកម្ពុជា បានបញ្ជាក់ថា បើមានការបង្កើតរដ្ឋាភិបាលខុសច្បាប់ ដែលមិនកើតចេញពីការបោះឆ្នោត ហើយបង្កើតកងទ័ពប្រឆាំងរដ្ឋាភិបាលស្របច្បាប់ ដែលកើតចេញពីការឆ្នោតនោះ ទោះបង្កើតនៅទីណា ប្រទេសណាក៏ដោយ វាគឺជាអង្គការភេរវកម្ម ដែលប្រឆាំងសេចក្តីសុខសន្តិភាពរបស់ប្រជាជនកម្ពុជា ប្រឆាំងស្ថិរភាពនយោបាយនៃប្រទេសកម្ពុជា ដែលរដ្ឋាភិបាលកម្ពុជា មានសិទ្ធិ និងកាតព្វកិច្ចអនុវត្តន៍ច្បាប់ ទាមទារឱ្យចាប់ខ្លួនពួកនេះមកកាត់ទោសតាមច្បាប់របស់កម្ពុជា។ លោក សួន សេរីរដ្ឋា បានបន្តថា នេះគឺជាការស្រមើស្រមៃ។ ជាការគិតបែបចម្កួតនយោបាយ និងជាបទឧក្រិដ្ឋដែលច្បាប់នៃព្រះរាជាណាចក្រកម្ពុជា មិនអាចលើកលែងឱ្យបានចំពោះបុគ្គលនេះ និងបក្ខពួក ឬបើបើជនណាចូលរួមជាមួយអំពើ និងសកម្មភាពខុសច្បាប់នេះ ។
លោក សួន សេរីរដ្ឋា
លោកថា “ខ្ញុំហៅថាជាការស្រមើស្រមៃ និងជាចម្កួតនយោបាយ ពីព្រោះបុគ្គលមេដឹកនាំបក្សខ្មោចរត់ចោលស្រុក រូបនេះបានអស់លក្ខណ៍នយោបាយរបស់ខ្លួនទៅហើយ… ហើយជីវិតនយោបាយរបស់ខ្លួនក៏វាបានស្លាប់បាត់ទៅហើយ នៅពេលដែលអតីតកូនចៅ ជាថ្នាក់ដឹកនាំក្នុងបក្សខ្លួនចេញទៅបង្កើតគណបក្សថ្មី ព្រោះគេលែងមានជំនឿ គេអស់ជំនឿនឹងការរង់ចាំការបោកប្រាស់របស់បុគ្គលនេះ ដែលចេះត្រឹមតែអង្គុយទាញយកព្រឹត្តិការណ៍អន្តរជាតិ មកបោកប្រាស់លួងលោមឱ្យគេរង់ចាំខ្លួនថ្ងៃនេះ ថ្ងៃនោះ ឆ្នាំនេះ ឆ្នាំក្រោយជាច្រើនលើក ហើយប្រមូលតែលុយយកទៅចាយវាយសប្បាយហ៊ឺហារតែពីរនាក់ប្តីប្រពន្ធកូនចៅខ្លួននោះ ”។
លោកបានបញ្ជាក់ថា កម្ពុជាជាប្រទេសប្រកាន់របបប្រជាធិបតេយ្យសេរីពហុបក្ស ដែលគណបក្សឈ្នះឆ្នោត ត្រូវបានប្រគល់អំណាចឲ្យដឹកនាំរាជរដ្ឋាភិបាលដឹកនាំប្រទេសតាមឆន្ទៈរបស់ប្រជាពលរដ្ឋជាម្ចាស់ឆ្នោត ! ។ពោលគឺមិនមែនគណបក្សចាញ់ឆ្នោតធ្វើរដ្ឋប្រហារ ដេញគណបក្សឈ្នះឆ្នោតមិនឱ្យកាន់អំណាច ដូចនៅប្រទេសភូមានោះទេ ! ។ ករណីនៅក្នុងប្រទេសកម្ពុជា គឺគណបក្សចាញ់ឆ្នោត មិនព្រមទទួលស្គាល់លទ្ធផលនៃការបោះឆ្នោត ហើយដឹកនាំបង្កសកម្មភាព និងអំពើអនាធិបតេយ្យ បំផ្លាញសន្តិសុខសណ្តាប់ធ្នាប់សង្គមមិនគោរពច្បាប់ បើទោះបីជាមានការអត់ធ្មត់ និងសម្បទានលើកលែងជាច្រើនលើកច្រើនសារពីសំណាក់គណបក្សឈ្នះឆ្នោតក៏ដោយ។ ដូច្នោះ ការយកច្បាប់រដ្ឋមកអនុវត្តន៍លើក្រុមអ្នកនយោបាយនៃគណបក្សដែលចាញ់ឆ្នោត ដើម្បីធានានូវស្ថិរភាពនយោបាយ ការពារសន្តិសុខជាតិ និងថែរក្សាសន្តិភាពលើផ្ទៃប្រទេស គឺជាកាតព្វកិច្ចរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ដែលជាគណបក្សឈ្នះឆ្នោត តំណាងឱ្យឆន្ទៈរបស់ប្រជាពលរដ្ឋអ្នកបោះឆ្នោត ជាម្ចាស់ឆ្នោត ! ដែលទាំងអស់នេះវាខុស និងផ្ទុយគ្នាទាំងស្រុងពីព្រឹត្តិការណ៍នៅក្នុងប្រទេសភូមា។ រាជរដ្ឋាភិបាលកម្ពុជា ជាសមាជិករបស់អង្គការសហប្រជាជាតិ ជាអ្នកគ្រប់គ្រងអាសនៈនៅអង្គការសហប្រជាជាតិ និងនៅគ្រប់អង្គការអន្តររដ្ឋាភិបាល និងអង្គការអន្តរជាតិទាំងអស់ ដែលកម្ពុជាជាសមាជិក ! បើជនណា ក្រុមណា បុគ្គលណា ឬបក្សណាញុះញង់ឱ្យបង្កើតរដ្ឋាភិបាលនៅក្រៅស្រុក និងបង្កើតកងកម្លាំងប្រដាប់អាវុធ ប្រឆាំងនឹងរដ្ឋាភិបាលស្របច្បាប់ នោះគឺជាអំពើក្បត់ជាតិ ដែលត្រូវតែចាប់យកមកកាត់ទោសតាមច្បាប់របស់កម្ពុជាជាធរមាន..! ដូចនេះអ្នកចូលរួមក្នុងអំពើខុសច្បាប់ទាំងនេះ ក៏ត្រូវមានទោស និងទទួលទោសដូចគ្នាដែរ៕
ដោយៈពលជ័យ
