ម៉ាក្រូនក្នុងចំណោមនាយករដ្ឋមន្ត្រី១០ រូបប្រធានាធិបតី ៣ រូបនិងស្ដេចមួយអង្គជាគោលដៅមេរោគចារកម្ម
សុខ វេងឈាង
អស់រយៈពេលជាច្រើនសតវត្សមកហើយ អ្នកធ្វើចារកម្មបានដាក់គោលដៅទៅលើបុគ្គលដូចជា ប្រធានាធិបតី នាយករដ្ឋមន្ត្រី ឬស្ដេច ដែលគ្រប់គ្រងជោគវាសនានៃប្រទេសណាមួយ ហើយនៅសតវត្សទី២១ អ្នកធ្វើចារកម្មកាន់មានភាពងាយស្រួល ដោយបុគ្គលទាំងនេះមានទូរស័ព្ទស្មាតហ្វូនដូចជាកម្មវិធី IOS និង Android នៅក្នុងដៃគ្រប់រូប។
នេះគឺជាហេតុផលមូលដ្ឋានគ្រឹះនៃការរកឃើញដ៏គួរឱ្យចាប់អារម្មណ៍ក្នុងការស៊ើបអង្កេតដោយស្ថាប័នព័ត៌មានអន្តជាតិចំនួន ១៧ ដែលរួមមានកាសែត The Washington Post និង The Guardian ទៅលើការបែកធ្លាយទិន្នន័យរបស់ក្រុមហ៊ុនបច្ចេកវិទ្យាឃ្លាំមើល និងចារកម្មអ៊ីស្រាអែលក្រុមហ៊ុន NSO Groups។ នៅក្នុងរយៈពេលប៉ុន្មានខែថ្មីៗនេះការវិភាគលើបញ្ជីលេខទូរស័ព្ទច្រើនជាង ៥០០០០ ខ្សែបានមកពីការបែកធ្លាយខាងលើ និងការត្រួតពិនិត្យទូរស័ព្ទស្មាតហ្វូនរបស់ជនរងគ្រោះមួយចំនួន បានរកឃើញថាកម្មវិធីចារកម្ម Pegasus របស់ NSO ត្រូវបានលក់ឱ្យប្រទេសជាច្រើននៅជុំវិញពិភពលោក ហើយត្រូវបានប្រើដើម្បីឃ្លាំមើលសកម្មជន អ្នកសារព័ត៌មាន អ្នកនយោបាយ និងបុគ្គលឯកជនមួយចំនួន។
ក្នុងចំណោមលេខទូរស័ព្ទច្រើនជាង ៥០០០០ ខ្សែ ក្រុមស្ថាប័នព័ត៌មានអន្តជាតិបានរកឃើញលេខទូរស័ព្ទផ្ទាល់ខ្លួនរបស់ប្រធានាធិបតីបារាំងលោកអេម៉ាញូអែល ម៉ាក្រូន និងប្រមុខរដ្ឋប្រមុខរដ្ឋាភិបាលផ្សេងទៀតចំនួន ១៣រូប រួមជាមួយមន្ត្រីការទូត មន្ត្រីយោធា និងអ្នកនយោបាយជាច្រើនទៀតមកពី ៣៤ ប្រទេស។
ខុទ្ទកាល័យប្រធានាធិបតីបារាំងបាននិយាយប្រសិនបើទូរស័ព្ទរបស់លោកម៉ាក្រូនពិតជាត្រូវបានរកឃើញលេខនៅក្នុងបញ្ជីមែន នោះវាជារឿងធ្ងន់ធ្ងរ។
ដោយស្រង់សំដីពីប្រភពមួយ កាសែតបារាំង Le Monde បានរាយការណ៍ថាលេខទូរស័ព្ទមួយក្នុងចំណោមលេខទូរស័ព្ទលោកម៉ាក្រូនប្រើប្រាស់ជាញឹកញាប់ចាប់តាំងពីឆ្នាំ ២០១៧ ត្រូវបានដាក់ចូលបញ្ជីឃ្លាំមើលដោយភ្នាក់ងារចារកម្មប្រទេសម៉ារ៉ុក។
បន្ទាប់ពីការចេញផ្សាយរបស់ការសែត Le Monde ប្រទេសម៉ារ៉ុកបានចេញសេចក្ដីថ្លែងការមួយថាខ្លួនមិនមានអ្វីទាក់ទងនឹងការប្រើប្រាស់កម្មវិធី Pegasus ទេ ហើយច្រានចោល «ការចោទប្រកាន់គ្មានមូលដ្ឋាន និងមិនពិត»។
ក្រុមហ៊ុនNSO បាននិយាយថាលោកម៉ាក្រូនមិនមែនជាគោលដៅរបស់អតិថិជនពួកគេណាមួយឡើយ ហើយបន្ថែមទៀតការឈ្មោះ និងលេខទូរស័ព្ទក្នុងបញ្ជីនេះមិនមានន័យថាពួកគេត្រូវបានជ្រើសរើសសម្រាប់ការឃ្លាំមើលដោយ Pegasus ទេ។ ប៉ុន្តែអ្នកជំនាញបានយល់ឃើញថាបញ្ជីនេះគឺអាចប្រើដោយអតិថិជនរបស់ NCO ដើម្បីត្រៀមធ្វើការឃ្លាំមើលនៅពេលក្រោយ ដូចដែលបានរកឃើញក្នុងការពិនិត្យទូរស័ព្ទរបស់ជនរងគ្រោះមួយចំនួន។
បញ្ជីនេះក៏រួមមានប្រធានាធិបតីអ៊ីរ៉ាក់ Barham Salih និងប្រធានាធិបតីអាហ្វ្រិកខាងត្បូងលោក Cyril Ramaphosa នាយករដ្ឋមន្ត្រីបច្ចុប្បន្នចំនួន ៣ រូបគឺលោក Imran Khan នៃប្រទេសប៉ាគីស្ថាន លោក Mostafa Madbouly នៃប្រទេសអេហ្ស៊ីប និងលោក Saad-Eddine El Othmani របស់ប្រទេសម៉ារ៉ុក។ អតីតនាយករដ្ឋមន្ត្រី ៧ រូបគឺលោកAhmed Obeid bin Daghr នៃប្រទេសយេម៉ែន លោក Saad Hariri នៃប្រទេសលីបង់ លោក Ruhakana Rugunda នៃអ៊ូហ្គាន់ដា លោក Édouard Philippeនៃប្រទេសបារាំង លោក Bakitzhan Sagintayev នៃប្រទេសកាហ្សាក់ស្ថាន លោក Noureddine Bedoui របស់ប្រទេសអាល់ហ្សេរី និងលោក Charles Michel នៃបែលហ្សិក ដែលយោងទៅតាមកាលបរិច្ឆេទនៅក្នុងបញ្ជីត្រូវបានគេដាក់នៅទីនោះខណៈពេលដែលពួកគេនៅនៅតំណែង។ ព្រះមហាក្សត្រ Muhammad VI នៃប្រទេសម៉ារុក និងអគ្គនាយកអង្គការសុខភាពពិភពលោកលោក Tedros Ghebreyesus ក៏ស្ថិតក្នុងបញ្ជីនេះដែរ។
គ្មានមេដឹកនាំណាម្នាក់បានផ្ដល់ទូរស័ព្ទរបស់ពួកគេដើម្បីធ្វើការផ្ទៀងផ្ទាត់ថាតើពួកគេត្រូវបានឃ្លាំមើលដោយ Pegasus ដែរឬទេ៕
Source:
https://www.washingtonpost.com/world/2021/07/20/heads-of-state-pegasus-spyware/