សម្តេចក្រឡាហោម ស ខេង ចេញប្រកាសសម្រេចចុះបញ្ជីគណបក្ស កែទម្រង់កម្ពុជា
ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានចេញប្រកាសសម្រេចចុះបញ្ជី គណបក្ស កែទម្រង់កម្ពុជា ក្នុងបញ្ជីគណបក្សនយោបាយនៅក្រសួងមហាផ្ទៃជាផ្លូវការហើយនៅថ្ងៃទី១៥ ខែកញ្ញា ឆ្នាំ២០២១ នេះ។គណបក្សនេះមានអាស័យដ្ឋាន នៃទីស្នាក់ការកណ្តាលស្ថិតនៅផ្ទះលេខ ៥១៥ ផ្លូវជាតិលេខ៥ ភូមិពុកឆ្មា ឃុំអន្លង់វិល ស្រុកសង្កែ ខេត្តបាត់ដំបង។
សូមជម្រាបថា លោក អ៊ូ ច័ន្ទ រ័ត្ន អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិបានយកពាក្យស្នើសុំបង្កើត គណបក្ស កែទម្រង់កម្ពុជា ទៅដាក់នៅក្រសួងមហាផ្ទៃកាលពីថ្ងៃទី១ ខែមីនា ឆ្នាំ ២០២១។ នៅថ្ងៃទី១៦ ខែមីនា ឆ្នាំ២០២១ ក្រសួងមហាផ្ទៃបានអនុញ្ញាតឱ្យបង្កើតគណបក្សកែទម្រង់កម្ពុជា។ រហូតមកដល់ថ្ងៃទី១៥ ខែកញ្ញា ឆ្នាំ២០២១ ក្រសួងមហាផ្ទៃបានសម្រេចចុះបញ្ជីគណបក្ស កែទម្រង់កម្ពុជា។
គួរបញ្ជាក់ថា រហូតមកដល់ពេលនេះ គណបក្សនយោបាយដែលបង្កើតឡើងដោយក្រុមអតីតគណបក្សសង្គ្រោះជាតិ មានដូចជា គណបក្សខ្មែរអភិរក្ស របស់លោករៀល ខេមរិន្ទ្រ , គណបក្សខ្មែរស្រលាញ់ជាតិ របស់លោក ជីវ កត្តា , គណបក្សកែទម្រង់កម្ពុជា របស់លោកអ៊ូ ច័ន្ទរ័ត្ន , គណបក្សកម្ពុជានិយម (មិនទាន់ចុះបញ្ជី) របស់លោកយ៉ែម បុញ្ញឫទ្ធិ , គណបក្សបេះដូងជាតិ របស់លោកភ្លុក សៀម៕ ដោយៈ ពលជ័យ
