នៅក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ រយៈពេល ៣ថ្ងៃ គិតចាប់ពីថ្ងៃទី០៥ ដល់ថ្ងៃទី០៧ ខែតុលា ឆ្នាំ២០២១នេះ ចំនួនភ្ញៀវទេសចរណ៍ដែលមកទស្សនាកំសាន្ត នៅតាមកន្លែងកំសាន្ត និងរមណីយដ្ឋាននានា នៅក្នុងខេត្តកំពង់ចាម សរុបមានចំនួន ៣៦.១៤០នាក់ ក្នុងនោះភ្ញៀវជាតិមានចំនួន ៣៦.០៧២នាក់ និងភ្ញៀវបរទេសមានចំនួន ៦៨នាក់ នេះបើតាមការឲ្យដឹងពី លោក ស៊ាន សុគុណ ប្រធានមន្ទីរទេសចរណ៍ ខេត្តកំពង់ចាម ។

លោកប្រធានមន្ទីរទេសចរណ៍ខេត្ត បានបញ្ជាក់ទៀតថា បន្ថែមពីលើតួលខខាងលើនេះ ជុំវិញស្ថានភាពទូទៅ គេសង្កេតឃើញថា ចំនួនភ្ញៀវទេសចរណ៍ មានការកើនឡើង ។ រីឯនៅតាមបណ្តាមូលដ្ឋានអាជីវកម្ម សេវាកម្ម និងនៅតាមរមណីយដ្ឋានទេសចរណ៍ មានសន្តិសុខ សណ្តាប់ធ្នាប់ របៀបរៀបរយល្អ និងរៀបចំអនាម័យ ដោយអនុវត្តតាមវិធានការណ៍ របស់រាជរដ្ឋាភិបាល ក៏ដូចជាការណែនាំ របស់ក្រសួងសុខាភិបាល និងនិតីវិធីប្រតិបត្តិស្តង់ដារអប្បបរមា (SOP) ផងដែរ ។ ចំណែកឯភ្ញៀវទេសចរណ៍ ក៏មានការប្រុងប្រយ័ត្នខ្ពស់ និងចូលរួមអនុវត្តតាមការណែនាំ របស់រាជរដ្ឋាភិបាល និងក្រសួងសុខាភិបាលផងដែរ ៕