ពលករចំណាកស្រុកកាស្មៀរត់គេចខ្លួន ចំពេលមានការកើនឡើងការវាយប្រហារពីក្រុមឧទ្ទាម
ភាពភ័យខ្លាចកើនឡើងសម្រាប់ពលករចំណាកស្រុកនៅតំបន់កាស្មៀរដែលគ្រប់គ្រងដោយឥណ្ឌា បន្ទាប់មនុស្សបួននាក់ត្រូវបានបាញ់សម្លាប់ក្នុងរយៈពេលពីរថ្ងៃ ខណៈក្រុមឧទ្ទាមប្រឆាំងឥណ្ឌាគំរាមកំហែងការវាយប្រហារបន្ថែមទៀត បង្ខំឲ្យមនុស្សរាប់ពាន់នាក់ត្រូវភៀសខ្លួនចេញពីតំបន់នេះ។
ក្រុមឧទ្ទាមកាស្មៀរបានប្រយុទ្ធគ្នាអស់ជាច្រើនទសវត្សរ៍មកហើយ ដោយទាមទារឱ្យមានរដ្ឋឯករាជ្យមួយ ឬការរួមបញ្ចូលគ្នាជាមួយប្រទេសជិតខាងប៉ាគីស្ថាន ដែលទាមទារគ្រប់គ្រងតំបន់មានទំនាស់នេះទាំងមូលដូចគ្នា។
កាលពីល្ងាចថ្ងៃអាទិត្យសប្ដាហ៍មុន ពលករពីក្រៅស្រុកចំនួនពីរនាក់ត្រូវបានក្រុមឧទ្ទាមបាញ់សម្លាប់ដោយមិនរើសមុខ ក្រោយក្រុមប្រដាប់អាវុធនេះរារាំងពលករមិនឱ្យចូលក្នុងបន្ទប់ជួលរបស់ខ្លួននៅជិតភូមិ Ganjipora ក្នុងស្រុក Kulgam ភាគខាងត្បូង។ មួយថ្ងៃមុនហេតុការណ៍នេះកើតឡើង អ្នកលក់ដូរតាមផ្លូវហិណ្ឌូម្នាក់នៅក្នុងតំបន់ Eidgah នៃក្រុង Srinagar និងជាងឈើម៉ូស្លីមម្នាក់ទៀតនៅក្នុងស្រុក Pulwama ត្រូវបានសម្លាប់តាមរបៀបស្រដៀងគ្នា។
ត្រឹមតែខែតុលារនេះ ជនស៊ីវិលយ៉ាងតិច ១១ នាក់រួមទាំងពលករក្រៅស្រុក ៥ នាក់ដែលត្រូវក្រុមឧទ្ទាមបាញ់សម្លាប់ក្នុងតំបន់កាស្មៀរ។ ការសម្លាប់នេះគឺជាផ្នែកមួយនៃការកើនឡើងនៃអំពើហិង្សានាពេលថ្មីៗក្នុងតំបន់ ដែលមានមនុស្សយ៉ាងតិច ៣៣ នាក់ស្លាប់ចាប់តាំងពីដើមខែតុលាមក ក្នុងនោះរួមបញ្ចូលទាំងក្រុមឧទ្ទាម ១៣ នាក់ និងសមាជិកកងកម្លាំងសន្តិសុខឥណ្ឌា ៩ នាក់។
ចំពេលមានការវាយប្រហារកើនឡើង ពលករចំណាកស្រុករាប់រយនាក់ត្រូវបានផ្លាស់ទៅជំរំយោធាឥណ្ឌា ឬអគារការពារផ្សេងទៀត។ កម្មករសំណង់ម្នាក់ឈ្មោះ Ram អាយុ ៤៥ ឆ្នាំ ដែលធ្វើការនៅកាស្មៀរដែលគ្រប់គ្រងដោយឥណ្ឌាអស់រយៈពេល ១៥ ឆ្នាំមកហើយបោះនិយាយថា លោកត្រូវបានប៉ូលីសទូរស័ព្ទហៅឱ្យទៅស្នាក់នៅអគារដែលមានការការពារ។
ពលករដែលមកពី West Bengal រូបនេះបន្ថែមថា ខណៈដែលកម្មករក្រៅស្រុកកំពុងភ័យខ្លាច លោកមានការព្រួយបារម្ភកាន់តែខ្លាំង។ លោកនិយាយថា៖ «មនុស្សជំពាក់លុយខ្ញុំ ហើយខ្ញុំត្រូវចេញទៅក្រៅហើយសុំលុយគេ ព្រោះត្រូវបង់ថ្លៃសាលាឱ្យកូន។ តែវានឹងអាចធ្វើទៅ បានលុះត្រាតែខ្ញុំទទួលបានប្រាក់ដែលខ្ញុំរកបានទាំងអស់»។
ការសម្លាប់ពលករចំណាកស្រុកតាមគោលដៅ បង្ខំឱ្យពលកររាប់ពាន់នាក់វ៉ិចបង្វិចហើយចាកចេញទៅរដ្ឋកំណើតរបស់ខ្លួន។ កម្មករធ្វើការនៅចម្ការផ្លែប៉ោមមួយនៅក្នុងស្រុក Shopian ក្នុងតំបន់និយាយជាអនាមិកពេលកំពុងជិះឡានក្រុងទៅស្រុកវិញថា៖ «យើងមិនពាក់ព័ន្ធនឹងនយោបាយទេ។ យើងគ្រាន់តែមកទីនេះដើម្បីរកប្រាក់ប៉ុណ្ណោះ។ យើងមិនដឹងថាហេតុអ្វីបានជាយើងជាគោលដៅនោះទេ»។
តាមការប៉ាន់ប្រមាណរបស់រដ្ឋាភិបាល ពលករចំណាកស្រុកប្រហែល ៤០០ ០០០ នាក់មកកាស្មៀរជារៀងរាល់ឆ្នាំដើម្បីស្វែងរកការងារជាជាងដេរ ជាងឈើ ជាងកាត់ដេរ និងជាងដែកជាដើម។ មន្រ្តីក្នុងតំបន់ម្នាក់ប្រាប់សារព័ត៌មាន Al Jazeera ថា ពលករកំពុងត្រូវប្តូរទៅរកទីតាំងដែលការពារដោយកងកម្លាំងពិសេស ដោយសារតែការមិនធានាបាននូវបញ្ហាសុត្ថិភាព។
ពួកមន្រ្តីកាស្មៀរនិយាយថា ក្រុមឧទ្ទាមដែលមិនសូវមានគេស្គាល់ឈ្មោះ «រណសិរ្សតស៊ូ(TRF)» ដែលមានមូលដ្ឋាននៅប៉ាគីស្ថាន ត្រូវបានគេជឿថានៅពីក្រោយការសម្លាប់ជនស៊ីវិលនាពេលថ្មីៗនេះ។ ក្រុម TRF បានគំរាមកំហែងវាយប្រហារបន្ថែមទៀតទៅលើជនចំណាកស្រុកក្នុងតំបន់ដោយនិយាយថា ពួកគេគឺជាផ្នែកមួយនៃ «ការរចនារបស់ទីក្រុងញូវដេលីដើម្បីផ្លាស់ប្តូរប្រជាសាស្រ្តនៃតំបន់ដែលមានប្រជាជនមូស្លីមភាគច្រើន»។
TRF និយាយក្នុងសេចក្តីថ្លែងការណ៍ចេញផ្សាយពីដើមខែតុលាថា៖ «ជាថ្មីម្តងទៀតយើង ចង់បញ្ជាក់ឱ្យច្បាស់ថាអ្នកកាន់លំនៅដ្ឋានជនអន្តោប្រវេសន៍ និងអ្នកសហការមិនថាកាន់សាសនាណាក៏ដោយ គឺជាសត្រូវនៃការតស៊ូនៅកាស្មៀរហើយនឹងមិនត្រូវរួចជីវិតឡើយ»។
ស្ថានការណ៍នៅតំបន់កាស្មៀរដែលគ្រប់គ្រងដោយឥណ្ឌាកាន់តែអាក្រក់ទៅៗ កាលពីពីរឆ្នាំមុននៅពេលដែលរដ្ឋាភិបាលរបស់នាយករដ្ឋមន្រ្តី ណារ៉េនដ្រា ម៉ូឌី (Narendra Modi) លុបចោលស្វ័យភាពដែលមានកំណត់របស់តំបន់ ដាក់ការរឹតបន្តឹងសន្តិសុខរយៈពេលមួយខែ និងចាប់ខ្លួនជនជាតិកាស្មៀររាប់រយនាក់ រួមទាំងបង្កើតច្បាប់ដែលជាការគំរាមកំហែងដល់ការផ្លាស់ប្តូរប្រជាសាស្រ្តរបស់តំបន់។
ការលុបចោលមាត្រា ៣៧០ និងមាត្រា ៣៥-A នៃរដ្ឋធម្មនុញ្ញឥណ្ឌាដែលហាមឃាត់ជនមិនមែនក្នុងស្រុកពីរដ្ឋដទៃទៀតមិនឱ្យតាំងលំនៅ ឬទិញដីជាអចិន្ត្រៃយ៍នៅតំបន់កាស្មៀរ បានបង្កការភ័យខ្លាចដល់ប្រជាពលរដ្ឋថារដ្ឋាភិបាលអាចនឹងដកហូតដីធ្លី និងមុខរបររបស់ពួកគេ។
រដ្ឋាភិបាលសហព័ន្ធបង្ហាញពីភាពត្រឹមត្រូវនៃការផ្លាស់ប្តូរដ៏វែងឆ្ងាយរបស់ខ្លួន ដោយនិយាយថាវាចាំបាច់ដើម្បីប្រយុទ្ធប្រឆាំងនឹងការបះបោរប្រដាប់អាវុធ បង្កើតការងារ និងវិបុលភាពសេដ្ឋកិច្ចបន្ថែមទៀតនៅក្នុងតំបន់។ ប៉ុន្តែអ្នកស្រុកនិយាយថា ការផ្លាស់ប្តូរនេះគ្រាន់តែធ្វើឱ្យស្ថានការណ៍សន្តិសុខនៅក្នុងតំបន់កាន់តែអាក្រក់ទៅៗប៉ុណ្ណោះ។
ឆ្នាំ ២០២១ គឺជាឆ្នាំមួយដែលមានចំនួនមនុស្សស្លាប់ច្រើនបំផុតសម្រាប់ក្រុមជនចំណាកស្រុក និងជនជាតិភាគតិចនៅតំបន់កាស្មៀរដែលគ្រប់គ្រងដោយឥណ្ឌា។ ចាប់តាំងពីខែមករាមក ជនស៊ីវិលយ៉ាងតិចចំនួន ៣២ នាក់រួមទាំងសកម្មជនរបស់គណបក្សនយោបាយគាំទ្រឥណ្ឌា ត្រូវបានសម្លាប់នៅក្នុងតំបន់នេះ ហើយមនុស្ស ៦ នាក់ដែលស្លាប់នៅឆ្នាំនេះ ជាជនជាតិភាគតិច។
ប្រភព៖ Aljazeera