សប្តាហ៍ក្រោយនេះ កិច្ចព្រមព្រៀងពាណិជ្ជកម្មសេរី (CKFTA) កម្ពុជា និងកូរ៉េឈានដល់ការចុះហត្ថលេខាជាផ្លូវការហើយ (Video Inside)
ភ្នំពេញ៖ កម្ពុជានឹងចុះហត្ថលេខាលើកិច្ចព្រមព្រៀងពាណិជ្ជកម្មសេរី ហៅកាត់ថា (CKFTA) ជាផ្លូវការជាមួយសាធារណរដ្ឋកូរ៉េនៅថ្ងៃទី២៦ ខែតុលា ឆ្នាំ២០២១ខាងមុខ បន្ទាប់ពីប្រទេសទាំងពីរបានធ្វើការចរចាអស់រយៈពេលជាង១ឆ្នាំមកនេះ។
ការយឺតយ៉ាវត្រូវបានអ្នកនាំពាក្យក្រសួងពាណិជ្ជកម្មពន្យល់ថា ភាគីទាំងពីរត្រូវការពេលវេលាដើម្បីផ្ទៀងផ្ទាត់ដោយយកចិត្តទុកដាក់ និងម្យ៉ាងទៀតដោយសារតែបញ្ហាកូវីដ-១៩។ នេះបើយោងតាមមន្ត្រីជាន់ខ្ពស់នៃក្រសួងពាណិជ្ជកម្មកម្ពុជា។ ឯកឧត្តម ស៊ាង ថៃ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មមានប្រសាសន៍អោយដឹងថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េនឹងត្រូវបានចុះហត្ថលេខាដោយរដ្ឋមន្ត្រីពាណិជ្ជកម្មទាំងពីរ គឺឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងលោកជំទាវ យ៉ូ មឿងហេ (YOO Myung-hee) រដ្ឋមន្ត្រីពាណិជ្ជកម្មនៃសាធារណរដ្ឋកូរ៉េតាមប្រព័ន្ធវីដេអូ។ ឯកឧត្តម ស៊ាង ថៃ បន្តថា ក្រោយកិច្ចព្រមព្រៀងនេះចូលជាធរមានការងារដែលក្រសួងស្ថាប័ន ក៏ដូចជាវិស័យឯកជនត្រូវធ្វើគឺត្រូវរៀបចំផែនការយុទ្ធសាស្ត្រទាញយកប្រយោជន៍ជាអតិបរិមា តាមរយៈការកំណត់ទំនិញសក្ដានុពល,ពង្រឹងនិងពង្រីកសមត្ថភាពផលិត, ផលិតទំនិញដែលមានគុណភាព និងស្តង់ដារ។ល។ សម្រាប់នាំចេញទៅកាន់ទីផ្សារប្រទេសកូរ៉េ កម្ពុជា និងកូរ៉េខាងត្បូងបានចាប់ផ្តើមចរចាកិច្ចព្រមព្រៀងពាណិជ្ជកម្មសេរីជាមួយគ្នាកាលពីខែកក្កដា ឆ្នាំ២០២០ បន្ទាប់ពីភាគីទាំងពីរបានធ្វើការសិក្សាពីលទ្ធភាពជាដៃគូពាណិជ្ជកម្មជាមួយគ្នាអស់ជាច្រើនខែ គឺចាប់តាំងពីឆ្នាំខែវិច្ឆិកា ឆ្នាំ២០១៩មកម្ល៉េះ។ មុននឹងឈានដល់មានកិច្ចព្រមព្រៀងជាមួយគ្នា គឺអ្នកជំនាញបានសិក្សាយ៉ាងល្អិតល្អន់លើកិច្ចព្រមព្រៀងពាណិជ្ជកម្មសេរីនេះ គឺមានតែផលចំណេញ គ្មានការខាតបង់ឡើយសម្រាប់កម្ពុជា។ បើតាមក្រសួងពាណិជ្ជកម្មកិច្ចព្រមព្រៀងពាណិជ្ជកម្មសេរីរវាងកូរ៉េខាងត្បួង និងកម្ពុជានឹងជំរុញឲ្យកម្ពុជាអាចនាំចេញនូវផលិតផលជាច្រើនទៀតទៅកាន់សាធារណរដ្ឋកូរ៉េមានដូចជាសម្លៀកបំពាក់ កាបូប ស្បែកជើង គ្រឿងបន្លាស់រថយន្ត គ្រឿងអេឡិច ត្រូនិច កៅស៊ូ និង ផលិតផលកសិកម្មជាដើមរីឯការនាំចូលពីកូរ៉េមកវិញមានយានយន្ត គ្រឿងអេឡិចត្រូនិក ឱសថ និងគ្រឿងសំអាងជាដើម។ កិច្ចព្រមព្រៀងពាណិជ្ជកម្មសេរីរវាងកម្ពុជានិងប្រទេសកូរ៉េខាងត្បូង (CKFTA) នឹងចូលជាធរមាននៅក្នុងអំឡុងខែតុលា ឆ្នាំ២០២១ បន្ទាប់ពីរដ្ឋមន្ត្រីពាណិជ្ជកម្មប្រទេសទាំងពីរបានប្រកាសបញ្ចប់ការចរចាជាផ្លូវការកាលពីព្រឹកថ្ងៃទី៣ ខែកុម្ភៈ ឆ្នាំ២០២១។ ភាគីទាំងពីរសង្ឃឹមថាកិច្ចព្រមព្រៀងពាណិជ្ជកម្មសេរីនេះនឹងជួយជំរុញពាណិជ្ជកម្មនិងការវិនិយោគទ្វេភាគីបន្ថែមទៀតព្រមទាំងជួយពន្លឿនការស្តារសេដ្ឋកិច្ចនៃប្រទេសទាំងពីរឡើងវិញ ក្រោយវិបត្តិកូវីដ-១៩។ កម្ពុជាគឺជាគោលដៅនាំចេញទី៦០របស់សាធារណរដ្ឋកូរ៉េដែលមានទំនិញសំខាន់ៗដូចជា ភេសជ្ជៈ គ្រឿងអេឡិចត្រូនិក ឱសថ និងរថយន្តដឹកទំនិញ។ ចំណែកឯកម្ពុជាវិញបាន នាំទំនិញទៅកូរ៉េខាងត្បូងភាគច្រើនគឺជាសម្លៀកបំពាក់ និងផលិតផលស្បែកជើង និងកាបូបជាដើម។ នៅក្រោមកិច្ចព្រមព្រៀង CKFTA និងកិច្ចព្រមព្រៀង RCEP កម្ពុជានឹងលើកលែងពន្ធប្រមាណ៩៣,៨ភាគរយនៃផលិតផលនាំចូលពីកូរ៉េខាងត្បូង ហើយកូរ៉េខាងត្បូងនឹងលើកលែងពន្ធប្រមាណ៩៥,៦ភាគរយលើផលិតផលរបស់កម្ពុជានេះបើតាមការចុះផ្សាយរបស់ក្រសួងពាណិជ្ជកម្មកន្លងមក។
របាយការណ៍ពីក្រសួងពាណិជ្ជកម្មបានបង្ហាញថា ទំហំពាណិជ្ជកម្មកម្ពុជា-កូរ៉េ ក្នុងឆ្នាំ ២០១៩ មានប្រមាណ ១,០៣២ លានដុល្លារ។ ទំហំពាណិជ្ជកម្មនេះបានកើនឡើងជិត២០ភាគរយ បើធៀបនឹងឆ្នាំ២០១៨ និង កើនឡើង ២៥៤ភាគរយ បើធៀបនឹងឆ្នាំ២០០៩ ដែលមានប្រមាណ ២៩១ លានដុល្លារ។ ដោយឡែកនៅក្នុងឆ្នាំ២០២០ ទំហំពាណិជ្ជកម្មទ្វេ ភាគីរវាងប្រទេសទាំងពីរគឺសម្រេចបានជាង ៨៨៥លានដុល្លារប៉ុណ្ណោះ ពោលគឺមានការថយចុះប្រមាណ ១៨ភាគរយ ធៀបនឹងឆ្នាំ២០១៩។ ហើយក្រៅពីប្រទេសចិន និងសាធារណរដ្ឋកូរ៉េ រាជរដ្ឋាភិបាលកម្ពុជាក៏បានបង្កើតក្រុមការងារជំនាញដើម្បីសិក្សា និងរៀបចំគោលនយោបាយយុទ្ធសាស្ត្រចរចាក្នុងការបង្កើតកិច្ចព្រមព្រៀងពាណិជ្ជកម្មសេរីជាមួយប្រទេសធំៗគោលដៅចំនួន៦ទៀតផងដែរ ក្នុងនោះមានសហភាពសេដ្ឋកិច្ចអឺរ៉ាស៊ី (EAEU) ជាអង្គការសមាហរណកម្មថ្នាក់តំបន់នៅអាស៊ីខាងលិច អាស៊ីខាងកើត និងអាស៊ីកណ្តាល អង់គ្លេស អាមេរិក ជប៉ុន ម៉ុងហ្គោលី និងឥណ្ឌា៕
