ថៃសម្រេចឲ្យទេសចរបរទេសមកពី៤៦ប្រទេសចូលប្រទេស មិនធ្វើចត្តាឡីស័ក
ប្រទេសថៃបានប្រកាស កាលពីយប់ថ្ងៃទី២១ តុលាថា ខ្លួននឹងអនុញ្ញាតឲ្យអ្នកដំណើរបរទេសដែលចាក់វ៉ាក់សាំងរួច មកពីប្រទេសនិងតំបន់ចំនួន៤៦ ចូលទឹកដីប្រទេសថៃ ដោយគ្មានការធ្វើចត្តាឡីស័ក ចាប់ពីខែវិច្ឆិកា ២០២១។ បញ្ជីឈ្មោះប្រទេសទាំងនោះ ក៏រួមមានទាំងចិន អាមេរិក អង់គ្លេស និងម៉ាឡេស៊ី ដែលចេញផ្សាយដោយក្រសួងការបរទេសថៃ។
អ្នកនាំពាក្យក្រសួងការបរទេសTanee Sangrat បានឲ្យដឹងថា ចាប់ពីថ្ងៃទី១ វិច្ឆិកា អ្នកដំណើរទាំងនោះនឹងត្រូវអនុញ្ញាតឲ្យធ្វើដំណើរដោយសេរីនៅប្រទែសថៃ ក្រោយពេលឆ្លងកាត់ដំណាក់កាលធ្វើតេស្តកូវីដ១៩ បន្ទាប់ពីទៅដល់។
ការប្រកាសនេះធ្វើឡើង ក្រោយពេលនាយករដ្ឋមន្ត្រីថៃ ប្រាយុទ្ធ ចាន់អូចា បាននិយាយ កាលពីសប្តាហ៍មុនថា ប្រទេសលោកនឹងផ្តល់ការអនុញ្ញាតឲ្យអ្នកដំណើរចាក់វ៉ាក់សាំងរួច មកពីយ៉ាងតិច១០ប្រទេស ធ្វើដំណើរតាមយន្តហោះចូលប្រទេសដោយគ្មានការធ្វើចត្តាឡីស័ក ចាប់ពីខែក្រោយនោះ៕