Positive Cambodia Ep25: ចក្ខុវិស័យរដ្ឋាភិបាលក្នុងការប្រែខេត្តព្រះសីហនុទៅជា តំបន់សេដ្ឋកិច្ចពិសេសគំរូពហុបំណង និងប៉ូលសេដ្ឋកិច្ច
រដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ បានជ្រើសរើសយកវិទ្យាស្ថាននគរូបនីយកម្ម និងឌីហ្សាញស៊ិនជិន (UPDIS) របស់ប្រទេសចិន ដើម្បីរៀបចំផែនការមេសម្រាប់អភិវឌ្ឍន៍ និងប្រែក្លាយខេត្តព្រះសីហនុឱ្យទៅជា «តំបន់សេដ្ឋកិច្ចពិសេសគំរូពហុបំណង» ដែលជាមជ្ឈមណ្ឌលនវានុវត្តន៍ថ្មី និងជាមជ្ឈមណ្ឌលឡូជីស្ទិក និងរមណីយដ្ឋានក្នុងតំបន់។
កិច្ចព្រមព្រៀងរៀបចំផែនការមេនេះត្រូវបានចុះហត្ថលេខារវាង ឯកឧត្តម ផាន់ ផល្លា រដ្ឋលេខាធិការ និងជាតំណាងក្រសួងសេដ្ឋកិច្ច និងហិរញ្ញវត្ថុជាមួយលោក Sima Xiao ប្រធាន UPDIS ក្រោមអធិបតីភាព ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្រ្តី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តាមប្រព័ន្ធ Zoom កាលពីថ្ងៃទី១៨ ខែតុលា ឆ្នាំ២០២១។
ផែនការមេនេះ គឺជាផែនទីបង្ហាញផ្លូវដ៏សំខាន់សម្រាប់អភិវឌ្ឍន៍ក្រុងព្រះសីហនុ ឱ្យទៅជា «ទីក្រុង Shenzhen ទី២» ស្របតាមគោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ ២០១៥-២០២៥។ ការអភិវឌ្ឍផែនការមេនេះអាចនឹងត្រូវប្រើពេលប្រហែល ១៨ខែ ដោយចែកជា ៤ ដំណាក់កាល គឺការប្រមូលទិន្នន័យ និងស្ទង់ទីតាំង, ការវាយតម្លៃ និងការស្នើសុំ ការរៀបចំផែនការមេ និងការបញ្ចប់គម្រោងផែនការមេ។
ឯកឧត្តម អូន ព័ន្ធមុនីរ័ត្ន បានលើកឡើងថា រដ្ឋាភិបាលកម្ពុជាបានកំណត់ចក្ខុវិស័យក្នុងការប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង និងជាប៉ូលសេដ្ឋកិច្ចដ៏សំខាន់សម្រាប់ទាក់ទាញ និងស្រូបយកការវិនិយោគពីបរទេស ដែលអាចក្លាយទៅជា «ក្បាលម៉ាស៊ីនស្នូល» ថ្មីមួយសម្រាប់ជំរុញកំណើនសេដ្ឋកិច្ចជាតិ។ ទស្សនទានសម្រាប់រៀបចំផែនការមេដើម្បីអភិវឌ្ឍន៍ និងប្រែក្លាយខេត្តព្រះសីហនុទៅជា «តំបន់សេដ្ឋកិច្ចពិសេសគំរូពហុបំណង» ត្រូវបានអនុម័តដោយលោកនាយករដ្ឋមន្ត្រី កាលពីឆ្នាំ ២០១៩។
សំនួរពិភាក្សា
១/ ជាបឋមមុននឹងនាងខ្ញុំបានចូលទៅកាន់ប្រធានបទ សូមអោយលោកបានមានចំណាប់អារម្មណ៍បន្តិចទៅនឹងសម្រស់ថ្មីរបស់ខេត្តព្រះសីហនុរបស់យើង ?
២/ ជាពត៌មាន រដ្ឋាភិបាលកម្ពុជាតាមរយៈក្រសួងសេដ្ឋកិច្ច និងហិរញ្ញវត្ថុ បានជ្រើសរើសយកវិទ្យាស្ថាននគរូបនីយកម្ម និងឌីហ្សាញស៊ិនជិន (UPDIS) ដើម្បីរៀបចំផែនការមេសម្រាប់អភិវឌ្ឍន៍ និងប្រែក្លាយខេត្តព្រះសីហនុឱ្យទៅជា «តំបន់សេដ្ឋកិច្ចពិសេសគំរូពហុបំណង» ដែលជាមជ្ឈមណ្ឌលនវានុវត្តន៍ថ្មី និងជាមជ្ឈមណ្ឌលឡូជីស្ទិក និងរមណីយដ្ឋានក្នុងតំបន់។ តាមរយះការយល់ឃើញរបស់លោក តើការរៀបចំផែនការមេរបស់រាជរដ្ឋាភិបាលនិងក្រសួងពាក់ព័ន្ធ ក៏ដូចជាការជ្រើសរើសដៃគូរសហការណ៍ចូលរួមនេះ នឹងធ្វើអោយការអភិវឌ្ឍខេត្តព្រះសីហនុ មានរូបរាងយ៉ាងណាដែរ?
៣/ យោងតាមទិន្នន័យពីរដ្ឋបាលខេត្តព្រះសីហនុ ចាប់ពីឆ្នាំ១៩៩៤ មកដល់ពាក់កណ្តាលឆ្នាំ២០២០ ខេត្តព្រះសីហនុបានទាក់ទាញការវិនិយោគជិត ៤ពាន់លានដុល្លា។ គិតត្រឹមខែឧសភា ឆ្នាំ២០២០ ក្រុមហ៊ុនចំនួន២០ បានអភិវឌ្ឍន៍ឆ្នេរ និងកោះជាមួយនឹងការវិនិយោគដើមទុនសរុបចំនួន ៣,៩ ពាន់លានដុល្លា។ កាលពីឆ្នាំ២០១៩ ខេត្តទទួលបានទេសចរប្រមាណ២ លាននាក់។ យោងតាមទិន្នន័យពីរដ្ឋបាលខេត្តព្រះសីហនុចាប់ពីឆ្នាំ ១៩៩៤ មកដល់ពាក់កណ្តាលឆ្នាំ ២០២០ ខេត្តព្រះសីហនុបានទាក់ទាញការវិនិយោគជិត ៤ ពាន់លានដុល្លារ។ គិតត្រឹមខែឧសភា ឆ្នាំ ២០២០ ក្រុមហ៊ុនចំនួន ២០ បានអភិវឌ្ឍឆ្នេរ និងកោះជាមួយនឹងការវិនិយោគដើមទុនសរុបចំនួន ៣,៩ ពាន់លានដុល្លារ។ ដោយឡែក ចាប់ពីឆ្នាំ ២០០៧ ដល់ខែកក្កដា ឆ្នាំ ២០២០ គម្រោងវិនិយោគ ៨១៩ ត្រូវបានអនុម័តនៅក្នុងខេត្តក្នុងនោះគម្រោង ២១៨ មានកម្ពស់ចាប់ពី ៥ ទៅ ៤២ ជាន់។ កាលពីឆ្នាំ ២០១៩ ខេត្តទទួលបានទេសចរប្រមាណ ២ លាននាក់៕