ការនាំចេញស្រូវ-អង្កររបស់កម្ពុជារកចំណូលបានជាង ៩៥៧លានដុល្លារ ក្នុងរយៈពេល ១០ខែ ឆ្នាំ២០២១
ភ្នំពេញ៖ សហព័ន្ធស្រូវ-អង្ករកម្ពុជា (CRF) បានអោយដឹងថា ចាប់ពីខែមករា ដល់ខែតុលា ឆ្នាំ ២០២១ កម្ពុជានាំចេញស្រូវ និងអង្ករក្នុងបរិមាណសរុប ៣លាន១១ម៉ឺន៩ពាន់៨២៩តោន ដែលមានតម្លៃសរុប ៩៥៧,៣០លានដុល្លារ។
ក្នុងនោះកម្ពុជាបាននាំចេញអង្ករគ្រប់ប្រភេទបានចំនួន ៤៦ម៉ឺន១៦៩តោន ដែលគិតជាទឹកប្រាក់មានចំនួន ៣២៣.៤៧លានដុល្លារទៅគោលដៅទីផ្សារចំនួន ៥៥ប្រទេស និងតំបន់ស្វយ័ត។ ដោយឡែកការនាំចេញស្រូវ គឺមានចំនួន ២លាន៦៥ម៉ឺន៩ពាន់៦៦០តោន គិតជាប្រាក់ប្រមាណ ៦៣៣,៨២លានដុល្លារ។ ទីផ្សារចម្បងមានចំនួន ៥ គ្របដណ្តប់ ៧៩.០៣% លើបរិមាណអង្ករនាំចេញសរុប រួមមានប្រទេសចិន និងតំបន់ស្វយ័តហុងកុង ម៉ាកាវ បាននាំចេញចំនួន ៤៩.៨០% ស្មើនឹង ២២ម៉ឺន៩ពាន់១៧៧តោន បារាំង ១១.០៧% ស្មើនឹង ៥ម៉ឺន៩៥១តោន ហ្កាប៊ុង ៧.៩៥% ស្មើនឹង ៣ម៉ឺន៦ពាន់៥៨៨តោន ម៉ាឡេស៊ី ៦.៦៦% ស្មើនឹង ៣ម៉ឺន៦៥៦តោន និងហូឡង់ ៣.៥៥% ស្មើនឹង ១ម៉ឺន៦ពាន់៣៣៨តោន។ ប្រភេទអង្ករនាំចេញនេះ មានដូចជា អង្ករក្រអូបគ្រប់ប្រភេទបានចំនួន ៣២ម៉ឺន៤ពាន់៣៦៤តោន ឬ ៧៨.៩៨% នៃការនាំចេញសរុប ដែលក្នុងនោះអង្ករក្រអូបប្រណិតមាន ៤១% អង្ករក្រអូបធម្មតាមាន ៣៧.៨៩% អង្ករសគ្រាប់វែងមាន ២៩.៦៧ % អង្ករចំហុយមាន ១.៩៦ % និងអង្ករសរីរាង្គមាន ១.៤៤%។ ចំពោះការនាំស្រូវចេញគឺមានបរិមាណសរុបចំនួន ២លាន៦៥ម៉ឺន៩ពាន់៦៦០តោន ដែលគិតជាទឹកប្រាក់ប៉ាន់ស្មានប្រមាណជា ៦៣៣.៨២លានដុល្លារ។ ទឹកប្រាក់សរុបទាំងការនាំចេញស្រូវ និងអង្ករក្នុងរយៈពេល ១០ខែ ឆ្នាំ២០២១ មានប្រមាណជា ៩៥៧.៣០លានដុល្លារ។ សម្រាប់ខែតុលា ឆ្នាំ២០២១ កម្ពុជានាំចេញអង្ករបានចំនួន ៤ម៉ឺន៩ពាន់៤៧១តោន មានកំណើនប្រមាណជា ៤.០៨% បើធៀបទៅនឹងរយៈពេលដូចគ្នាក្នុងខែតុលា ឆ្នាំ២០២០។
សូមរំលឹកថា កាលពីឆ្នាំ ២០២០ កម្ពុជាបាននាំចេញអង្ករសរុប ៦៩ម៉ឺន៨២៩តោនដោយមានតម្លៃ ៥៣៩លានដុល្លារ កើនឡើង ១១,៤០ភាគរយ បើធៀបនឹងឆ្នាំ ២០១៩។ រីឯការនាំចេញស្រូវក្រៅផ្លូវការមាន ២លាន២០ម៉ឺន៨ពាន់១២៦តោន។ នេះបើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ៕