ក្រុមហ៊ុនអគ្គិសនីរដ្ឋចិនរំលឹកពីតុល្យភាពតិចតួចរវាងតម្រូវការ និងការផ្គត់ផ្គង់ថាមពល
ក្រុមហ៊ុនអគ្គិសនីរដ្ឋចិនដាស់តឿនពីតុល្យភាពតិចតួចរវាងតម្រូវការក្នុងការប្រើប្រាស់ថាមពល និងថាមពលដែលខ្លួនកំពុងតែមានសម្រាប់ផ្គត់ផ្គង់ សម្រាប់រដូវរងាខាងមុខ និងរដូវផ្ការីកឆ្នាំក្រោយ។ នេះបើតាមសេចក្ដីថ្លែងការណ៍របស់ខ្លួន កាលពីថ្ងៃអាទិត្យកន្លងទៅ។
នៅក្នុងឆ្នាំនេះ អាកាសធាតុនៅចិនអាចនឹងត្រជាក់ជាងរាល់ឆ្នាំនៅភាគខាងជើង ខណៈនៅភាគត្បូងនឹងមានកម្រិតទឹកភ្លៀងតិច។
បន្ថែមពីនេះទៀត ក្រុមហ៊ុនរដ្ឋបាននិយាយថា នៅក្នុងតំបន់ ដែលខ្លួនផ្គត់ផ្គង់អាចនឹងមានកង្វះខាតថាមពល ដោយសារតែថាមពលទាញយកពីវារីអគ្គិសនីធ្លាក់ចុះ ស្របពេលការប្រើប្រាស់នឹងកើនឡើង អំឡុងពេលរដូវរងា។
ចាប់តាំងពីខែឧសភា មួយភាគធំនៅប្រទេសចិនបានរងនូវកង្វះថាមពលអគ្គិសនីសម្រាប់ប្រើប្រាស់ ដោយសារតែធ្យូងថ្មឡើងថ្លៃ និងការផ្គត់ផ្គង់ថយចុះ ដែលជាលទ្ធផលមកពីសកម្មភាពឧស្សាហកម្មកើនឡើងវិញ។
យ៉ាងណាមិញ ទីផ្សារធ្យូងថ្មហាក់មានស្ថិរភាពវិញ ក្រោយពីចិនមានវិធានការក្នុងការទប់ស្កាត់មិនឱ្យធ្យូងថ្មឡើងថ្លៃ ក៏ដូចជាបង្កើនផលិតកម្មធ្យូងថ្ម។ ដោយសារតែរឿងនេះហើយ ទើបការផ្គត់ផ្គង់ថាមពលអគ្គិសនីត្រលប់មកសភាពធម្មតាវិញ។ នេះបើតាមក្រុមហ៊ុនអគ្គិសនីរដ្ឋចិន៕
