Positive Cambodia Ep30: ព្រះរាជពិធីបុណ្យអុំទូកនឹងត្រូវផ្អាក ការរៀបអាពិពាហ៍ពិពាហ៍ និងពិធីសាសនាផ្សេងៗ ត្រូវបានប្រារព្ធធម្មតា
គួរំលឹកជម្រាបជូនផងដែរថា ព្រះរាជពិធីបុណ្យអុំទូកត្រូវបានផ្អាកការប្រារព្ធរយៈពេល៣ឆ្នាំជាប់ៗគ្នា គឺឆ្នាំ២០១១ ២០១២ និងឆ្នាំ២០១៣ បន្ទាប់ពីមានព្រឹត្តិការណ៍រត់ជាន់គ្នាលើស្ពាន នៅកោះពេជ្រ។ ការផ្អាកបន្តបន្ទាប់ទៀតគឺដោយសារគ្រោះទឹកជំនន់ និងក្រោយការសោយទិវង្គតរបស់ព្រះបរមរតនកោដ្ឋព្រះបាទសម្តេចព្រះនរោត្តម សីហនុ។ នៅឆ្នាំ២០១៥ ពិធីបុណ្យនេះក៏ត្រូវបានផ្អាកម្តងទៀត ដោយសារទឹកទន្លេរាក់ពេកដែលធ្វើឱ្យទូកមិនអាចអុំបាន។ សំរាប់ឆ្នាំ២០២០ រាជរដ្ឋាភិបាលកម្ពុជាបានសម្រេចផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដោយសារមានការរីករាលដាលនៃការឆ្លងនៃវីរុសកូវីដ១៩ តាមសំណើរបស់គណៈកម្មាធិការជាតិរៀបចំបុណ្យជាតិ និងអន្តរជាតិ ។ ដោយឡែកឆ្នាំនេះ ឆ្នាំ២០២១ ក៏នឹងមិនអនុញ្ញាតឱ្យមានការប្រារព្ធដូចឆ្នាំមុនៗដូចគ្នាផងដែរ ដោយសារតែការរីករាលដាលនៃមេរោគកូវីដ១៩។
ដោយឡែកកាលពីថ្ងៃ១៣ ខែវិច្ឆិកា ឆ្នាំ២០២១ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន មានប្រសាសន៍ថា ការរៀបអាពិពាហ៍ពិពាហ៍ និងពិធីនានាខាងសាសនា គឺដំណើរការធម្មតាមិនកំណត់ចំនួនមនុស្សទេ តែកំណត់អំពីទីតាំងធំ ឬតូច ដើម្បីកំណត់ចំនួនមនុស្ស ជាមួយនឹងវិធានការដែលក្រសួងសុខាភិបាលដាក់ចេញថ្មីៗ។ ជាតំណឹងល្អដល់ប្រជាជាដែលចង់រៀបពិធីអាពិពាហ៍ពិពាហ៍ អោយកូនចៅ ក៏ដូចជាពិធីសាសនាផ្សេងៗ។ ក្នុងករណីនេះ សម្តេចតេជោ លោកបានមានប្រសាសន៍ថា អ្នកដែលមិនបានចាក់វ៉ាក់សាំង ដោយសារការហាមឃាត់របស់គ្រូពេទ្យ គឺមិនជាបញ្ហានោះទេ ក៏ប៉ុន្តែអ្នកដែលគេចវេសពីការចាក់វ៉ាក់សាំង មិនគួរគប្បីត្រូវបានលើកទឹកចិត្តឱ្យមានការអញ្ជើញចូលរួមនៅក្នុងអាពាហ៍ពិពាហ៍នេះទេ ដែលវាអាចទៅជាភ្នាក់ងារចម្លងនៅក្នុងពិធីរៀបចំអាពាហ៍ពិពាហ៍៕